ცნობილია, რომ ლინზების ტარება არ არის რეკომენდებული დღეში რვა საათზე უფრო მეტხანს, მაგრამ ბევრი არ აქცევს ყურადღებას ამ რეკომენდაციას და გაცილებით დიდხანსაც ატარებს მათ. 33 წლის ლონდონელი მოდელიერი ეიმი მაკ-უილიამსიც ჩვეულებრივ ფორმალობად მიიჩნევდა ამ წესს, მაგრამ ერთხელაც თვალის ექიმთან რომ მივიდა, აღმოაჩინა - მხედველობის დაკარგვის საფრთხის ქვეშ იდგა.
„14 წლიდან ვატარებ ლინზებს. ადრე დილის 7 საათიდან შუაღამემდეც კი მეკეთა და არც კი მივარაუდია, რომ ეს რაიმე ცუდს გამოიწვევდა. რაც ყველაზე საგანგაშოა, არავითარი ნიშანი არ მქონია, რომ თვალებზე რაიმე პრობლემა იყო, სინამდვილეში კი სერიოზული პრობლემები განმივითარდა“, - იხსენებს მაკ-უილიამსი, რომელმაც ატეხა აჟიოტაჟი და საზოგადოებას მოუწოდა, მეტი სიფრთხილით მოეკიდონ რეკომენდაციებს.
თვალის რქოვანა სხეულის ერთადერთი ნაწილია, რომელიც ჟანგბადით იკვებება არა სისხლიდან, არამედ უშუალოდ ჰაერიდან. ლინზის ხანგრძლივი ხმარებისას თვალი ჟანგბადს ვერ იღებს სათანადოდ. მართალია, პრობლემა არ ჩანს, მაგრამ როცა უკვე სიმპტომები ჩნდება, დაგვიანებულია ხოლმე. თუ რქოვანას არ ჰყოფნის ჟანგბადი, ორგანიზმი ცდილობს, ამას თვითონ გაუმკლავდეს და რქოვანაზე სისხლძარღვები ჩნდება.
მათი გაჩენის შედეგად რქოვანა შეიძლება გაუმჭვირვალი გახდეს და ადამიანმა მხედველობა დაკარგოს. ეს პროცესი შეიძლება წლობით გრძელდებოდეს და მხოლოდ საბოლოოდ, უკვე საკმაოდ გვიან იგრძნოს ადამიანმა საშიში სიმპტომები.
ექიმები ურჩევენ ყველას, ვინც ლინზებს იყენებს, ახალი სილიკონ-ჰიდროგელური ლინზებით ისარგებლონ, რომლებიც აირგამტარია. არც მათი გამოყენება შეიძლება მთელი დღე, მაგრამ შედარებით უსაფრთხოა.
წყარო: etanews.ge
|
|
|
|
|
|
|
|
|
|
|
|
