სააღდგომო პასკის რეცეპტი ქეთი კეკელიასგან



განსაკუთრებულს არაფერს ხედავს იმაში, რომ ახალი წელი და აღდგომა მისთვის უსაყვარლესი დღესასწაულებია, თუმცა სააღდგომო სამზადისისთვის ყოველთვის უფრო ენერგიული და მონდომებულია. ცხობა და ჯეჯილის დათესვა მის ოჯახში 10 დღით ადრე იწყება და მისი სააღდგომო პასკაც განსაკუთრებულად პიკანტურია.

პასკის გამოცხობა ყოველთვის რთული და დამღლელი პროცესი ეგონა, თუმცა ,,შეუძლებელი შეძლო“ და უკვე ხუთი წელია, ოჯახის წევრებს აღდგომის დღესასწაულზე კარგად ნაცადი თუ სპონტანური რეცეპტებით აოცებს:

,,ეს იმდენად დიდი სიამოვნებაა, რომ ოჯახის წევრები ერთად ვართ ჩართულნი. პასკის გამოცხობას ვუთმობთ ერთ სრულ დღეს. მომზადებას ვიწყებთ დილის 9 საათიდან და საღამოს მისი გაფორმებით ვასრულებთ.“

ჟურნალისტი ქეთი კეკელია ქალბატონებს გამოცდილებას უზიარებს და პასკის ცხობის დაწყებამდე მათ რამდენიმე რჩევას აძლევს:

,, პირველ რიგში, უნდა გავითვალისწინოთ ის, რომ ფაფუკი ცომის მომზადებისას, იქნება ეს ნამცხვარი, ტორტი თუ პასკა, მასა უნდა მოვურიოთ ხის კოვზით და თან საათის ისრის მიმართულების საწინააღმდეგოდ.

გარდა ამისა, ფქვილი უნდა გავცრათ წინასწარ. გაცრილი ფქვილი გაჯერებულია ჟანგბადით და, შესაბამისად, ცხობისას ბევრად უფრო ჰაეროვანია.

პასკის ცხობისას დიდი მნიშვნელობა აქვს, როგორ ტემპერეტურაზე ინახებოდა ინგრედიენტები. გამოიტანეთ ყველა ინგრედიენტი მაცივრიდან და მოათავსეთ ერთ ადგილას, ოთახის ტემპერატურაზე.
თუ პასკისთვის ლითონის ფორმების ნაცვლად სპეციალურ ქაღალდებს გამოიყენებთ, ნუ შედებთ ღუმელში პასკებს ერთმანეთთან ახლოს.“

პასკის რეცეპტი ქეთი კეკელიასგან:

ინგრედიენტები:
1 ლ. რძე
3 კგ. ფქვილი
1 პაკეტი საფუარი
600 გრ. კარაქი
300 გრ. ზეთი
3 ჩ.კ. მუსკატის კაკალი
2 ჩ.კ. ილი
18 ც. კვერცხი
1,7 კგ. შაქარი
2 ჩ.კ. მარილი
0,5 კგ. ქიშმიში
2 ც. ლიმონი
შაფრანი
ცუკატები სურვილისამებრ

შენიშვნა: პასკის ცხობის წინა დღეს დაასხით 10 მლ. ადუღებული წყალი შაფრანს, იგივე კროკუსს, დაახურეთ თავსაფარი და შედგით მაცივარში. მეორე დილით კროკუსიანი წყალი მიიღებს მუქ შეფერილობას. გაწურეთ და გამოიყენეთ პასკის ცხობისას.მომზადების წესი:
აიღეთ ნახევარი ლიტრი რძე, გაათბეთ და დაუმატეთ საფუარი, 1 ჭ. შაქარი და 1 ჭ. ფქვილი. ამ ყველაფერს მოურიეთ ხის კოვზით საათის ისრის საწინააღმდეგოდ და მოათავსეთ თბილ ადგილზე 1 საათის განმავლობაში.

1 საათის გასვლის შემდეგ მასას დაამატეთ დარჩენილი რძე, მარილი, 2 კგ. გაცრილი ფქვილი, კარგად მოურიეთ და გააჩერეთ 2 საათით.

ცალკე საშუალო ზომის ჭურჭელში აურეით ერთმანეთს 1,7 კგ შაქარი და 18 ც. კვერცხი. ათქვიფეთ მიქსერით და 2 საათის გასვლის შემდეგ დაუმატეთ უკვე მომზადებულ რძიან მასას. გააჩერეთ კვლავ ერთი საათით.

მომზადების ბოლო ეტაპი – მომზადებულ და თბილ ადგილას აფუებულ მასას დაუმატეთ 600 გრამი დარბილებული კარაქი, 300 გრ. ზეთი, მუსკატის კაკალი, ქიშმიში, ილი, შაფრანი, ლიმონი, ცოტა არაყი ან კონიაკი და ურიეთ ერთი საათის განმავლობაში ხელით.

გაფორმება კი ინდივიუალურ გემოვნებაზეა დამოკიდებული. შეგიძლიათ, პასკები თეთრი ან შავი შოკოლაით გააფორმოთ, გამოიყენოთ შაქრის ფხვნილი ან სხვა გასაფორმებელი საშუალებები.
მასა გააჩერეთ ოთახის ტემპერატურაზე 3-4 საათის განმავლობაში.

თუ პასკებს ლითონის ფორმებში აკეთებთ, მაშინ წაუსვით ფორმებს ზეთი დააფინეთ მის ძირზე საცხობი ქაღალი და შედგით რამდენიმე წუთით თბილ ღუმელში. 5 წუთის გასვლის შემდეგ ჩაასხით მათში ცომი. (ფორმის ერთ-მესამედში) დაელოდეთ ცომის ამოსვლას 20 წუთით და შედგით ღუმელში გამოსაცხობად: 170 გრადუსზე 45 წუთით.

როგორც თავად ამბობს, მრავალი ნაცადი რეცეპტიდან ეს საუკეთესო არჩევანია.


წყარო: life.mediamall.ge
































ტექსტის სანახავად გაიარეთ რეგისტრაცია.