ყველაზე გამაღიზიანებელი რჩევები ბავშვის აღზრდისას



სოციოლოგებმა შვიდ წლამდე ასაკის ბავშვების მშობლებს შორის გამოკვლევა ჩაატარეს და დაადგინეს, რომელი რჩევები აღიზიანებთ ამ პროცესში ყველაზე მეტად.
ბავშვის აღზრდა იოლი საქმე არ არის. ამიტომ გარშემო მყოფები მუდმივად ცდილობენ, საკუთარი რჩევებით დედებს ამოცანა შეუმსუბუქონ ან ამ საკითხში "პროფესორობა" გამოავლინონ.

სამწუხაროდ, ამ რჩევების უმრავლესობა ხშირად გამაღიზიანებლად მოქმედებს. მაშ ასე, რომელი რჩევები აღიზიანებთ მშობლებს ბავშვის აღზრდისას ყველაზე მეტად.

ამ სიაში პირველ ადგილზეა რჩევა, მისცენ ბავშვს საშუალება, ბოლომდე "დაიხარჯოს" ისტერიკის დროს. თანამედროვე დედებისთვის ეს მეთოდი სრულიად მიუღებელია. ამიტომ რჩევას "გაუშვი, იტიროს, რამდენიც უნდა", ისინი ნეგატიურად აღიქვამენ.

მეორე ადგილზე გავიდა რჩევა - "მოსცხე ერთი კარგად!" უფროსი თაობის წარმომადგენლები ახალგაზრდა დედებს ხშირად ურჩევენ "ზედმეტად განებივრებული" ბავშვის ფიზიკურ დასჯას, რაც მშობელს ძალიან აღიზიანებს.

ახალგაზრდა დედებს ხშირად აღიზიანებთ რჩევა, დაისვენონ და თვითონაც დაიძინონ მაშინ, როცა ბავშვს დააძინებენ. ბევრისთვის ბავშვის ძილის დრო სწორედ ის პერიოდია, როცა საოჯახო საქმეების გაკეთებაც უნდა მოასწროს. ამიტომ ამ დროს დასვენება მისთვის შეუძლებელია და ამაზე ლაპარაკი კიდევ უფრო აღიზიანებს.

კვებასთან დაკავშირებული რჩევებიც არანაკლებ გამაღიზიანებელი აღმოჩნდა. ამ საკითხში რჩევა განსაკუთრებით აღიზიანებს დედებს, რომლებიც ახალშობილს ბოთლიდან კვებავენ ან, პირიქით, მოზრდილი ბავშვი ისევ ძუძუზე ჰყავთ.

დედებს აღიზიანებთ, აგრეთვე, ნებისმიერი რჩევა, საჭიროა თუ არა, მისცენ ბავშვს ტკბილეული, მარილიანი, ცხიმიანი საკვები და სხვა.

გამაღიზიანებელია დედებისთვის ბავშვის ჩაცმასთან დაკავშირებული შენიშვნებიც. გარეშე პირის მიერ ნათქვამმა "ამ სვიტერში ძალიან ხომ არ დასცხება" ან "ეს ქუდი ძალიან თხელია და შესცივდება" შეიძლება ყველაზე მშვიდ დედასაც კი დააკარგვინოს წონასწორობა.

ასევე აღიზიანებს დედებს, როცა ურჩევენ, როგორ გადაადგილდეს ბავშვთან ერთად - ზოგს ხელში უჭირავს ბავშვი, ზოგსაც "კენგურუში" უზის. ამ დროს ვინმეს ნათქვამმა - "უკვე დიდია, ხელში აყვანილი რატომ დაგყავს, თავისით იაროს" ან "ამ "კენგურუში" ბავშვს სქოლიოზი განუვითარდება", შეიძლება, დედა წყობიდან გამოიყვანოს.

მორიგი რჩევა, რაც დედების გაღიზიანებას იწვევს, საზოგადოებრივ ადგილებში გაჭირვეულებული ბავშვის დამშვიდებას შეეხება. პატარებს ხომ არ შეუძლიათ საკუთარი ემოციების კონტროლი, მშობლები კი ყოველთვის ვერ ახერხებენ მათ დამშვიდებას. დედა ამ დროს ისედაც ნერვიულობს და გარეშესგან კიდევ მითითება იმისა, რომ ბავშვი როგორმე დაამშვიდოს, რა თქმა უნდა, გააღიზიანებს.
































ტექსტის სანახავად გაიარეთ რეგისტრაცია.