რჩევები მზის მოყვარულთათვის



ზაფხულის სეზონის დადგომასთან ერთად აქტიური სამზადისი იწყება, თუ სად და როგორ გავირუჯოთ. ეს, ერთი შეხედვით სასიამოვნო პროცესი კანისთვის საზიანოდ რომ არ გადაგვექცეს, მზის აბაზანის მიღებისას შესაბამისი წესები უნდა დავიცვათ.

ამ საკითხთან დაკავშირებით რჩევებს თბილისის დერმატოვენეროლოგიის ასოციაციის თავმჯდომარე სოსო კობახიძე გვაძლევს. - ყოველწლიურად გვაფრთხილებენ მომატებული რადიაციის შესახებ და გვირჩევენ, ულტრაიისფერ სხივებს მოვერიდოთ. თქვენ, როგორც კანის სპეციალისტი, რა რჩევებს მოგვცემთ ამასთან დაკავშირებით?

- საქმე ისაა, რომ ზოგადად გარუჯვა - კანის ტრავმატიზაციაა, რადგან, როდესაც კანის მექანიკური ტრავმირება ხდება, კანი წითლდება, გარუჯვისას კი - შავდება, რაც მისი დაცვითი რეაქციაა და ეს არანაირი სიჯანსაღის მომტანი არ არის. მაგრამ რადგან ადამიანებს ძალიან მოსწონთ, დასაშვებია, ოღონდ არსებობს გარკვეული წესები, რომლებიც გარუჯვის დროს უნდა დაიცვათ.

გარუჯვისას ორგანიზმის გადახურება ხდება, ულტრაიისფერი გამოსხივების ჭარბი დოზით მიღება და ა.შ. ოზონის შრის გათხელებასთან და გლობალურ პროცესებთან დაკავშირებით, რა თქმა უნდა, რადიაციის დონე იმატებს, ეს ყოველთვის ასე იყო და ასე გაგრძელდება.

- რა წესები უნდა დავიცვათ გარუჯვისას?

- პირველ რიგში, უნდა ვიცოდეთ, რომ როდესაც მზე ზენიტშია (როცა საკუთარი ჩრდილი ტანზე მოკლეა) - 12-დან 3 საათამდე, მეტი სხივი მოდის და ოზონის შრეში მისი გარდატეხა არ ხდება, ამიტომ, უფრო მეტი დასხივება და დამწვრობა შეიძლება მიიღოთ, კანის ტრავმატიზაციის საფრთხე მეტია.

აუცილებლად უნდა გამოვიყენოთ მზისგან დამცავი საშუალებები, რომლებიც ყველა კანისთვის ინდივიდუალურად უნდა შეირჩეს. 4 ტიპის კანი არსებობს, მნიშვნელობა აქვს თმისა და თვალის ფერსაც. მაგალითად, წითური ადამიანების კანი უფრო მგრძნობიარეა და მაქსიმალურად უნდა დაიცვან.

საერთაშორისო სტანდარტია SPF, რომელიც მზისგან დამცავ ყველა კრემზე უნდა იყოს მითითებული და რაც უფრო მაღალია მისი ნომერი, მით უფრო დიდხანს შეიძლება გარუჯვა (რა თქმა უნდა, არა იმ დროს, როცა მზე ზენიტშია). კრემის გარეშე მზეზე ყოფნა 5 წუთი შეგიძლიათ, თუ SPF10 ნომერს იხმართ - 50 წუთი.

- მსგავსი კრემები თითქოს შედარებით აფერხებს გარუჯვის პროცესს...

- არა, გარუჯვა ყველა შემთხვევაში ხდება, ულტრაიისფერი გამოსხივება მაინც არის. მაგალითად, ზოგს ჰგონია, ქოლგის ქვეშ რომ დაჯდება ან ღრუბლიანი დღეა, `ზაგარს~ ვერ იღებს. ეს მცდარი აზრია.

- მზისგან დამცავი კრემების საკმაოდ დიდი არჩევანია, რას გვირჩევთ, სად შევიძინოთ ისინი და კანისთვის რამდენად მავნეა იაფფასიანი ანალოგები?

- გააჩნია, ფასი ხარისხს უნდა შეესაბამებოდეს. ძვირფასი ბრენდები 100-200 ლარიც კი ღირს, მაგრამ არ არის აუცილებელი, ძალიან ძვირად ღირებული კრემები ვიხმაროთ. აფთიაქებსა და პარფიუმერიულ მაღაზიებში საკმაოდ კარგი ხარისხისა და ხელმისაწვდომი ფასის მქონე სამედიცინო კოსმეტიკაა და ნებისმიერი შესაძლებლობის ადამიანს შეუძლია მათი შეძენა.

- მშრალი და ცხიმიანი კანისთვის განსხვავებულია დამცავი კრემების სახეობა?

- არა, მთავარია SPF ნომერი. თუ მშრალი კანი აქვს ადამიანს, უფრო სპეციფიკური საშუალებები არსებობს. შეიძლება, ჯერ დამატენიანებელი იხმაროს, ზემოდან კი მზისგან დამცავი წაისვას. სპეციალური, ბავშვის ზეთებიც კარგია.

- გამიგონია, რომ დამატენიანებელი კრემის წასმის შემდეგ მზეზე ყოფნას ერიდებიან, რადგან თითქოს ლაქებს აჩენს.

- არა, თუ კანი ამას მოითხოვს, დამატენიანებელი აუცილებელიცაა. თუ ადამიანს საშუალება აქვს, კარგია ორივე - გარუჯვამდე და გარუჯვის შემდგომი კრემი იყიდოს, დამცავთან ერთად. რადგან გამოშრობა მაინც ხდება. ზღვის აბაზანის შემდეგ წყალი უნდა გადაივლოთ და მკვებავი წაისვათ.

სასურველია, წყლიდან ამოსვლისას წვეთები შეიმშრალოთ, რადგან, როგორც გამადიდებელი შუშის ქვეშ, კონცენტრირებული მზის სხივი მხოლოდ ერთ ადგილას ხვდება და შეიძლება, დამწვრობა წარმოიქმნას.

- ზოგიერთი გოგონა გარუჯვას ლუდის ან გაზიანი სასმლის წასმით ცდილობს - ეს კანისთვის საზიანო ხომ არ არის?

- ზიანი არ მოაქვს, მაგრამ არც - სარგებლობა, რადგან დამატენიანებელი ეფექტი არ გააჩნია. ზოგი სტაფილოს წვენს სვამს, მასში კაროტინის შემცველობა მეტია და გარუჯვას აიოლებს. ეს უფრო მისაღებია.

- როდესაც კანი დამწვრობას იღებს ან ბუშტები ჩნდება, როგორ უნდა ვუმკურნალოთ, თუ სპეციალისტთან ვიზიტის საშუალება არ არის?

- როცა ბუშტები ჩნდება, ეს უკვე დამწვრობის ხარისხია და ექიმს უნდა ვუჩვენოთ. ჩვეულებრივ გაწითლებაზე გამაგრილებელი საშუალებები უნდა გამოვიყენოთ, ცივი წყლით დავამუშაოთ, ბევრი სითხე მივიღოთ და ნებისმიერი დამატენიანებელი წავისვათ.

ისე, ჯობია, თავიდან ავიცილოთ, ვიდრე ვუმკურნალოთ. ზოგი მაწონს ისვამს. თუ ქავილის შეგრძნებაა - ანტიჰისტამინურებია საჭირო, ხოლო სითბური დაზიანებისას, მზის დარტყმისას, აუცილებლად ანალგეტიკები უნდა მივიღოთ, მაღალი ტემპერატურის შემთხვევაში, რა თქმა უნდა - სიცხის დამწევები.

- ზოგჯერ დაბინძურებული წყალი კანზე ალერგიასა და გამონაყარს იწვევს. ასეთ შემთხვევაში როგორ უნდა მოვიქცეთ?

- ასეთ დროს ჯობს, წყალს მოვერიდოთ, სახლში მისვლისთანავე დავიბანოთ; თუ კანი ძალიანაა გაღიზიანებული, სპეციალისტს მივმართოთ. როგორც ვიცი, შავ ზღვაზე ეს პრობლემა არ უნდა იყოს, თუმცა ზოგიერთ მდინარეზე - შესაძლებელია. ამას შესაბამისი სამსახურები აკონტროლებენ.

- რა იწვევს გარუჯვის შემდეგ კანზე მოყავისფრო ან თეთრი ლაქების გაჩენას?

- არსებობს ზედაპირული სოკო, რომელიც კანზე ბუნებრივად ბინადრობს. მისი მკურნალობა გარუჯვამდე უნდა მოხდეს: როცა დასხივდება, სხვადასხვა ფერს იღებს. ეს კანის სოკოვანი დაავადებაა, რომელსაც მკურნალობა სჭირდება.

- მკურნალობას იოლად ექვემდებარება?

- დიახ და მერე უკვე გარუჯვა შეიძლება. თუ კანმა დეპიგმენტაცია განიცადა, გამოკვლევაა საჭირო. მაგალითად, ზოგი კონტრაცეპტივებს ან ანტიბიოტიკებს იღებს, ასეთ დროს კი გარუჯვა არ არის რეკომენდებული; ასევე - პლაჟზე გასვლამდე სუნამოს დაპკურება, რადგან ის ლაქად დააჩნდება კანს. თუ ადამიანი ალერგიულია, ერთხელ მაინც მიუღია მზის დარტყმა ან დამწვრობა, სასურველია, კონსულტაცია სპეციალისტთან გაიაროს (არ არის აუცილებელი, ექიმთან, შესაძლოა კოსმეტოლოგი ან აფთიაქში მომუშავე კონსულტანტი იყოს, სამედიცინო განათლებით).

თამთა დადეშელი
































ტექსტის სანახავად გაიარეთ რეგისტრაცია.
Информация
Посетители, находящиеся в группе Гости, не могут оставлять комментарии к данной публикации.