სექსი და სიყვარული



სიყვარული და სექსი – რა ხდება მაშინ, როცა ეს ორი მოვლენა ცალ-ცალკე ვითარდება და რა უფრო მნიშვნელოვანი საფუძველია მყარი ოჯახის შესაქმნელად – კარგი სექსი თუ სიყვარული? ამ თემაზე ჩვენს მკითხველთან და „მეთი-კლინიკის“ ხელმძღვანელთან, ექიმ სექსოლოგ თემურ მეგრელიშვილთან ერთად ვიმსჯელებთ.
ლალი ლაგვილავა: „38 წლის ასაკში, როგორც იქნა, გადავაბიჯე საკუთარ თავს, ტრადიციებს და ქალიშვილობა დავკარგე. მართალია, ეს ადამიანი დიდად არ მხიბლავს, მაგრამ, რადგან მის გარდა თაყვანისმცემელი არ მყოლია და აღარც მეყოლებოდა, ამიტომაც გადავწყვიტე, დავნებებოდი. სექსი მშვენიერი გვაქვს, მაგრამ, სხვა მხრივ, რაღაც ვერ ვუგებ, ახლა ცოლობას მთხოვს, მე კი დიდი დილემის წინაშე ვდგავარ – გავყვე მას ცოლად თუ სამუდამოდ გაუთხოვარი დავრჩე?“
თემურ მეგრელიშვილი, სექსოლოგი: „ძალიან ცუდია, რომ საქართველოში ორმოც წელს მიღწეული ქალები თავიანთ თავს ჩამოწერილად მიიჩნევენ და არჩევანს არ იტოვებენ. ბევრ ქვეყანაში ადამიანები სწორედ ასეთ ასაკში ქმნიან ოჯახებს, რადგან ამ დროს ისინი ყველანაირად ჩამოყალიბებულები არიან. წარმატებული ქორწინება ორმხრივ სიყვარულსა და ურთიერთლტოლვას ემყარება. ბევრი ფიქრობს, რომ ქალსა და მამაკაცს შორის სასიყვარულო ურთიერთობის განვითარებისთვის გადამწყვეტია ერთი ნახვით შეყვარება. განსაკუთრებით, ქალების გარკვეული ნაწილი ელოდება იმ განუმეორებელ მომენტს, როცა ის თავისი ოცნების მამაკაცს შეხვდება. მშვენიერი სქესის ზოგიერთ წარმომადგენელს სურს, ისევე მძაფრად განიცადოს აღმაფრენა, საყვარელი ადამიანის დაკარგვის შიში, ეჭვიანობა, როგორც ეს წიგნებსა თუ ფილმებშია. თუ მამაკაცთან ურთიერთობა მშვიდი, გაწონასწორებული და მდორეა, ეს მათში განხიბვლას იწვევს. ერთი ნახვით შეყვარება ჯერ კიდევ არ ნიშნავს სიყვარულს. შედეგად შეიძლება ბედი დაუკავშიროთ ადამიანს, რომელიც სულ არ შეგეფერებათ, თუნდაც სექსუალურ სფეროში ყველაფერი კარგად გქონდეთ. გაქვთ კი იმედი, რომ ოდესმე თქვენი მეორე ნახევარი შეიცვლება, ან თქვენ ხართ მზად საკუთარი თავის შესაცვლელად, რომ უფრო შესაფერისები გახდეთ ერთმანეთისთვის, და ეს მოგიტანთ ბედნიერებას? ნამდვილი სიყვარული თანდათან, გარკვეული დროის განმავლობაში მჟღავნდება. პირველი შთაბეჭდილება ხშირად მცდარია, ის არ იძლევა სრულ პასუხს კითხვაზე: შეგეფერებათ თუ არა ეს ადამიანი? საჭიროა დრო, რომ გარეგნობის მიღმა პიროვნების ჭეშმარიტი არსი შეიგრძნოთ. ამიტომ, ნუ ეტყვით უარს ადამიანს მხოლოდ იმის გამო, რომ ის ერთი ნახვით არ შეგიყვარდათ. აღიჭურვეთ მოთმინებით და გარკვეული დროის გავლის შემდეგ შეიძლება აღმოაჩინოთ, რომ თქვენ ემოციურად და ინტელექტუალურად შეეფერებით ერთმანეთს. მიუხედავად იმისა, რომ პირველი ნახვის დროს დიდი შთაბეჭდილება მას არ მოუხდენია“.
ელზა ჩუბინიძე, მკითხველი: „უკვე ათი წელია, ოჯახი გვაქვს, გარედან ჩემს ოჯახს ყველა შემონატრის, არ ვჩხუბობთ, კონფლიქტები არ გვაქვს, ჩემი ქმარი არაფერს გვაკლებს, თუკი რამე გააჩნია, ყველაფერი ჩემთვის და ჩვენი შვილებისთვის ემეტება, მაგრამ ჩვენს შორის ის ვნებები და ის ლტოლვა აღარ არსებობს, რაც ურთიერთობის დასაწყისში გვქონდა, მაინტერესებს, ეს ნორმალურია?“
თემურ მეგრელიშვილი, სექსოლოგი: „დროთა განმავლობაში წყვილში შეიძლება ჩამოყალიბდეს ურთიერთშეგუება, ურთიერთშეჩვევა, რომელიც ზოგჯერ უფრო ძლიერია, ვიდრე ურთიერთობის დასაწყისში გაჩენილი პირველი აღმაფრენა.
საერთოდ, ძალიან მნიშვნელოვანია, როგორი იყო ურთიერთობის დასაწყისი. ქალსა და მამაკაცს შორის გრძნობათა სერიოზულობას გარკვეულწილად განსაზღვრავს შეხვედრების სიხშირე და ერთად გატარებული დროის ხანგრძლივობა. თუ მამაკაცი კვირაში ერთხელ ან ორჯერ ხვდება ქალს, ეს უფრო შემთხვევით კავშირს ჰგავს, მაგრამ, როცა გრძნობა სერიოზულია, მამაკაცი ცდილობს, რაც შეიძლება მეტი დრო გაატაროს სასურველ ქალთან. ამ შეხვედრების დროს თანდათანობით ხდება წყვილის შემზადება ოჯახის შესაქმნელად. „შეხვედრა შაბათობით“ – ასეთი სცენარიც სიცოცხლისუნარიანია, მით უმეტეს, თუ პარტნიორები საკმაოდ ზრდასრულნი არიან და არ სურთ ცხოვრების ჩვეული წესის შეცვლა.
ქალმაც და მამაკაცმაც უნდა გასცეს პასუხი შემდეგ კითხვებს: რას ელით ამ ურთიერთობისგან? ეს ის არის, რასაც ელოდით მისგან შეხვედრების დასაწყისში? მიიღებთ თუ არა მეტს მომავალში, პარტნიორის პირადი თვისებებისა და სავარაუდო ქცევების გათვალისწინებით?“
თეიკო ნამგალაძე, მკითხველი: „ჩემი მეგობარი ბიჭის მიმართ საოცარი დამოკიდებულება მაქვს. საკმარისია, შემომხედოს ან შემეხოს, ჩემს თავზე კონტროლს ვკარგავ. მასთან ყოფნისას მხოლოდ ერთადერთი სურვილი მაქვს, სულ ლოგინში ვიყოთ და სულ სექსით დავტკბეთ. როცა არ ვხედავ, საერთოდ არ მახსოვს, მაგრამ, თუ ვნახე, მაშინ მეწყება სიგიჟეები. არადა მერე რა იქნება, ვერ ვხვდები, ძალიან ღარიბია და სკოლაში ნახევრად არ უვლია და არც აპირებს რაიმე შეცვალოს, ზოგჯერ ჩემს დაქალებთანაც ვერ ვაჩენ, მაგრად მიტყდება, მაგრამ ვერც მასთან ყოფნის სიამოვნებაზე ვამბობ უარს“.
თემურ მეგრელიშვილი, სექსლოგი: „გახსოვდეთ, რომ ძლიერი ფიზიკური ლტოლვა ადამიანს რეალობის შეგრძნებას აკარგვინებს. „სიყვარული ბრმაა“, რადგან ამ დროს ვერ ხედავთ პარტნიორის ნაკლებს.
არამიზანშეწონილია ქორწინება ისეთ ადამიანთან, ვის მიმართაც ფიზიკური ლტოლვის მეტს არაფერს განიცდით. ასეთი ქორწინება გაგრძელდება მანამ, სანამ ერთ დილას არ გაიღვიძებთ იმ შეგრძნებით, რომ ბედი დაუკავშირეთ ადამიანს, რომელსაც თქვენთან საერთო არაფერი აქვს, არ სცემთ პატივს და სრულებით არ გიყვართ. ძლიერი სურვილის დროს ხდება პარტნიორის გაიდეალება, მისი ეფექტური გარეგნობის მიღმა შეიძლება აუტანელი ხასიათი იმალებოდეს და აბსოლუტურად მიუღებელი ჩვევები, რაც შეუძლებელს ხდის მასთან ცხოვრებას.
ადრე თუ გვიან, გრძნობა ფერმკრთალდება, ლტოლვა ცხრება და ადამიანი რეალურად აფასებს შექმნილ სიტუაციას. ოჯახის შესანარჩუნებლად საჭიროა ცოლქმრული ურთიერთობების ხარისხის სრულყოფა, მათ შორის სექსუალურისაც. ამ უკანასკნელს თან უნდა სდევდეს სიამოვნება, სიახლე.
ხშირად არასტაბილურია კავშირი, რომელიც გაცნობიდან რამდენიმე კვირაში ოჯახის შექმნით სრულდება, მაგრამ ყოფილა შემთხვევები, როცა ასეთი უეცარი ქორწინება მყარი აღმოჩენილა. ბედნიერი თანაცხოვრების დროს მეუღლეებს აერთიანებთ არა მარტო ფიზიკური სიახლოვე, არამედ ემოციური, ინტელექტუალური, სულიერი ჰარმონია, ერთნაირი წრე, გარემო და მისწრაფებები.
გამოცდილებამ აჩვენა, რომ განქორწინებულთა უმრავლესობა ძლიერ გრძნობას განიცდიდა შეყვარებულობისა და დაქორწინების პირველ ხანებში. მათი ურთიერთობები თანდათან გაცივდა, რადგან თავი იჩინა განსხვავებამ ინტერესებში, მძიმე ხასიათმა და ეს იმდენად აუტანელი და დამთრგუნველი აღმოჩნდა, რომ სიყვარული სადღაც გაქრა. ამის შემდეგ დაშორება გარდაუვალი გახდა. ერთი სიტყვით, ჯანსაღი ოჯახური თანაცხოვრებისთვის აუცილებელია როგორც ურთიერთლტოლვა და ყოველმხრივ ჰარმონიული სექსუალური ურთიერთობები, ასევე სულიერი თანხვედრა, პასუხისმგებლობის გრძნობა საკუთარი თავისა და რჩეულის მიმართ“.


ლორა დადიანი
































ტექსტის სანახავად გაიარეთ რეგისტრაცია.