პროსტატიტი - შარდ-სასქესო სისტემის დაავადებები



პროსტატიტი არის წინამდებარე ჯირკვლის ანთება. ის ყველაზე გავრცელებული დაავადებაა 25-დან 50 წლამდე ასაკის მამაკაცებს შორის.

არსებობს პროსტატიტის გამომწვევი უამრავი რისკ-ფაქტორები:
სქესობრივი გზით გადამდები ინფექციები: ქლამიდია, ურეოპლაზმა, მიკოპლაზმა, ჰერპესის ვირუსი, ციტომეგალოვირუსი, ტრიქომონადა, გონოკოკი, კანდიდას გვარის სოკო, ნაწლავის ჩხირი, რომელთაც შეუძლიათ ურეთრის დაზიანება და პროსტატის ქსოვილში გადასვლა; მცირე მენჯის ორგანოებში სისხლის მიმოქცევის დარღვევა (შეგუბებითი მოვლენები ჯირკვლის ანთებას იწვევს), მჯდომარე ცხოვრების წესი (მანქანის მართვა, საოფისე სამსახური), სქესობრივი ცხოვრებისგან ხანგრძლივი თავშეკავება; ხშირი გადაცივება (ექსტრემალური გართობის - დაივინგის, სერფინგის, ასევე - სამთო-სათხილამურო სპორტის მოყვარულებს შორის); შეკრულობა; სხვადასხვა ორგანოს ანთებითი და ჩირქოვანი დაავადებები (მათ შორის - ანგინა, ქრონიკული ბრონქიტი, გრიპი, ტუბერკულოზი, პნევმონია, კარბუნკული, ფურუნკული); დათრგუნული იმუნური სისტემა, სტრესი, ფსიქიკური და ფიზიკური გადატვირთვა და უხარისხო (არაბალანსირებული) კვება.

პროსტატიტის დროს ხშირად ვითარდება ახლომდებარე ორგანოების ანთებაც, რის გამოც ადგილი აქვს კომბინირებულ ანთებით პროცესებს:
- პროსტატოვეზიკულიტი ანუ პროსტატიტი და სათესლე ბუშტუკების ანთება;
- პროსტატოურეთრიტი ანუ პროსტატიტი და შარდსადენი მილის ანთება;
- პროსტატოეპიდიდიმიტი ანუ პროსტატიტი და სათესლე ჯირკვლის დანამატების ანთება;
- პროსტატოცისტიტი.

აქედან გამომდინარე, პროსტატიტის კლინიკური ნიშნები მრავალფეროვანია. არსებობს სიმპტომები, რომლის გამოც პაციენტები ყველაზე ხშირად აკითხავენ ექიმს, ისინი იყოფა რამოდენიმე ჯგუფად:
ტკივილი წინამდებარე ჯირკვლის ან მენჯის არეში;

მოშარდვის აქტთან დაკავშირებული სიმპტომები:
გახშირებული შარდვა; გაძნელებული შარდვა; მტკივნეული შარდვა; წვა მოშარდვისას; ქავილის შეგრძნება შარდსადენ მილში; მოშარდვის ცრუ სურვილი; დაუკმაყოფილებლობის შეგრძნება მოშარდვის შემდეგ; ტკივილი ურეთრაში;

გამონადენი ურეთრიდან – კუჭში გასვლის ან გაჭინთვისას ურეთრიდან ლორწოს სახით გამოდის პროსტატის წვენი.

სქესობრივ დისკომფორტთან დაკავშირებული სიმპტომები:
იმპოტენცია ანუ ნებისმიერი სახის სქესობრივი უძლურება; ლიბიდოს ანუ სქესობრივი ლტოლვის დაქვეითება; უნაყოფობა; ნაადრევი ან გახანგრძლივებული ეაკულაციის ნიშნები.

აღსანიშნავია ის ფაქტი, რომ დაავადება ხშირად იმდენად ფარულად და თანდათანობით მიმდინარეობს, რომ ავადმყოფი ვერაფერს ამჩნევს და ჩვეულ მდგომარეობად მიაჩნია.

პროსტატიტი იყოფა სამ ფორმად: მწვავე, ქვემწვავე და ქრონიკული.

პროსტატიტის დიაგნოსტიკისთვის გამოიყენება:
- ანამნეზი;
- ულტრაბგერითი გამოკვლევა;
- შარდის ბაქტერიოლოგიური გამოკვლევა.

პროსტატიტი ხშირად რთულდება იმპოტენციით ან უნაყოფობით, ამიტომ მეტად მნიშვნელოვანია მისი ადრეული დიაგნოსტიკა და მკურნალობა.

პროსტატიტის პროვოცირებას ყოველთვის რამდენიმე ფაქტორი იწვევს, ამიტომაც მოქმედება საჭიროა რამდენიმე მიმართულებით. მკურნალობის კომპლექსურ პროგრამაში შედის ანტიბიოტიკოთერაპია, მკურნალობა პრეპარატებით, რომლებიც აუმჯობესებს სისხლძარღვების ტონუსს, ფიზიოთერაპიული პროცედურები (მაგნიტო-ლაზერო-ინდუქტოთერაპია, ულტრაბგერა, რეფლექსოთერაპია, წურბელებით მკურნალობა), ასევე - ზოგადგამაჯანსაღებელი საშუალებები. ინიშნება პროსტატის მასაჟის კურსი. პროსტატის მასაჟის კურსი, მიუხედავად იმისა, რომ უსიამოვნო შეგრძნებებს იწვევს, აუცილებელია. პირველ რიგში - დიაგნოსტიკისთვის, როცა საჭიროა წინამდებარე ჯირკვლიდან სეკრეტის აღება. გარდა ამისა, განსაზღვრულ შემთხვევაში მასაჟს მიმართავენ, რათა მოხსნან შეგუბებითი მოვლენები ჯირკვალში.


წყარო: med-doctor.net
































ტექსტის სანახავად გაიარეთ რეგისტრაცია.