ანა ქურთუბაძე - გვერდით ძალიან კარგი ადამიანი მყავს. 5 წელია, შეყვარებულები ვართ



მსახიობ ანა ქურთუბაძეს თურმე, გაპრანჭვის სურვილი იშვიათად უჩნდება: როგორც გვითხრა, ყოველდღიურად ძირითადად, სპორტული სტილის, მამაკაცის სამოსს იცვამს... თმის დავარცხნა არ უყვარს, მაგრამ იძულებულია, დაივარცხნოს. მოსწონს თავგადასავლები და როგორც მითხრა, ერთხელ, თავგადასავლის საძიებლად წასულს, გურიაში ნათესავებიც კი უპოვია...

მაკიაჟი და სახის კანის მოვლა
- მაკიაჟის გაკეთების სურვილი იშვიათად მიჩნდება და ამიტომაც არის, რომ ზოგჯერ ქორწილშიც უმაკიაჟოდ მივდივარ. სპექტაკლებისა და გადაღებების გამო, გრიმის გაკეთება ისედაც ხშირად მიწევს. სახის კანს ბუნებრივი ნიღბებით ვუვლი და კოსმეტოლოგთან ვიზიტისას, მსუბუქად ვიწმენდ.

- სახის კანის მოსავლელად რომელ ხალხურ მეთოდს იყენებ?
- სიმართლე გითხრათ, სახის კანზე განსაკუთრებული ზრუნვა ჯერ არ მჭირდება, მაგრამ ვიცი, რომ მჭადის ფქვილით "სკრაბის" გაკეთება ძალიან კარგია. ზოგადად, სახის კანის ხალხური მეთოდებით მოვლა უკეთესი გახლავთ, ვიდრე სხვადასხვა კოსმეტიკური ნაწარმით.

ვარცხნილობა და თმის ფერი
- ვარცხნილობას იშვიათად ვიცვლი და მაშინაც, თმას ნაწილობრივ ვიწევ. ყოველთვის მინდოდა, მოკლე ვარცხნილობა მქონოდა, მაგრამ ვიცი, ეს რომ გავაკეთო, თმის ვარცხნა დამტანჯავს. ჰოდა, ამიტომაც, მხოლოდ ოდნავ ვიმოკლებ ხოლმე, ისიც - საკუთარი ხელით.

- ასე მგონია, ბავშვობაში თმის დავარცხნა არ გიყვარდა...
- (იცინის) სიმართლე გითხრა, თმის დავარცხნა არც ახლა მიყვარს, მაგრამ თავის დაბანის დროს იძულებული ვარ, დავივარცხნო... რაც შეეხება თმის შეღებვას, პირველად შავად შევიღებე. მაშინ დაახლოებთ, 18 წლის ვიყავი, მაგრამ ოცდაათისას დავემსგავსე, - ანუ შავმა თმამ ასაკი "მომიმატა"... ახლა მთლიანად არ ვიღებავ - ვიჭრელებ. ისე, ბუნებრივადაც მოწითალო თმა მაქვს.

- კულულებს არ ისწორებ ხოლმე?
- მხოლოდ ორჯერ გავისწორე, ისიც - ბავშვობაში. მახსოვს, სტილისტს ჩემი თმის გასწორების სურვილი არ ჰქონდა, მაგრამ იძულებული იყო, ჩემს თხოვნას დამორჩილებოდა. საქმეს საათ-ნახევარში მორჩა (იღიმის). სალონიდან გამოსვლის შემდეგ, სულ რაღაც ერთ საათში თმა ცოტათი "გამეპუწა".

ვარჯიში და დიეტა
- ერთი პერიოდი იოგაზე დავდიოდი. ახლა, როცა თავისუფალი დრო მაქვს, შინ ვვარჯიშობ... დიეტაზე ერთადერთხელ ვიყავი. მაშინ დაახლოებით, 5 კილოგრამით მეტს ვიწონიდი, ვიდრე - ახლა და ეს კატასტროფა მეგონა! ჩემი წონა ძალიან მაწუხებდა. მარტივი დიეტა დავიცავი, შედეგად კი 4 კილო დავიკელი და ბედნიერი ვიყავი! საერთოდ, გემრიელად ჭამა მიყვარს, მაგრამ ეს წონასთან დაკავშირებულ პრობლემებს არ მიქმნის, პირიქით - ახლა ვცდილობ, 2 კილო მაინც მოვიმატო და გაძლიერებულად ვიკვებები. მიმაჩნია, რომ ჩემი პროფესიის ადამიანისთვის სიგამხდრე კარგია, რადგან სცენაზე ბევრად მსუბუქად მოძრაობ, ყველაფერს მარტივად აკეთებ...

სამოსი
- შოპინგი ძალიან მიყვარს. როცა დრო და საშუალება მაქვს, შემიძლია, ამ პროცესს 24 საათი დავუთმო. მირჩევნია, მაღაზიებში მარტომ ვიარო, რათა მეგობრები არ დავღალო, მაგრამ ზოგჯერ ეგოისტი ვხდები და "საშოპინგოდ" ვიღაც მაინც მიმყავს.

- სამოსის შერჩევსას, გოგონების გემოვნებას უფრო ენდობი თუ ბიჭებისას?
- მამაკაცების გემოვნებას ვენდობი, რადგან გოგონების უმეტესობას "გაპრანჭული" რაღაცები მოსწონს. ინტერნეტშოპინგიც ძალიან მიყვარს: რაღაცებს გამოვიწერ ხოლმე და მერე ერთი სული მაქვს,

როდის ჩამომივა.

სერიალში ჩემს გმირს - თეკლას ჩაცმის სტილით ნამდვილად არ ვგავარ. მას ცოტა არ იყოს ბავშვურად, დაუხვეწავად აცვია, მაგრამ ამით იმას კი არ ვამბობ, რომ ჩვენი მხატვარი, ვინც სერიალის მსახიობებს გვაცმევს, დახვეწილი არ არის. უბრალოდ, პერსონაჟს უხდება ასეთი ჩაცმულობა.

- სამოსთან (და არა მხოლოდ) დაკავშირებით, თეკლას მამამისი - ბატონი ნერსე ბევრ რამეში ზღუდავს. შენს ცხოვრებაში თუ არის ვინმე, ვინც მსგავს რაღაცებს გიკრძალავს?
- არავინ არაფერს მიკრძალავს და არც ის მგონია, რომ ვინმე მოახერხებს და მომავალში ამიკრძალავს რაღაცის ჩაცმას ან გაკეთებას...

ჩანთები და ფეხსაცმელები
- ქუსლიანი ფეხსაცმელი არ მიყვარს. რამდენჯერმე დამჭირდა და ჩავიცვი, მაგრამ ლამის, კისერი მოვიტეხე...

ამას წინათ, გარდერობში ბებიას ჩანთებს მივაგენი. ერთ-ერთი განსაკუთრებულად მომწონს. ძალიან ძველია, მაგრამ ხარისხიანი აღმოჩნდა: უკვე 5 წელია, ვიყენებ.

აქსესუარები და სამკაული
- საათი და რამდენიმე ბეჭედი მხოლოდ ღამით და ბანაობისას არ მიკეთია. ერთი თმის სამაგრი მაქვს, რომელსაც მხოლოდ სპექტაკლში - "მუსიკის ჰანგები" ვიკეთებ ხოლმე. სხვათა შორის, ეს აქსესუარი იღბლიანი აღმოჩნდა...

პირსინგი
- წარბთან პირსინგი ახლახან გავიკეთე. რატომ? - ერთ დღეს გავიღვიძე, პირსინგის გაკეთება მომინდა, სალონში წავედი და სურვილი ავიხდინე.

- ოჯახის წევრებს როგორი რეაქცია ჰქონდათ?
- ცუდი რეაქცია არ ჰქონიათ, პირიქით - ძალიან მოეწონათ... სიმართლე გითხრათ, მგონია, რომ მალე მომბეზრდება. თუ ასე მოხდება, მოვიხსნი.

- ყურები გახვრეტილი გაქვს?
- კი, მაგრამ ალბათ, უკვე შემიხორცდა - 5 თვეა, საყურე არ გამიკეთებია.

- სხეულზე ტატუ გაქვს?
- არა, მაგრამ მინდა, რაიმე დავიხატო. უაზრო ტატუს ვერ გავიკეთებ.

საქმე
- დაახლოებით 3 წელია, რაც მუსიკისა და დრამის თეატრის მსახიობი ვარ. იქ შემთხვევით მოვხვდი, რაც აჩიკო სოლოღაშვილისა და გიორგი ვარდოსანიძის დამსახურება გახლავთ: მოგეხსენებათ, აჩიკო მსახიობიც არის და ქორეოგრაფიც. მას ქორეოგრაფიულ "ნახაზში" გოგონა დასჭირდა. გიორგი ვარდოსანიძე ჩემი ჯგუფელი იყო და აჩიკოს ჩემ შესახებ უთხრა... როგორ ბანალურადაც უნდა ჟღერდეს, ჩემთვის თეატრი მეორე სახლი გახლავთ. დასის წევრები ძალიან საყვარლები არიან. ისინი ჯერ კიდევ მესამე კურსის სტუდენტ, შეშინებულ გოგონას გვერდში დამიდგნენ...

ჩემთვის სერიალში თამაშიც მნიშვნელოვანი გახლავთ. ეკრანი პოპულარობაში მეხმარება. სულ ვცდილობ, სერიალში ჩემს პერსონაჟს - თეკლას რაღაც ახალი შევმატო, "გავაცოცხლო"...

- თამამ სცენებში მონაწილეობას რა შემთხვევაში მიიღებ?
- თუკი სცენარი მოითხოვს, თამამ სცენაში მონაწილეობაზე უარს არ ვიტყვი, მაგრამ თუ ამას მხოლოდ იმიტომ აკეთებენ, რომ ფილმში უბრალოდ, ასეთი სცენა იყოს - შემოთავაზებას არ დავთანხმდები. მოკლედ, სცენარს, რეჟისორს, დამოკიდებულებას გააჩნია...

ოჯახი
- შინ რომ მივდივარ, ოჯახის წევრებს უკვე სძინავთ. ძირითადად, მათ შაბათ-კვირას ვნახულობ. მამა ცოცხალი აღარ მყავს. შინ მე და დედა ვცხოვრობთ. ბიძაჩემიც ჩვენთან არის ხოლმე. დედა მათემატიკოსი გახლავთ. მსახიობობა უნდოდა და სულ ნანობდა, რომ ეს პროფესია არ აირჩია. ბედნიერია, რომ თეატრალურ უნივერსიტეტში ჩავაბარე. ჩემი და 36 წლისაა და 3 შვილი ჰყავს. 7 წლის ვიყავი, როცა დეიდა გავხდი. ჩემი პირველი დისშვილი ფაქტობრივად, ჩემს ხელში გაიზარდა. გიორგი ახლა 17 წლის გახლავთ. მის ბოხ ხმას და წვერს ვერ ვეგუები, რადგან ისევ პატარა მგონია (იღიმის). მეორე დისშვილთან - 15 წლის მარიამთან ასაკობრივი ბარიერი არ მაქვს: შემიძლია დავურეკო და მასთან ერთად გავისეირნო, ნებისმიერ თემაზე ვესაუბრო... უმცროსი დისშვილი ჯერ მხოლოდ 1 წლის არის... ზოგადად, ბავშვებთან ურთიერთობა მომწონს. თამაშისას მგონი, მათზე უკეთ მე ვერთობი ხოლმე.

ჩემს პირად ცხოვრებას რაც შეეხება, გვერდით ძალიან კარგი ადამიანი მყავს. 5 წელია, შეყვარებულები ვართ...

გართობა
- თავისუფალ დროს მეგობართან - ირაკლი ძნელაძესთან ვატარებ. ხშირად, კლუბში მივდივართ, სადაც მე ცოტას ვსვამ, ირაკლი - არა, მერე ვცეკვავთ...

- შენი შეყვარებული ირაკლიზე არ ეჭვიანობს?
- არა. ჯერ ერთი, ჩემი შეყვარებული ეჭვიანი არ არის და მეორეც - ის და ირაკლი მეგობრები არიან.


































ტექსტის სანახავად გაიარეთ რეგისტრაცია.
Информация
Посетители, находящиеся в группе Гости, не могут оставлять комментарии к данной публикации.