ღამის ტკბილი ძილი ბევრი ზრდასრული ადამიანის ოცნებად გადაიქცა. უშფოთველი და მშვიდი ძილის ნაცვლად ზოგს ყოველ მესამე დღეს ეღვიძება და თეთრად ათენებს, ზოგი საერთოდ ვერ იძინებს, სხვა ცისკარს ასწრებს თვალების დაჭყეტას და ისღა დარჩენია ჭერს მიაპყროს მზერა, ისეც ხვდება, რომ ეს სამნაირი შემთხვევა ერთ ადამიანს ჭირს.
უძილობის მიზეზი სხვადასხვაა - ავადმყოფობა, სტრესი, რეჟიმის დარღვევა. მაგრამ არსებობს ზოგადი რეკომენდაციები, რომელთა დაცვა ძილის მოთვინიერებას ხშირად შველის.
სუნთქვის შეკვრამდე ჭამა და ღორმუცელობა რომ არ ვარგა ძილის წინ, ყველამ იცის. და თუ ამ თეორიულ ცოდნას პრაქტიკაშიც გამოიყენებთ და სული არ წაგძლევთ, ძილის პრობლემა შეიძლება თავისთავად მოგვარდეს.
არყის ან ლუდის ძილისმომგვრელებად გამოყენება საჭირო არაა. შეიძლება მართლაც, გემრიელად ჩაგეძინოთ, მაგრამ ერთი-ორი საათის შემდეგ შფოთს დაიწყებთ, მოძრაობას და ორგანიზმი დასვენების გარეშე დარჩება: იმის ნაცვლად რომ ძალა აღიდგინოს ალკოჰოლის გადამუშავებაზე უნდა იზრუნოს.
ლავანდის ზეთიანი თბილი აბაზანაც ძილის კარგი მოკავშირეა. ვიღაცას ხანმოკლე გასეირნება, მცირე ფიზიკური დატვირთვა ან იოგას არსენალიდან სუნთქვის რამდენიმე ვარჯიში უშველის.
საწოლი ჩუმ ადგილას უნდა იდგეს. ნებისმიერი ბგერა, რომელიც 40 დეციბელზე მაღალია, მაგალითად, კარის გაჯახუნება, ავტოსიგნალიზაცია, ძაღლის ყეფა - ძილის საშუალებას არ მოგცემთ. აუცილებლად გაანიავეთ ოთახი დაწოლამდე. საძინებლის ოპტიმალური ტემპერატურა უნდა იყოს - 16-18 გრადუსი.
ცხელი ჩაი - ლიმონით, რძე - თაფლით ან შოკოლადით - ღამით შაქრის დონე სისხლში იკლებს, რაც შფოთიან ძილს იწვევს, ამიტომ გლუკოზის მარაგის მიღება ურიგო არ იქნება.
და კიდევ: ნუ მიეჩვევით ჩართული ტელევიზორის ან რადიოს ხმაზე ჩაძინებას. გამოსართავად მაინც მოგიხდებათ გაღვიძება და მერე ძილის შებრუნება შეიძლება არც გამოვიდეს. ყველაზე კარგი იქნება თუ ერთსა და იმავე დროს დაიძინებთ და როცა თქვენთვის ოპტიმალურ “საძილე” დროს გამოთვლით, რეჟიმი უქმეებზეც დაიცავით.
წყარო
|
|
|
|
|
|
|
|
|
|
|
|
