დედის რძე: გამაოგნებელი უცნობი ფაქტები სუპერსაკვების შესახებ



ყველა ჩვენგანმა იცის, რაოდენ სასარგებლოა დედის რძე ბავშვისთვის, მაგრამ შესაძლოა წარმოდგენაც არ გქონდეთ იმაზე, რეალურად რამდენად სასწაულებრივი თვისებები აქვს მას.

მეცნიერებმა ისეთი ფაქტები გამოავლინეს, რომ შესაძლოა გაოცებისგან პირიც დააღოთ. დიახ, დედის რძე სუპერსაკვებია ჩვილისთვის, რომელსაც ქალის სხეული გამოიმუშავებს.

აი, რას ამბობს მეცნიერება ამ საოცრების შესახებ:

დედის რძე და ბავშვის სქესი


კვლევებმა აჩვენა, რომ დედის რძის შემადგენლობა ქალის სხეულში ბავშვის სქესის მიხედვით გამომუშავდება.

კერძოდ, თუ ბავშვი მდედრობითი სქესისაა, მაშინ რძე უფრო ნაკლებ ცხიმებსა და ცილებს შეიცავს, ვიდრე ბიჭებისთვის განკუთვნილი.

უფრო მეტიც, ირკვევა, რომ რძის შემადგენლობა სხვადასხვა კულტურებში დედის სურვილის მიხედვით იცვლება! ასე მაგალითად, 2012 წლის კვლევებმა, რომელიც ჟურნალმა Nature-მ გამოაქვეყნა, ცხადყო, რომ კენიაში მცხოვრები ღარიბი ქალების რძე, რომლებიც გოგონებს კვებავდნენ, ბევრად უფრო „ცოცხალი“ და ხარისხიანი იყო. და ეს იმიტომ, რომ დედებს სურდათ, მათი გოგონები ჯანმრთელები და ლამაზები გაზრდილიყვნენ, რათა წარმატებულად გათხოვილიყვნენ და ოჯახი შიმშილისგან ეხსნათ.

დედის რძე და ბავშვის ავადმყოფობა


თუ ძუძუზე მყოფი ბავშვი ავად გახდა, დედის რძეში ბევრად მეტი დამცავი ანტისხეული ჩნდება.

კვლევებით დასტურდება, რომ ლეიკოციტების რაოდენობა დედის რძეში ბავშვის ავადმყოფობისას მართლაც მატულობს, მაგრამ საინტერესო უფრო ისაა, როგორ ღებულობს ამ ინფორმაციას რძე. ეს საკითხი ბოლომდე შესწავლილი არ არის, თუმცა არსებობს მოსაზრება, რომ მეტი ანტისხეულების მოთხოვნას ბავშვი ძუძუს წოვისას „ატყობინებს“ სუპერსაკვებს.

დედის რძე და სხვადასხვა დაავადება


დედის რძე მნიშვნელოვნად ამცირებს ზოგი სნეულების განვითარების ალბათობას.

კვლევები აჩვენებს, რომ დედის რძეზე მყოფი ახალშობილები ნაკლებად არიან მიდრეკილები ასთმისა და ალერგიებისკენ. ამის მიზეზი შესაძლოა ის იყოს, რომ დედის რძეში აღმოჩენილი მოკლე ჯაჭვის ცხიმოვანი მჟავები უნიკალურ სიმტკიცეს სძენს ახალშობილების კუჭ-ნაწლავის სისტემას და აძლიერებს იმუნურ რეაქციებს.

უფრო მეტიც: ცოტა ხნის წინ სწავლულებმა კვლევებით დაადგინეს, რომ დედის რძეში შემავალი ცილები შესაძლოა კიბოსთან ბრძოლაში დაგვეხმაროს.

დედის რძე ღამით


დედებმა, რომლებიც ცდილობენ, მალე ათქმევინონ შვილს ღამით ჭამაზე უარი, უნდა იცოდნენ, რომ ღამით გამომუშავებულ რძეში ნუკლეოტიდების დონე ბევრად მაღალია, ვიდრე დღისით გამომუშავებულში. ნუკლეოტიდები – ეს რნმ-ის, დნმ-ისა და რიგი კოფაქტორების შემადგენელი ნაწილია, რომლებიც მნიშვნელოვან როლს ასრულებენ უჯრედის მეტაბოლიზმში, ენერგიის წარმოებაში და ინფორმაციის გადაცემაში.

ამ აღმოჩენამ უბიძგა მეცნიერებს ევარაუდათ, რომ ღამით დედის რძით კვება აუცილებელია ბავშვის ჯანსაღი ძილისთვის.

www.sputnik-georgia.com
































ტექსტის სანახავად გაიარეთ რეგისტრაცია.
Информация
Посетители, находящиеся в группе Гости, не могут оставлять комментарии к данной публикации.