კორვალოლის, ვალოკორდინისა და ვალიდოლის რეგულარულად მიღება სიკვდილს იწვევს!



"კორვალოლი - კომპლექსური სამკურნალო საშუალება, მის შემადგენლობაში წამყვანი ადგილი უკავია ფენობარბიტალის. ფარმაკოლოგიური თვისება: ფენობარბიტალი იწვევს დამამშვიდებელ, ტრანკვილიზურ ან საძილე ეფექტს. გვერდითი მოვლენები: კორვალოლი, როგორც წესი, კარგად გადაიტანება ხანგრძლივად გამოყენების შემთხვევაშიც კი.
ვალოკორდინი - წარმოადგენს აქტიური ნივთიერებების კომბინაციას, რომლის შემადგენლობაშიც ერთ-ერთ კომპონენტად შედის ფენობარბიტალი. გააჩნია სედატიური, საძილე ეფექტი. ვალოკორდინი დამაწყნარებლად მოქმედებს მომატებული აგზნების, შიშის, ნერვიულობის, გაუწონასწორებელი მდგომარეობისა და მოუსვენრობის დროს. ვალოკორდინის ხანგრძლივი გამოყენებისას ვითარდება პრეპარატის მიმართ დამოკიდებულების განვითარების საფრთხე".

თუ რატომ გამოვიტანეთ დასაწყისში ამ პრეპარატების ანოტაცია, ამას სულ მალე წაიკითხავთ. "კვირის ქრონიკას" სენსაციური ინფორმაცია მიაწოდა მომხმარებელთა და პაციენტთა უფლებების დაცვის ასოციაციის თავმჯდომარე ნანა სანაიამ.

- საუბარი გვექნება საკმაოდ მნიშვნელოვან თემაზე. საქმე ისაა, რომ გულის სამკურნალო საშუალება, როგორიცაა ვალოკორდინი, კორვალოლი და გარკვეული თვალსაზრისით ვალიდოლიც, რომელებიც თავისუფალ გაყიდვაშია საქართველოში და იყიდება ურეცეპტოდ, აღმოჩნდა, რომ უკვე დიდი ხანია, აკრძალულია მთელ მსოფლიოში.

- აკრძალულია? რას მეუბნებით, დედაჩემია მუდმივი მომხმარებელი!

- ახლავე აგიხსნით, რა ხდება: ეს პრეპარატები შეიცავს ნარკოტიკს, ესაა ფენობარბიტალი და აღმოჩნდა, რომ ამ პრეპარატების მიღების შემთხვევაში ადამიანი კი არ იკურნება, არამედ ეს მედიკამენტები იწვევს ძილიანობას და პრეპარატების მიღების დროს შეიძლება დაგემართოთ ინსულტი, ინფარქტი ან გულის უკმარისობა და შესაძლებელია ადამიანი ჩავარდეს შოკში.

- ამ წუთას მე ვარ შოკში, კარგად ამიხსენით, რა ხდება?

- შეიძლება ადამიანს ჰქონდეს გულის პრობლემები, მიიღოს ეს სამი პრეპარატი და მოხდეს შემდეგი რამ: ამ წამლებში შემავალ ბარბიტალს აქვს ძილიანობის ეფექტი და სწორედ ამ ძილიანობის დროს, მარტივად რომ ვთქვათ, პაციენტი შეიძლება, გაიპაროს. სწორედ ამ ფაქტის გათვალისწინების გამო სულ ახლახან ლიტვამ არათუ აკრძალა საკუთარ ტერიტორიაზე ამ სამი პრეპარატის გამოყენება, არამედ სისხლის სამართლის პასუხისმგებლობა დაეკისრება ადამიანს, რომელსაც აღმოუჩენენ მფლობელობაში კორვალოლს, ვალოკორდინსა და ვალიდოლს. რადგანაც ეს გათანაბრებულია ნარკოტიკების გამოყენებასთან. საბაჟოს შემთხვევაში კი ტერიტორიაზე ნარკოტიკის შეტანა დაფიქსირდება და შესაბამისი სასჯელი დაეკისრება. რაც შეეხება ამერიკის შეერთებულ შტატებს, კერძოდ, მაიამის შტატში, ამ ფენობარბიტალის გამოყენებაზე უმკაცრესი სასჯელია.

- ეს როდის გაირკვა?

- აღმოჩნდა, რომ ათ წელზე მეტია, რაც ეს შეზღუდვა არსებობს, მაგრამ არც ყოფილ საბჭოთა კავშირში და არც შემდგომში ამ ფაქტისთვის ყურადღება არავის მიუქცევია. უფრო მეტიც: ამ ცოტა ხნის წინათ რუსეთის საზოგადოებრივ არხზე გავიდა რამდენიმე სენსაციური გადაცემა, სადაც წამყვანი კარდიოლოგების მიერ პირდაპირ დაიდო შემდეგი დასკვნა, რომ საბჭოთა კავშირში მიუხედავად იმისა, რომ მუდმივად უფასო იყო სამედიცინო დახმარება და მკურნალობა, ზოგადად, გულ-სისხლძარღვთა დაავადება და მასთან დაკავშირებული სიკვდილიანობა იყო მსოფლიოში ერთ-ერთი მაღალი და ეს სიკვდილიანობა გამოწვეული იყო სწორედ კორვალოლის, ვალოკორდინისა და ვალიდოლის ჭარბი მოხმარების გამო.

- კი, მაგრამ ჩვენ ეს ფაქტი რატომ თავის დროზე არ ვიცოდით და ახლაც რატომ არავინ გვითხრა?

- ვერ გეტყვით, ამ დროს შემადგენლობაში მითითებულია პირდაპირ ფენობარბიტალი, მსუბუქი ნარკოტიკი.

- არც მაგ ნივთიერების სახელი მეუბნება მე, როგორც მომხმარებელს, არაფერს.

- ცხადია, თქვენ არ იცით, მაგრამ ამ დროს ნებისმიერმა ნარკოლოგმა იცის, რომ ეს ნივთიერება მიეკუთვნება ბარბიტურატების ჯგუფს და მსუბუქი ტიპის ნარკოტიკს, რომლის ხშირი მიღება იწვევს მასზე დამოკიდებულებას. ის ადამიანები, რომლებსაც გულ-სისხლძარღვთა დაავადებები აქვთ, ხშირად რატომ იღებენ იგივე კორვალოლს? იმიტომ, რომ უკვე დამოკიდებულები ხდებიან ფენობარბიტალის მიმართ.

(აქ ინტერვიუს დროებით ვწყვეტთ და ფენობარბიტალის აღწერილობას გთავაზობთ: ბარბიტურატების ჯგუფი, საძილე და სედატიური საშუალება. გვერდითი მოვლენები: ძილიანობა, ლეთარგია, დეპრესია, ჰიპერკინეზი ბავშვებში, ანემია. ხანგრძლივმა მიღებამ შეიძლება გამოიწვიოს წამლისმიერი დამოკიდებულების განვითარება.)

- ანუ, ვიღებთ პრეპარატებს, რომლებიც არ კურნავს?


- რა თქმა უნდა, არ კურნავს, მაგრამ ნახეთ, რა ხდება: მაგალითად, ავადმყოფს აქვს უძლიერესი ტკივილი კუჭისა და მიმდინარეობს სისხლდენაც და ამ დროს მან მიიღო ნივთიერება ოპიუმი, ტკივილი მოეხსენება, მაგრამ ადამიანი შეიძლება, სისხლდენიდან დაიღუპოს! მაგრამ საინტერესოა, ექიმები რატომ უნიშნავენ ამ შემთხვევაში ამ პრეპარატებს? ეს არის ძალიან მნიშვნელოვანი თემა: რატომ? როცა ეს ინფორმაცია აბსოლუტურად ყველა საიტზეა და, მით უმეტეს, თუ ჩვენ ევროპისკენ გვინდა ნაბიჯების გადადგმა, ევროპაში ეს მედიკამენტები სრულიად ამოღებულია და მეტიც: კატეგორიულად აკრძალული და ჩვენთან რატომ ხდება ამათი ასე თავისუფლად გაყიდვა აფთიაქებში? გაუგებარია! ეს სამივე პრეპარატი ლამის 50 წელია, რაც ჩვენს ქვეყანაში გამოიყენება, მაგრამ აქვე გეტყვით, რომ 1952 წლამდე საბჭოთა კავშირში ოპიუმიც იყიდებოდა აფთიაქში. ანუ ოპიუმი მოიხსნა და ეს პრეპარატები დარჩა. დღეს უკვე რუსეთშია საკმაოდ დიდი გამოსვლები, სადაც ხალხი მოითხოვს ამ წამლების აკრძალვას.

- ამ პრეპარატებს აქვს ანალოგები? არის სხვა ეფექტური და ხელმისაწვდომი საგულე პრეპარატები?

- რა თქმა უნდა, თან უამრავი და იმ პირობით, რომ მათში არ იქნება ფენობარბიტალი! ასეთი უამრავია, მათ შორის ბუნებრივი, მცენარეული წარმოშობის საშუალებებიც და ქიმიური პრეპარატებიც. ანუ თქვენ აუცილებლად უნდა დააკვირდეთ წამლის შემადგენლობას.

- კი, მაგრამ ეგ ფენობარბიტალი ხომ უმნიშვნელო დოზითაა წარმოდგენილი ამ საგულე წამლებში და მაინც ასე საშიშია?

- ეს უმნიშვნელო დოზა სისტემატური მიღებით უკვე მნიშვნელოვან დამოკიდებულებას იწვევს. ამ დროს სამივე საშუალება ყველანაირად ხელმისაწვდომია, იაფია, ურეცეპტოა და უამრავია. მაგრამ მანდ კიდევ ერთი რამაა საინტერესო: რატომ გახდა კორვალოლი ნომერ პირველი გაყიდვადი პრეპარატი? რატომ და მთელი ჩვენი ბებიებისა და ბაბუების თაობა, პრაქტიკულად ნარკოდამოკიდებული გახდა!!! ამ დროს კარდიოლოგები აცხადებენ, რომ ამ წამალს არავითარი საგულე ეფექტი არ გააჩნია რეალურად და არ არის გულის სამკურნალო საშუალება! რუსეთი აპირებს მასიურად ამოიღოს ეს პრეპარატები წარმოებიდან, ამაზე მიდის დისკუსიები და იქ სულ მალე აიკრძალება კიდეც, როგორც ყველა დანარჩენ ქვეყანაში.

- ვიმეორებ, საქართველოში რატომ არ ვიცით ამის შესახებ?

- მიზეზი ისაა, რომ ყოველდღიური გაყიდვების რიცხვით ერთ-ერთ პირველ ადგილს, სავარაუდოდ, კორვალოლი დაიკავებს და ხელს აძლევს ფარმაკოლოგიურ კომპანიებს მისი აკრძალვა? ვალიდოლიც ასევე პირველ ადგილზეა, ამ დროს ვალიდოლის ეფექტი პიტნის კამფეტითაც შეიძლება, მიიღოთ! მაგრამ იმდენად ვართ ამაზე დამოკიდებულები, რომ აქ უკვე ფსიქოლოგიური მომენტია: გვეჩვენება, რომ იმ ეფექტს მხოლოდ ვალიდოლი მოგვცემს! სხვათა შორის, რუსეთის არხზე გასულ ინფორმაციას თუ ნახავთ, იქ პირდაპირ გამზადებული სიუჟეტებია და წამყვანი ფარმაცევტები, მათ შორის რუსეთის ფარმაწარმოების თავმჯდომარეც, აცხადებს, რომ ვალიდოლის ეფექტი იგივეა, რაც საღეჭი რეზინის ეფექტი, მეტი არაფერი, ამ დროს კევი არ შეიცავს მსუბუქ ნარკოტიკს! არსებობს პრეპარატი ნიტროგლიცერინი, რომელიც ნამდვილად ხსნის სტენოკარდიულ შეტევებს და ადამიანი შეიძლება ნიტროგლიცერინმა ინფარქტისგან იხსნას და არა ამ სამეულმა. ერთჯერადად დიდი სიფრთხილით შეიძლება გამოვიყენოთ კორვალოლი, მაგრამ დიდი სიფრთხილით, რადგანაც ის 30 წვეთი იწვევს ძილს და ვიმეორებ, ამ ძილიანობის შემთხვევაში მაინც მიდის გულის პათოლოგია. მაგრამ აქვე უნდა განვაცხადო, რომ მე კარდიოლოგი არ გახლავართ, მე მხოლოდ მომხმარებლის უფლებებს ვიცავ და ვამბობ იმ ფაქტებს, რაც ცნობილი გახდა.

ამის შემდეგ ვცადეთ, დავკავშირებოდით ჯანდაცვის სამინისტროს სამედიცინო საქმიანობის სახელმწიფო რეგულირების სააგენტოს წარმომადგენლებს, რათა გვეკითხა, რა ხდება საქართველოში ამ სამი პრეპარატთან დაკავშირებით, მაგრამ, სამწუხაროდ, ვერ დავუკავშირდით. ამის შემდეგ დავურეკეთ ნარკოლოგ გელა ლეჟავას კითხვით, ამ ზემოხსენებული წამლების შემადგენლობაში შესული ფენობარბიტალი რამდენად არის საშიში ორგანიზმისთვის.

- სიმართლე გითხრათ, ასე ზეპირად ვერ გეტყვით. ნებისმიერი პრეპარატი დამოკიდებულია დოზაზე, ანუ შესაძლებელია, ან ათი გრამი კლავდეს, ან - ნოლ ერთი გრამი. საგულე საშუალება ეს ნივთიერება არ არის და ვიღაცამ შეიძლება გამოიყენოს ნარკოტიკად, თუ დალევს ბევრს.

- ჩვენ გვითხრეს, რომ ეს სამი პრეპარატი მსოფლიოს ბევრ ქვეყანაში სააფთიაქო ქსელიდან ამოღებულია და რუსეთში ახლა მიდის კამპანია ამ სამი პრეპარატის ამოსაღებადო.
- მესმის, მაგრამ მე კარდიოლოგი არ ვარ, ნივთიერებების მონაცემები კი უნდა იყოს განხილული ერთიანობაში...

საინტერესოა ამ საკითხზე სპეციალისტების კვალიფიციური აზრის მოსმენა. თემა იმდენად მნიშვნელოვანია და ამ სამი პრეპარატის მომხმარებელი ჩვენთან იმდენად ბევრია, რომ "ქრონიკა" ამ საკითხს მომდევნო კვირაშიც დაუბრუნდება...

alia.ge
































ტექსტის სანახავად გაიარეთ რეგისტრაცია.
Информация
Посетители, находящиеся в группе Гости, не могут оставлять комментарии к данной публикации.