რჩევები დამწყებ მეყვავილეებს - ყვავილების მოვლა



ახალი, უცნობი მცენარის შეძენისას ბევრი მისი აგროტექნიკით, თავისებურებებით არ ინტერესდება, მისი სწორი ბოტანიკური დასახელებაც კი არ იცის. ყვავილის ბედზე ღელვას კი მხოლოდ უსიამოვნო სიმპტომების გამოვლენის შემდეგ იწყებენ.

პირველ რიგში, საჭიროა ადგილის სწორად შერჩევა. ამისთვის უნდა გაარკვიოთ, რამდენად მოწონს მცენარეს მზის სინათლე. ამით თავიდან აიცილებთ მზის მოყვარული ნემსიწვერას უმზეო რაფაზე და უნაზესი გვიმრის – სამხრეთ, მზიან ადგილზე დადგმას.

უდიდესი მნიშვნელობა აქვს მორწყვას. არასაკმარისი წყლის არსებობისას, რომელიც ნიადაგში აუცილებელ საკვებ ნივთიერებებს ხსნის, მცენარე არა მხოლოდ ვიზუალურად ჭკნება, არამედ შიმშილობს კიდეც. ზედმეტად მორწყული კი „იხრჩობა“ და ავადმყოფობს. ზედმეტად მჟავიანი მიწა ფესვების დალპობას იწვევს. ამიტომ ყოველთვის უნდა იცოდეთ, რამდენი წყალი ჭირდება ამა თუ იმ მცენარეს.

რჩევები დამწყებ მეყვავილეებს - ყვავილების მოვლა


მაგალითად, ტროპიკულ მარადმწვანე ბუჩქები, ჰიბისკუსი, კატარანტუსი, გვიმრა, ტრადესკანტია ძალიან ტენისმოყვარულია. ბეგონიას, ყველა გესნერიასებრს (სენპოლია, გლოქსინია, ქოლუმნეა, აქიმენესი, კოჰლერია და სხვ.) ზედმეტი წყლის და წყლის დაგუბების ეშინია. ხოლო წვნიანი მცენარეებისთვის (ალოე, კრასულა ანუ ე.წ „ფულის ხე“) ზედმეტი ტენი მომაკვდინებელია.

არარეგულარულად მორწყვა, ცივი წყალი, წყლის გაუფრთხილებლად დასხმა ისე, რომ მან მიწაში კარგად ვერ ჩააღწიოს – უსიამოვნო შედეგების მომტანია.

წყალი მცენარეებს უნდა დაუსხათ სპეციალური სარწყავით ან წვრილპირიანი ჩაიდნით, წყლის ნაკადი ირგვლივ შემოავლოთ და თან დაუკვირდეთ, როგორ იწოვს მიწა წყალს. ცუდი შეწოვა სუბსტრატის ან დრენაჟის მდგომარეობის დაზიანებას ნიშნავს. ხოლო თუ ქოთნის ქვესადგამი სავსეა, წყალი დროულად უნდა გადაღვაროთ.

თუ სახლში გაქვთ ყოჩივარდა, გლოქსინია, ამარილისი, პანკრაციუმი, კლივია, ბოლქვიანი ბეგონია, კარგი იქნება მორწყვის გარდა კვირაში 2–ჯერ თბილი წლით სავსე ჯამში 40–45 წუთით თუ ჩადგამთ. ამ შემთხვევაში წყალს მიიღებს ფესვების ქვედა ნაწილები, ბოლქვები კი ზედმეტად არ დატენიანდება.

რჩევები დამწყებ მეყვავილეებს - ყვავილების მოვლა


მორწყვამდე უნდა შეამოწმოთ, გაშრა თუ არა მიწა. საჭიროა მიწის რეგულარულად გაფხვიერება. კვირაში ორჯერ მცენარეებს წყალი შეასხურეთ, გარდა ხავერდოვან ფურცლიანი მცენარეებისა (გლოქსინია, სენპოლია და სხვ.). ამ მცენარეებს მტვერს თბილ წყალში დასველებული რბილი ფუნჯით აშორებენ. მათზე წყლის შესხურების შემდეგ მოყვითალო ან მოთეთრო ლაქები რჩება.

ფიკუსების, ფილოდენდრონების, პალმების, ცვილისებრი სუროს, ამარილისის კანისებრი გარსის ფოთლებს კი ორივე მხარეს რეცხავენ კიდეც.
სასუქი ოთახის ნებისმიერ მცენარეს ჭირდება. თუმცა აუცილებელია თითოეული მათგანის კვების სისტემის ცოდნა (მინერალური ნარევები, ორგანული სასუქი, დოზირება, შეტანის დრო). საჭიროა იცოდეთ, რომ ნებისმიერი დანამატი საკვები ნივთიერება მცენარეს მორწყვიდან 1 საათში უნდა მისცეთ.

განსაკუთრებით ბევრ საკვებ ნივთიერებას მოიხმარს სწრაფადმზარდი და ფესვთა ძლიერად განვითარებული სისტემის მქონე სახეობები: ამარილისებრნი, ვარდები, ჰიბისკუსი, ნემსიწვერა, ჟასმინი, ფუქსია, კლეროდენდრონი. მათთვის სასარგებლოა ორგანული და მინერალური სასუქის ცვლა.

გამოუცდელი მეყვავილეები სხვათა და ხშირად ამ საკითხში გაუცნობიერებელ პირთა რჩევით, თავიანთ მწვანე აღსაზრდელებს ხელში მოხვედრილი ნებისმიერი სასუქით კვებავენ. იყენებენ ყველაფერს: ხორცისა და თევზის ნაჭრებს, კვერცხის ნაჭუჭს, დაყენებული ჩაის ნარჩენს, ყავის ნალექს. ხანდახან მიწას ბენზინსაც კი ასხამენ. ამ ყველაფრისგან კი მიწა ბინძურდება, სუნი უჩნდება და მასში წვრილი მატლები ჩნდებიან, რისი შედეგიც საბოლოოდ მცენარის დაღუპვაა. ხშირად ასე „მზრუნველად“ ყველა ტიპის მცენარეს ერთნაირად ექცევიან.

რჩევები დამწყებ მეყვავილეებს - ყვავილების მოვლა


მცენარის გადარგვისას დაშვებული მთავარი შეცდომა მიწის საჭირო შემადგენლობის არცოდნაა. მაგალითად, გესნერიასებრი მცენარეები მძიმე, ბლანტ მიწაში იტანჯებიან, მათ მსუბუქი სუბსტრატი ჭირდება, ხოლო ბეგონიებს ფხვიერი, ჰაერ და წყალგამტარი მიწა.
ხშირად მცენარის გადარგვას საჭიროების გარეშე აკეთებენ, რადგან ფიქრობენ, რომ ეს ყვავილს უკეთ გახდის. ზოგი ამას გვიან შემოდგომაზე და ზამთარში აკეთებს, როცა ცივა და სინათლე ნაკლებია. ხშირად მცენარე საჭიროზე დიდ ჭურჭელში გადააქვთ და ზედმეტი მიწა მჟავიანდება. ზოგ შემთხვევაში კი მცენარეს საკვები ფართობი არ ყოფნის.

მაგალითად, არსებობს მოსაზრება, რომ ამარილისი ჯობს პატარა ქოთანში იყოს ჩარგული. რეალურად კი ეს მცენარე ფესვთა ძლიერი სისტემის შესაბამის ჭურჭელში გაცილებით უკეთ ხარობს. იგივე შეიძლება ითქვას ვარდებზე, ფილოდენდრონებზე, პალმაზე. ყველაზე კარგი გამოსავალი ისაა, რომ მცენარის გაფესვიანებული ლერწი ჯერ პატარა ქოთანში გქონდეთ და ზრდის პარალელურად თანდათან უფრო და უფრო დიდ ჭურჭელში გადარგოთ.

ძალიან სასარგებლოა მიწაში ან დრენაჟში ხის ნახშირის მცირე ნაჭრების ჩალაგება.

გადარგვაზე ცუდი რეაქციის მქონე მცენარეების შემთხვევაში მათი სრულად გადარგვა ყოველთვის აუცილებელი არ არის. საკმარისია მიწის ზედა ფენის ამოღება და ახალი, სუფთა მიწის დაყრა, თუ რასაკვირველია მიწის დანარჩენი ნაწილი მჟავიანი და პარაზიტებიანი არ არის. ხანდახან გადარგვის თავიდან აცილება უბრალოდ ახალ, უფრო დიდ ქოთანში გადატანით და ახალი მიწის დამატებით შეიძლება.

შეკვეცა კულტურების უმრავლესობისთვის აუცილებელია, თუმცა, მოყვარულ მეყვავილეებს ხშირად „ეცოდებათ“ თავიანთი ნემსიწვერა, ვარდი, ჰორტენზია და სხვა ლამაზი ყვავილები. ხოლო შეუკვეცავი მცენარეების ღეროები გაზაფხულზე იწელება, დეკორატიულობას კარგავს და ნაკლებად ყვავილობს. თუ შეკვეცას სწორად გააკეთებთ, მცენარეს აუცილებლად ამოუვა ახალი გვერდითა ყლორტები, რომელთაც ზედმეტებს მოაჭრით და საბოლოოდ ლამაზ, უხვად მოყვავილე ბუჩქს მიიღებთ.

ძნელად გასახარებელი მცენარის ლერწები არ უნდა ჩარგოთ არასაკმარისად გამთბარ მიწაში, არ დაასხათ ცივი წყალი და არ დატოვოთ საფარის გარეშე. კულტურების უმრავლესობას, განსაკუთრებით ადრე გაზაფხულზე, ლერწები წყალშიც იოლად უფესვიანდება. ამისთვის აიღეთ ღეროს ჯანსაღი გადანაჭრები და ჩადეთ თბილ, მარგანეცის ოდნავ ვარდისფერ ხსნარში 8 საათის განმავლობაში. შემდეგ გადაიტანეთ სუფთა წყალში, რომელსაც კვირაში ერთხელ შეცვლით.

კოლეუსი, უკადრისა, ტრადესკანცია და ბევრი სხვა ყვავილი მალე ფესვიანდება, ხოლო ჟასმინი, კლეროდენდრონი და კიდევ ზოგიერთი დიდხანს „უძრავად“ შეიძლება იყოს. გამოუცდელმა მეყვავილემ შეიძლება გადაწყვიტოს, რომ ლერწი აღარ გაფესვიანდება და ის გადააგდოს.

ჩარგვის შემდეგ ნებისმიერი მცენარის ლერწის გადახურვა აუცილებელია. საფარი შეიძლება ნებისმიერი იყოს (მინის ქილა, ცელოფანი), მაგრამ შიგნით ჰაერი უნდა თბებოდეს. განიავება აუცილებელია დილასაც და საღამოსაც. საფარი თავიდან მხოლოდ 15 წუთით, შემდეგ კი უფრო დიდი ხნითაც შეგიძლიათ მოხსნათ. როდესაც ლერწი ზრდას დაიწყებს, პირველად მხოლოდ 1 დღით, შემდეგ კი საბოლოოდ შეგიძლიათ მოხსნათ საფარი.

რჩევები დამწყებ მეყვავილეებს - ყვავილების მოვლა


პროფილაქტიკა ყოველთვის უკეთესია, ვიდრე მკურნალობა. მწვანე კულტურების დაავადებათა პროფილაქტიკისთვის საჭიროა რამდენიმე წესის დაცვა.

1. არ მოიტანოთ სახლში დაავადებული მიწა ან სანამ ყვავილებს დააყრით, დეზინფექცია გაუკეთეთ.

2. არ დადოთ მცენარე საშიშ ადგილებში: ღია ფანჯარასა და კარს შორის, სავენტილაციო მილთან ახლოს, ცუდად მორგებულ ჩარჩოებიანი ფანჯრის რაფაზე, ცუდადგანათებულ კუთხეში ან ბნელ კორიდორში.

3. ყურადღებით დაათვალიერეთ თქვენი ახალი მცენარე და სანამ თქვენი სახლის ბინადრებს გვერდით მიუდგამთ, საჭირო სამკურნალო ღონისძიებები ჩაუტარეთ.

4. დროულად მოაშორეთ მცენარეს ჭკნობაშეპარული ყვავილები და ფოთლები. ისინი შეიძლება დაობდეს, ხოლო ცივ და ტენიან გარემოში ობი ჯანსაღ ფოთლებსაც გადაედება.

წყარო: meurne.sknews.ge
































ტექსტის სანახავად გაიარეთ რეგისტრაცია.