იმისათვის რომ რუჯი დიდხანს შევინარჩუნოთ



რა უნდა ვიცოდეთ გარუჯვის შესახებ

ზაფხული ყველასათვის საყვარელი პერიოდია გარუჯვისათვის. სანამ მზის აბაზანის მისაღებად გაეშურებით, აუცილებლად უნდა იცოდეთ კანის ტიპი და მდგომარეობა, რადგან გარუჯვის შედეგად, ხშირად დამწვრობა და კანის პრობლემები იჩენენ თავს. გარუჯვამდე აუცილებელია კარგი პილინგი, რათა რუჯი თანაბარი იყოს − შეგიძლიათ სახლშიც გააკეთოთ სხეულის სკრაბის გამოყენებით. აუცილებელია, მოვერიდოთ შუადღის მზეს და დავკმაყოფილდეთ დილას და საღამოს მიღებული რუჯით. გარუჯვის დროს მიიღეთ ბევრი სითხე – განსაკუთრებით კარგია სტაფილოსა და გარგრის წვენები, რომლებიც ორგანიზმს კაროტინით ამდიდრებენ. სანაპიროზე წასვლის წინ, ჩანთაში სპეციალური კოსმეტიკა იქონიეთ, რომელიც განკუთვნილია რუჯისათვის. თუ თქვენ ნამდვილად გინდათ, რომ გქონდეთ ლამაზი რუჯი, დაიცავით ეს ინსტრუქციები.

კოსმეტიკური საშუალებები რუჯისათვის (კრემი, გელი, ლოსიონი, სპრეი, ემულსია, რძე):

* მზისგან დამცავი;
* რუჯის მისაღები;
* რუჯის მიღების შემდგომ.
* ნუ შეგეშინდებათ წარწერის − „მზისგან დამცავი საშუალება“, − ის ორგანიზმს ულტრაიისფერი გამოსხივების საწინააღმდეგოდ ბუნებრივი დაცვის გამომუშავებაში ეხმარება. კოსმეტიკური საშუალების შერჩევისას, დააკვირდით დამცავი ფაქტორის სიდიდეს (SPF), რაც უფრო ღია ფერისაა კანი, SPF უფრო მაღალი უნდა იყოს. დამცავი საშუალება სახლიდან გასვლის წინ და წყლიდან ამოსვლის შემდეგ ყოველ ჯერზე წაისვით.

ექიმი გირჩევთ
გადაცემაში „შუადღე MED FM-ზე“, დერმატო-კოსმეტოლოგმა ია დარსაველიძემ იმ დეტალებზე ისაუბრა, რომლებიც რუჯის მიღების დროს უნდა გავითვალისწინოთ. „თუ გვინდა კარგი რუჯი, მზის აბაზანები უნდა მივიღოთ დილის 08:00-დან 10:30-მდე, ასევე საღამოს, მაგრამ არაფრით შეიძლება შუადღის მზეზე ყოფნა. ბევრი ონკოლოგიური დაავადება იჩენს ხოლმე თავს, განსაკუთრებით სიმსივნეები, პიგმენტაციის განვითარება, დამწვრობები და ა.შ.“

ია დარსაველიძემ კოსმეტიკურ საშუალებებზეც ისაუბრა. „აუცილებლად უნდა გამოვიყენოთ მზისგან დამცავი კოსმეტიკური საშუალება, რადგან ის უარყოფით მზის გამოსხივებას ბლოკავს, ამიტომ SPF ფაქტორი მინიმუმ 30-ზე მაღალი უნდა იყოს. ბავშვების შემთხვევაში უფრო მაღალი დამცავი ფაქტორის საშუალება, 50+ უნდა გამოვიყენოთ. პაციენტებს ეშინიათ, რომ SPF 50-ის მოხმარებისას ვერ გაირუჯებიან, მაგრამ პირიქით, უფრო ლამაზი რუჯი ექნებათ. ასეთი ნამზეური უფრო დიდხანს ინარჩუნებს ფერს, ვიდრე ერთ დღეში მიღებული, რასაც კანის დამწვრობა და აქერცვლა მოჰყვება. თუ უკვე დაიწვით და კანი აგძვრათ, რაღაც პერიოდი მზეზე არ გახვიდეთ, შემდეგ გამოიყენეთ დამცავი საშუალება“.

ქალბატონ იას, ლეღვის ფოთლის ნახარშზეც ვკითხეთ, რომელიც ძალიან დიდი პოპულარობით სარგებლობს. „ამ საშუალების გამოყენება ისეთ სავალალო შედეგებს გამოიწვევს, რომელსაც ხანგრძლივი მკურნალობა დასჭირდება და შესაძლებელია კანი აღარ აღდგეს“.

დერმატოლოგმა აკნეზეც ისაუბრა: „ბევრი პაციენტი მეუბნება, რომ აკნეს დროს, როდესაც არის პოსტულები, ჩირქოვანი გამონაყარი, მზის აბაზანები მშველისო. ეს არის ალოგიკური. აკნეს დროს ცხიმოვანი ჯირკვლების გააქტიურება, ჭარბი რაოდენობით ცხიმის გამოყოფა და კანზე არსებული ოქროსფერი სტაფილოკოკის გამძვინვარება ხდება. მზეზე არაჩვეულებრივი პირობები იქმნება ცხიმის ჯირკვლების სეკრეციისათვის“.

მგრძნობიარე და პრობლემური კანი
როდესაც კანი მზის სხივების მიმართ მგრძნობიარეა და ადამიანს მზეზე ალერგია აქვს, დაუშვებელია მზის აბაზანების მიღება, რადგან ეს გამოიწვევს სიწითლეს, გიპერემიას, ქავილს და ა.შ. ასეთ დროს უნდა მოთავსდეთ ე.წ. ქოლგის ქვეშ.

ავტ. თამთა კოპლატაძე

medfm.ge
































ტექსტის სანახავად გაიარეთ რეგისტრაცია.
Информация
Посетители, находящиеся в группе Гости, не могут оставлять комментарии к данной публикации.