გამოიცანი საყვარელი ადამიანის ხასიათი მისი საყვარელი ფერის მიხედვით



ნებისმიერი ადამიანი, როგორც წესი, რომელიღაც ფერს ანიჭებს უპირატესობას. ზოგიერთს კი ერთი კი არა, ერთდროულად ორი-სამი ფერი უყვარს. ფსიქოლოგები ირწმუნებიან, რომ საყვარელი ფერით ადამიანის ხასიათისა და ტემპერამენტის განსაზღვრა შეიძლება.

ფერის მიხედვით ხასიათის გამოსაცნობად ქვემოთ ჩამოთვლილთაგან ერთ-ერთი ამოარჩიეთ: თეთრი, ყვითელი, შავი, სალათისფერი, ნაცრისფერი, ვარდისფერი, წითელი, იისფერი, ნარინჯისფერი, ცისფერი, ყავისფერი, მწვანე.

თეთრი
ეს ოცნების ფერია. იგი მრავალმნიშვნელოვანია, რადგან ერთსა და იმავე დროს თითქოს ასხივებს კიდევაც და ყინულოვანი სიცივითაც გამოირჩევა. თეთრი შესაძლოა ნებისმიერი ხასიათის ადამიანს უყვარდეს.

შავი
თეთრის საპირისპიროა და ცხოვრების პირქუშად აღქმის სიმბოლოა. ვისაც შავი ფერი უყვარს, შესაძლოა ცხოვრებას მუქ ტონებში აღიქვამდეს. შავის მოყვარულები, როგორც წესი, საკუთარ თავში არ არიან დარმწუნებული და შესაძლოა თავს უბედურადაც გრძნობდნენ. მათი აზრით, ცხოვრებისეული იდეალები მიუღწეველია.

ნაცრისფერი
წინდახედული და ეჭვიანი ადამიანების საყვარელი ფერია. ისინი ნებისმიერი გადაწყვეტილების მიღებისას ბევრს ფიქრობენ. ამ ნეიტრალურ ფერს უპირატესობას ანიჭებენ ისინი, ვისაც ყურადღების ცენტრში ყოფნის არ ეშინია. ნაცრისფერი არ უყვართ იმპულსურსა და ქარაფშუტა ადამიანებს.

წითელი
ვნებების ფერია. ის გაბედულ, ძალაუფლების მოყვარე, ფეთქებადსა და დიდი ნებისყოფის მქონე ადამიანებს უყვართ. ვისაც ეს ფერი აღიზიანებს, ჩხუბის ეშინია და განმარტოება უყვარს.

ნარინჯისფერი
ამ ფერის მოყვარულ ადამიანებს ძლიერი ინტუიცია აქვთ და მგზნებარე მეოცნებენი არიან, თუმცა, თუ ჰერალდიკას დავუჯერებთ, ნარინჯისფერი ფარისევლობის მიმანიშნებელია.

ყავისფერი და მისი ტონები
უყვართ ადამიანებს, რომლებიც მიწაზე მყარად დგანან, აფასებენ ოჯახსა და ტრადიციებს. ეს ფერი საკუთარ თავში შეყვარებულ ადამიანებს აღიზიანებთ.

ყვითელი
სიმშვიდის, ინტელიგენტურობის, ადამიანებთან ძალდაუტანებელი ურთიერთობების სიმბოლოა. ადამიანი, რომელსაც ყვითელი უყვარს, გულღია, ცნობისმოყვარე და გაბედულია. ახალ გარემოსთან შეგუება არ უჭირს და ადამიანებთან ურთიერთობა სიამოვნებას ანიჭებს. ვისაც ეს ფერი არ მოსწონს, შესაძლოა დაძაბული, პესიმისტურად განწყობილი ადამიანი იყოს, რომელთანაც ურთიერთობის დამყარება ძნელია.

სალათისფერი
ძალაუფლების მოყვარულებს უყვართ. ისინი მზად არიან, თავიანთი ნება სხვას მოახვიონ, თუმცა სირთულეების ეშინიათ და ამიტომ აქტიური მოქმედებისგან თავს იკავებენ.

ვარდისფერი
გაზაფხულისა და სიცოცხლის ფერია. მგრძნობიარე ადამიანებს უყვართ. ისინი შეიძლება რაღაც უმნიშვნელომაც კი ააღელვოს. პრაგმატულებს კი ვარდისფერი აღიზიანებთ.

იისფერი
ძალზე ემოციური და დელიკატური ადამიანების ფერია. მათთვის სულიერი ღირებულებები ბევრს ნიშნავს. იისფერი არ უყვართ იმ ადამიანებს, რომლებსაც მოვალეობის გრძნობა ზედმეტად აქვთ განვითარებული. ამ ფერს არც ისინი ეტანებიან, ვინც დღევანდელი დღით ცხოვრობს.

ცისფერი
სუფთა, ამაღლებული ადამიანების ფერია. იგი მოკრძალებული და მელანქოლიური ბუნების მქონე პიროვნებებს მოსწონთ. მათთვის გარშემომყოფთა კეთილგანწყობა სასიცოცხლოდ აუცილებელია. ვისაც ცისფერი არ უყვარს, თავი ყოვლისშემძლე ჰგონია. ვისთვისაც ეს ფერი განურჩეველია, ცოტა არ იყოს, ზედაპირულია გრძნობათა სამყაროში, თუმცა გარეგნულად _ ძალზე ხალისიანია.

მწვანე
ბუნებისა და სიცოცხლის ფერია. მწვანის მოყვარულს სხვისი გავლენის ქვეშ მოქცევის ეშინია. იგი თვითდამკვიდრების გზებს ეძებს. მისთვის ეს ძალზე მნიშვნელოვანია. ვისაც მწვანე არ უყვარს, ცხოვრებისეული პრობლემების, ბედის ცვალებადობის და ნებისმიერი ცვლილების ეშინია.

წყარო: www.etanews.ge
































ტექსტის სანახავად გაიარეთ რეგისტრაცია.