ხველა ყოველთვის ცივ ამინდთან და გაციებით გამოწვეულ დაავადებებთან დაკავშირებული არ არის. რაშია მიზეზი?
1. ალერგიული ხველა გარემოს არახელსაყრელი ვითარებითაა განპირობებული. მაგალითად, სახლისა და მცენარეთა მტვრით, საყოფაცხოვრებო ქიმიის უმცირესი ნაწილაკებით და ა.შ. თან ახლავს ცრემლდენა, ცემინება და ცხვირში გაჭედვა.
2. დილის ხველა (რამდენჯერმე წამოხველება მცირე რაოდენობის ნახველთან ერთად), ეს არის მწეველის ტიპური ხველის გამოვლენა.
3. ნაზალური (ცხვირისმიერი) სინდრომი – ცხვირიდან წყლის დენა ქრონიკული რინიტის ან ჰაიმორიტის მაჩვენებელია. ლორწო ცხვირიდან ხახაში გადადის, შემდეგ ბრონქებში ხვდება და მუდმივ ხველას იწვევს.
4. მშრალი ხველა უცებ იწყება განსაკუთრებით გულ–სისხლძარღვთა დაავადებების სამკურნალო პრეპარატების მიღებისას. ეს მკურნალობის გვერდითი ეფექტია.
5. გულისმიერი ხველა დაკავშირებულია გულთან. იწვევს გულის უკმარისობა, მანკი, აორტის ანევრიზმა.
6. ხველა პირში მწარე გემოთი, გულძმარვა მაშინ აღინიშნება, როდესაც კუჭის მჟავე შიგთავსი ბრონქებში ხვდება და მის ლორწოვანს აღიზიანებს.
7. ბავშვებში ხველა შეიძლება დაკავშირებული იყოს ასკარიდებთან (პარაზიტებთან), რომლებიც სასიცოცხლო ციკლის ნაწილს ფილტვებში ატარებენ (საჭიროა პარაზიტოლოგის კონსულტაცია).
4 საუკეთესო ბალახი . ზოგიერთი სამკურნალო ბალახი გაჭიანურებული ხველის დაძლევას კარგად ეხმარება. ისინი ფილტვებს მავნე მიკრონაწილებისგან ასუფთავებენ.
სამფერი ია ბრონქებში ჯირკვლის სეკრეციას აუმჯობესებს, ნახველს ათხელებს და ამოხველებას ეხმარება. 1 ს.კ. ბალახს 1 ჭიქა მდუღარე დაასხით და 15 წუთი წყლის აბაზანაზე გააცხელეთ. იმდენი ადუღებული წყალი დაამატეთ, რომ ერთი სავსე ჭიქა მიიღოთ. 1/3 ჭიქა დღეში 3–4–ჯერ დალიეთ. ყურადღება: ნაყენი რეკომენდებული არ არის თირკმლისა და ღვიძლის ანთებითი დაავადებების დროს.
ტუხტის ფესვები ბრონქების ლორწოვანი უჯრედების აღდგენას, ნახველის გათხელებასა და ამოხველებას ეხმარება. 2 ჩ.კ. დაქუცმაცებულ ფესვებს 1 ჭიქა ადუღებული წყალი დაასხით. ყოველ 2 საათში 1 ს.კ. დალიეთ. უკეთესად მოქმედებს სიროფი და ექსტრაქტი (შეიძინეთ აფთიაქში).
ბეგქონდარა ბევრ ეთერზეთს შეიცავს. ბრონქებს აფართოებს, ანთებისა და სპაზმების საწინააღმდეგო, აგრეთვე ამოსახველებელი ეფექტი გააჩნია. თერმოსში 1 ს.კ. ნედლეული ჩაუშვით, 1 ჭიქა მდუღარე დაასხით და 1 საათი დადგით. გაწურეთ და დღეში 3–4–ჯერ, ჭამის შემდეგ, 3 ს.კ. მიიღეთ.
ვირისტერფას ფოთლები ძველი ნაცადი საშუალებაა ნებისმიერი ხველის დროს. ნაყენს ანტიმიკრობული და ანთების საწინააღმდეგო მოქმედება აქვს. აგრეთვე ბრონქების სპაზმს ხსნის. 1 ჩ.კ. ბალახს 1 ჭიქა მდუღარე დაასხით. დალიეთ, როგორც ჩაი.
ბუნებრივი შინაური საშუალებები
ბევრი საკვები პროდუქტი ხველის დაძლევას ეხმარება და, აბებისგან განსხვავებით, პრაქტიკულად გვერდითი ეფექტები არ აქვს.
აიღეთ ქორფა ლეღვის ან ჩირის 2 ნაყოფი და 1 ჭიქა რძეში წამოადუღეთ. 1/2 ჭიქა დღეში 4–ჯერ, ჭამის შემდეგ დალიეთ.
ძახველის კენკრის ნაყენი მოამზადეთ და თაფლი შეურიეთ (თანაფარდობა 1:2). 1–2 ს.კ. დღეში 4–5–ჯერ მიიღეთ, თბილი წყალი დააყოლეთ.
ქერის მარცვლები დიდი რაოდენობის წყალში დაბალ ცეცხლზე ადუღეთ. გაწურეთ. მიიღებთ მღვრიე ნახარშს, რომელიც 1/2 ჭიქა დღეში 4–ჯერ უნდა დალიოთ. შეგიძლიათ ლიმონის ან ფორთოხლის წვენი დაუმატოთ.
6 ცალი შავი ბოლოკი თხელ ნაჭრებად დაჭერით. თითოეულს სქელ ფენად შაქარი მოაყარეთ. 10–12 საათის შემდეგ ტკბილი წვენი წარმოიქმნება. 1 სუფრის კოვზი ყოველ საათში მიიღეთ.
კვება მსუბუქი სუნთქვისთვის
არ იფიქროთ, რომ სწორად კვება საჭიროა მხოლოდ კუჭ–ნაწლავის, დიაბეტისა და პოდაგრის დაავადებების დროს. სასუნთქი სისტემა ასევე შესატყვის დამოკიდებულებას ითხოვს იმის მიმართ, რასაც ვჭამთ. თავისუფალი რადიკალების დამანგრეველი მოქმედებისგან რომ დავიცვათ, რაციონში აუცილებლად უნდა იყოს საკმარისი ანტიმჟანგავები. ეს არის ვიტამინი ს (ყველა ქორფა ხილი და ბოსტნეული), ბეტა–კაროტინი (სტაფილო, ტკბილი წიწაკა), ლიკოპენი (პომიდორი) და სელენი (მთლიანი მარცვლეული, ზღვის პროდუქტები, თხილეული).
ცხიმჟავა ომეგა–3 სასუნთქ გზებს ანთებისგან იცავს, ალერგიულ რეაქციას ამცირებს. მათი წყაროა ზღვის ცხიმიანი თევზი, ფოთლოვანი ბოსტნეული, სოია.
მაგნიუმის ნაკლებობა სასუნთქი გზების სპაზმებს იწვევს, იმუნიტეტს ასუსტებს. მაგნიუმი უხვადაა თხილეულში, თესლებში, მთლიან მარცვლებში, ზღვის კომბოსტოში.
გამორიცხეთ ყველა ხელოვნური დანამატი, გაზიანი სასმელი, სოუსი, სწრაფი მომზადების პროდუქტები.
წყარო: sana.ge
|
|
|
|
|
|
|
|
|
|
|
|
