როგორ მოვუაროთ დეკემბერას?



შლუმბერგერა, იგივე დეკემბერა, საკმაოდ გავრცელებული ოთახის მცენარეა, რომელიც კაქტუსისებრთა ოჯახს მიეკუთვნება და დიდი ხნის განმავლობაში გვანებივრებს ულამაზესი, ნაირფერი ყვავილებით. როგორ შევუქმნათ სასურველი გარემო დეკემბერას და როგორია მისი მოვლისა და გამრავლების წესები?!

შლუმბერგერა, იგივე დეკემბერა

დეკემბერა კაქტუსებრთა ოჯახის (ზიგოკაქტუსების ჯგუფიდან) წარმომადგენელი ეპიტიფი მცენარეა. მისი სამშობლო სამხრეთ ამერიკის ტროპიკული ტყეებია, სადაც ის დიდი ტანის მცენარეების ფუღუროებში, ტოტებისგან შექმნილ „ბუდეებსა“ და მსგავს ადგილებში სახლობს.

შლუმბერგერა თავის სამშობლოში ზაფხულობით ყვავის. საოცარია, რომ ეს ფაქტი მცენარეს ჩვენს ნახევარსფეროშიც „ახსოვს“ და სწორედ მაშინ იწყებს ყვავილობას, როცა სამხრეთ ამერიკაში ზაფხული იწყება - ეს კი, ჩვენი დროით, ზამთრის დასაწყისია, ამიტომაც შეარქვეს დეკემბერა.

შლუმბერგერას 30-40 სმ. სიგრძის დატოტვილი და ქვემოთ დაშვებული მწვანე ღეროები აქვს, რომლებიც პატარა (დაახლოებით, 6 სმ-ის სიგრძის) ნაწილებადაა დაყოფილი და ფოთლებს მოგვაგონებს.

ყვავილების ბუნებრივი შეფერილობა თეთრი ან მკვეთრად წითელი აქვს, თუმცა სელექციონერების აქტიური მუშაობის შედეგად, გამოყვანილია სხვადასხვა ფერის ყვავილიანი სახეობები - ვარდისფერი, ყვითელი, იისფერი, ჟოლოსფერი და ა.შ.

სელექციონერებმა ისიც მოახერხეს, რომ სწორი მოვლის პირობებში ჰიბრიდები წელიწადის განმავლობაში 2-3-ჯერაც კი ყვავიან.

მართალია შლუმბერგერას სუსტად განვითარებული ფესვები აქვს და არასასურველ პირობებში ადვილად უზიანდება (უხმება), მაგრამ როგორც კი მცენარე კარგ გარემოში მოხვდება, დაზიანებული ფესვები მალევე იწყებენ აღდგენას. მცენარე დამატებით საჰაერო ფესვებსაც ივითარებს, რომლებიც მას ჰაერიდან ტენიანობის შეწოვაში ეხმარება.

კარგი მოვლის პირობებში შლუმბერგერა ძალიან დიდხანს (20 წელიც კი) ცოცხლობს, თუმცა დროთა განმავლობაში დეკორატიულობას კარგავს და ღეროებიც უუხეშდება.

როგორ მოვუაროთ დეკემბერას?


ტემპერატურა და განათება

შლუმბერგერა, სხვა კაქტუსებისგან განსხვავებით, მზის ნაკლებად მომთხოვნია. ნათელი ადგილი უყვარს, მზის მწველი სხივებისგან მოჩრდილული. უპრეტენზიო მცენარეა, მაგრამ ზამთარში, ყვავილობის დროს, სითბო ურჩევნია. სიცივეში კოკრები უფუჭდება. ზაფხულში გარეთ, ღია ცის ქვეშ გატანაც შეგვიძლია, ოღონდ, აუცილებლად ჩრდილში.

მისთვის იდეალური ოთახის ნორმალური ტემპერატურა მთელი წლის განმავლობაში 18-24 გრადუსია.

თუ მიმდინარე სეზონზე ძალიან მაღალი ტემპერატურის პირობებში არ ამყოფებთ, შემდგომ წელს უკეთ იყვავილებს.

შეგიძლიათ, ეს მცენარე საკიდ კალათაში მოათავსოთ და ოთახში დაკიდოთ.

ისიც გაითვალისწინეთ, რომ შლუმბერგერას არ უყვარს ადგილის ხშირად შეცვლა, განსაკუთრებით, ყვავილობისას.

როგორ მოვუაროთ დეკემბერას?


მორწყვა

შლუმბერგერა ტროპიკული ტყეების ბინადარია, ამიტომ წყალიც, სხვა კაქტუსებთან შედარებით, მეტი სჭირდება, ოღონდ ზედმეტი არ უნდა მოგივიდეთ.
მორწყეთ რბილი, ოთახის ტემპერატურის წყლით, მხოლოდ ისე, რომ მიწა ტენიანი იყოს და არა წყლით ძალიან გაჟღენთილი.

გადაყვავილებიდან რამდენიმე კვირის განმავლობაში მორწყვა შედარებით შეუმცირეთ, ზაფხულში კი კარგი იქნება თუ ნახშირმჟავა-კალიუმიანი სასუქით მორწყავთ ხოლმე.

ნიადაგი და გადარგვა

შლუმბერგერას ფხვიერი, კარგი დრენაჟის მქონე ნეიტრალური ნიადაგი სჭირდება.

თუ მიწაში გადამწვარ ნაკელს აურევთ ან სისტემატურად სასუქით გაამდიდრებთ, უფრო ინტენსიურად იყვავილებს.

რაც შეეხება, მცენარის გადარგვას, ამისთვის: ჯერ მცენარისთვის საჭირო ნოყიერი ნიადაგი მოამზადეთ და კარგი დრენაჟით უზრუნველყავით, შემდეგ კი მცენარე ძველი ქოთნიდან ისე ამოიღეთ, რომ ფესვებზე მიწა შერჩეს და ახალ ქოთანში ფრთხილად გადაიტანეთ.

ქოთანი სასურველია ფართე და დაბალი შეარჩიოთ.

გადარგვა შეიძლება მხოლოდ იმ დროს, როცა მცენარე გადაიყვავილებს.

ახალგაზრდა შლუმბერგერას გადარგვა ყოველ წელს სჭირდება, უფრო მოზრდილი მცენარე კი სამ წელიწადში ერთხელ შეგიძლიათ გადარგათ.

როგორ მოვუაროთ დეკემბერას?


გამრავლება

შლუმბერგერა ბუჩქის გაყოფით მრავლდება, თუმცა შეგიძლითა, ტოტებითაც დააფესვიანოთ.

ამისთვის, მცენარეს ღერო ფრთხილად, აუცილებლად ხელით უნდა წაატეხოთ, 2-3 დღით მშრალ ადგილას მოათავსოთ და შემდეგ პირდაპირ მიწაში, 1-2 სმ სიღრმეზე ჩარგოთ.

შეგიძლიათ, ზემოდან ქილა ან პლასტმასის ბოთლი დააფაროთ, თუმცა მცენარე ამის გარეშეც მშვენივრად დაფესვიანდება.

თავიდან საჭიროა მორწყვა შეუმციროთ, 1,5 -2 თვის შემდეგ კი, ჩვეულებრივი წესით მოუარეთ.

funtime.ge
































ტექსტის სანახავად გაიარეთ რეგისტრაცია.