7 ჩვევა, რომელიც გახდომაში გვიშლის ხელს



რას აღარ აკეთებთ, ყველაფერს ცდილობთ, სავარჯიშოდ დადიხართ, სხვადასხვა დიეტაც სცადეთ, მაგრამ ზედმეტი კილოგრამები მაინც არ გემშვიდობებიან! გამოდის, რომ რაღაცას არასწორად აკეთებთ.

უძილობა
ეს N1 მავნე ჩვევაა! თანამედროვე ცხოვრების რეჟიმში, სრულყოფილი 8-საათიანი ძილით თავის განებივრება თითქმის შეუძლებელია. დიდი ქალაქის მაცხოვრებლები ძილს 6 საათზე ნაკლებს უთმობენ, რაც, ექიმების თქმით, დაუშვებელია. მაშინ, როდესაც ორგანიზმს დასვენებაზე უარს ვეუბნებით და ამის მიზეზად საქმეს, სწავლას ან მეგობრებთან ერთად გართობას ვასახელებთ, თურმე, ვასუსტებთ ჩვენს იმუნურ სისტემას, ვანელებთ ნივთიერებათა ცვლის პროცესებს, ხელს ვუშლით თავის მოვლისათვის საჭირო პროცედურებს და, გარდა ამისა, მუდმივ შიმშილს ვუწევთ პროვოცირებას. ეს იმიტომ, რომ თუ ორგანიზმს ძილი არ ჰყოფნის, დანაკლისს სხვადასხვა საკვებით ინაზღაურებს. შედეგი კი ზედმეტი კილოგრამები, ცუდი განწყობა და ქრონიკული დაღლილობაა. ასე რომ, სანამ დიეტას დაიწყებთ ან სავარჯიშოდ გაეშურებით, ძილი უნდა მოიწესრიგოთ! სხვაგვარად, ყველა თქვენი მცდელობა უშედეგოდ იქნება.

უცხიმო პროდუქცია
მაშინ, როცა ჯანსაღად კვების საკითხი დგება, ადამიანთა უმეტესობა ნიჭიერი მარკეტერების მახეში ებმება და უცხიმო იოგურტს, ყველს, ხილის წვენს, უგლუტენო მაფინებსა და მსგავს პროდუქტებს ყიდულობს. გადის რამდენიმე კვირა და დიეტაზე მყოფები ამჩნევენ, რომ წვალება უშედეგოა. შემადგენლობის წაკითხვის შემდეგ კი ხვდებიან, რომ იოგურტში არსებული შაქრის რაოდენობა იმაზე მეტიც კი იყო, ვიდრე ნაყინში იქნებოდა! აქედან გამომდინარე, როდესაც ჯანსაღად კვებას გადაწყვეტთ, გაითვალისწინეთ, რომ „უცხიმო“ მხოლოდ და მხოლოდ მარკეტინგულად გათვლილი სიტყვაა და, რეალურად, უცხიმო კი არა, ჯანსაღი საკვები გჭირდებათ.

საუზმეზე უარის თქმა
ჯანსაღი საუზმე ჯანმრთელობის საწინდარია! მათ, ვისაც გახდომა გსურთ, დილით ჭამაზე უარის თქმას უნდა გადაეჩვიოთ! როცა საუზმეს არ მიირთმევთ, ორგანიზმი ნელა ფხიზლდება. ასეთივე ნელა მიმდინარეობს ნივთიერებათა ცვლა. სადილისთვის კი შიმშილი გაორმაგებულად გიტევთ, რაც არა მხოლოდ დიეტისთვის, არამედ, ზოგადად, ჯანმრთელობისთვისაც საზიანოა. ჩაატარეთ ექსპერიმენტი — ყოველდღიურად ისაუზმეთ და ნახავთ, როგორ მოგემატებათ ენერგია და როგორ გაგიადვილდებათ დიეტის დაცვა.

საყვარელი საჭმლით თავის დაჯილდოება
ამ ჩვევას აუცილებლად უნდა შეებრძოლოთ! ხშირად იმიტომ კი არ ჭამთ, რომ გშიათ, არამედ იმიტომ, რომ დაძაბული დღის, ბევრი საქმის, არასასიამოვნო ემოციებისა თუ დადებითი შეგრძნებების შემდეგ, საკუთარი თავის საყვარელი ნუგბარით დაჯილდოება გინდებათ. ანდა, მეორე დღისთვის ბევრი სასწავლი გაქვთ და მადას ამით ამართლებთ. ამგვარად, ჭამა საჭიროება კი არა, ჩვევა ხდება. ამიტომ, გადაეჩვიეთ „დამსახურებულ“ ნაყინებსა და შოკოლადებს! მხოლოდ ასე თუ მოახერხებთ, დიეტა ეფექტური გახადოთ.

ტელევიზორის ან კომპიუტერის წინ ჭამა
თუნდაც, ეს მობილური ტელეფონი იყოს, ან გაზეთების კითხვა... საქმე იმაშია, რომ მაშინ, როცა ჭამის პარალელურად რაიმეს ვკითხულობთ ან ვუყურებთ, ვჭამთ 20-30%-ით იმაზე მეტს, ვიდრე ჩვეულებრივ შევჭამდით. ასეთ დროს საკვების მიღება მექანიკურ ხასიათს იღებს და გემოს შეგრძნებაც კი გვეკარგება. ამ ჩვევის დასავიწყებლად, თითოეული საუზმე, სადილი და ვახშამი სასიამოვნო რიტუალად უნდა ვაქციოთ და მთელი ყურადღება საკვებზე გადავიტანოთ: მოვამზადოთ, თეფშზე ზომიერი რაოდენობა მოვათავსოთ და ნელა მივირთვათ, ყოველგვარი ტელევიზორისა და კომპიუტერის ყურების გარეშე.

წყლის სიმცირე
ზოგს ჰგონია, რომ დღის განმავლობაში მიღებული ყველანაირი სითხე წყლის მოვალეობას ასრულებს. არადა, წვენი, გაზიანი სასმელები, ყავა და ჩაი ვერასოდეს შეცვლის ერთ ჭიქა წყალსაც კი! ამიტომ, სავალდებულოა დღეში 8 ჭიქა წყლის დალევა იმისათვის, რომ ორგანიზმმა სწორად იმუშაოს და შიმშილის შეგრძნებაც დააბალანსოს.

მკაცრი დიეტები
ბურღულეულის დიეტა, სუპის დიეტა, მაწვნის დიეტა, საზამთროს დიეტა... სია უსასრულოდ გრძელდება! რამდენმა და როგორმა ექიმმაც არ უნდა თქვას, რომ ასეთი დიეტები მავნებელია, უამრავი ქალბატონი მაინც არღვევს ნორმალური კვების რეჟიმს და არანორმალურ რაციონზე გადადის! არადა, შედეგი ყოველთვის ერთნაირია — დაკლებული კილოგრამები ორმაგი რაოდენობით ბრუნდება! ასე რომ, დაივიწყეთ ინტერნეტში ნაპოვნი დიეტები. უბრალოდ, იკვებეთ ჯანსაღი პროდუქტით, დააბალანსეთ რეჟიმი და ივარჯიშეთ — შედეგი გაცილებით უფრო ეფექტური იქნება!

okmagazine.ge
































ტექსტის სანახავად გაიარეთ რეგისტრაცია.
Информация
Посетители, находящиеся в группе Гости, не могут оставлять комментарии к данной публикации.