ყველაფერი დამოკიდებულია - ქალზე



ახალგაზრდა ცოლებისათვის რჩევების მიცემის მოყვარულები ამბობენ, რომ მამაკაცს, რომელსაც ყველაფერში უფროსობა სურს, ქალმა აუცილებლად უნდა შეუქმნას ამ “უფროსობის” ილუზია და ასეთ ფონზე მოხერხებულად და მოხდენილად განახორციელოს საკუთარი გეგმები. ქალების უმრავლესობას ეხერხება მამაკაცის იმაში დარწმუნება, რომ მან თვითონ მიიღო ის გადაწყვეტილება, რომელიც სინამდვილეში უკვე დიდი ხნის წინ მიიღო ქალმა. უმთავრესად, ამგვარ ფსიქოლოგიურ თამაშს ეფუძნება ოჯახური ურთიერთობები.

მაგრამ მაინც იშვიათია ოჯახები, რომლებიც კონფლიქტის გარეშე ცხოვრობენ. კონფლიქტების თავიდან აცილების უნივერსალური რეცეპტი, რა თქმა უნდა, არ არსებობს, რადგან თითოეულ ოჯახში ის განსაკუთრებულ ხასიათსა და ნიუანსებს იძენს. თუმცა, კონფლიქტის ზოგადი ბუნების კვლევა მისი მოგვარების საშუალების პოვნაში აუცილებლად დაგვეხმარება. თითოეული შეხლა-შემოხლის მოგვარების ბედი, პირველ რიგში, იმაზეა დამოკიდებული, თუ რამდენად არის ამაში დაინტერესებული კონფლიქტის ორივე მხარე.

რა თქმა უნდა, ყველა ქალს სურს ოჯახში სიმშვიდისა და თბილი ურთიერთობების შენარჩუნება. ბევრი რამ სწორედ მასზეა დამოკიდებული. ოჯახურ ურთიერთობებში გამოცდილი ქალები ამბობენ, რომ მოთმინება და მხნეობა ხშირად თვით სიყვარულის გრძნობაზე მნიშვნელოვანია, ხოლო ცოლქმრობა ურთიერთობების შენებისთვის გაწეულ ყოველდღიურ შრომას გულისხმობს. ნებისმიერი ქორწინების წარმატებულობა მეტწილად ერთ-ერთი მხარის კომპრომისისა და დათმობის უნარზეა დამოკიდებული. გსურთ მეუღლის - მისი სიყვარულის, სიახლოვისა და პატივისცემის შენარჩუნება? - დაუჯერეთ კეთილ რჩევებს.

გულწრფელად და ერთგულად გიყვარდეთ მამაკაცი, რომელიც ამოირჩიეთ. ენდეთ მას, ნუ დაამცირებთ წვრილმანების გამოკითხვითა და ჩაციებით. მამაკაცმა უნდა დაინახოს, რომ მისი გჯერათ. ნდობა იწვევს საპასუხო ნდობას, თქვენს გრძნობებსა და ქცევებში დარწმუნებას, რაც, საბოლოოდ აერთიანებს ორ ადამიანს.
მყუდრო ოჯახური გარემოს შექმნა ქალის საქმეა. ამიტომ, ნუ დაიშურებთ ძალისხმევას. დაანახეთ ქმარს, რომ მას ელოდებით, რომ ის ყოველთვის საყვარელი და სასურველია თქვენთვის. ამასთან, ნუ დაივიწყებთ, რომ ხანდახან განმარტოვების სურვილი სრულიად ბუნებრივია, როგორც მამაკაცისთვის, ასევე, ქალისთვის. გამოიჩინეთ ყურადღება ისე, რომ თავი არ მოაბეზროთ, თანაგრძნობა - ისე, რომ სულში არ ჩაუძვრეთ.

ნუ ეცდებით მეუღლის თავიდან აღზრდას და თქვენი წამოდგენებისამებრ მის გამოსწორებას. ეს არასერიოზული ნაბიჯი იქნება თქვენი მხრიდან და აუცილებლად შეხვდებით ჯერ პასიურ, ხოლო შემდეგ _ აქტიურ წინააღმდეგობას.

მაშინაც კი, თუ სიტყვაძვირი ქმარი შეგხვდათ, ნუ დაიშურებთ მისთვის ალერსიან სიტყვებს. ყოველთვის აღნიშნეთ მისი ის თვისებები, რომელსაც აფასებთ, ან ისურვებდით, რომ მასში დაგენახათ - ერთგულება, საიმედოობა, თავდადებულობა და ხელგაშლილობა თქვენს მიმართ.

ნუ მოეშვებით. განსაკუთრებული ყურადღება მიაქციეთ თქვენს გარეგნობას. ერთ ოჯახში ცხოვრება არ ნიშნავს, რომ ყოველდღე ხალათში ჩაცმული ეჩვენოთ მას. არავითარი ბიგუდები, დახეული ჩუსტები, გაცრეცილი მაისურები და სხვა ატრიბუტები? ხომ არ გგონიათ, რომ გათხოვებასთან ერთად ცხოვრება დამთავრდა? ყოველთვის გახსოვდეთ, რომ ლამაზი ქალი ხართ და თქვენი ქმარიც არასოდეს დაივიწყებს ამას.
ნუ შეუშლით ქმარს ხელს მეგობრებთან ურთიერთობაში. შეეგუეთ იმ აზრს, რომ თქვენს მეუღლეს საკუთარი ცხოვრება გააჩნია. ის თქვენც გაქვთ. ამიტომ იცხოვრეთ არა მხოლოდ ოჯახური, არამედ თქვენი საკუთარი ცხოვრებით. მის გამო ნუ იტყვით უარს საკუთარ მეგობრებზე, ჰობბისა და ინტერესებზე.

ნუ დაავალდებულებთ იმას, რასაც თქვენ აკეთებთ: დიეტის დაცვას, ბუტიკებში სიარულს, სეზონის მოდურ ტენდენციებში გარკვევას, ან ფრჩხილების ლაქის ფერების გარჩევას. ამგვარი "სისულელეები" მას არ აინტერესებს. დააცდეთ მას ფეხბურთის მატჩის ყურება, ჩიფსებისა და სხვა ამგვარი საძაგლობის ჭამა და ხმის ჩახლეჩვამდე მეგობრებთან ნავთობის ბარელის ღირებულებაზე კამათი. პატივი ეცით სხვის ჩვევებს და თქვენი გატაცებების მიმართაც იგივე დამოკიდებულებას იგრძნობთ.

დიდი ყურადღებით მოეკიდეთ ყველაფერს, რაც მის სამუშაოს შეეხება. უდავო ფაქტად აღიარეთ, რომ მისთვის საყვარელი საქმიანობა მთავარია ცხოვრებაში. მზად იყავით ამ პატარა მსხვერპლის გაღებისათვის. არ დაივიწყოთ, რომ მისი სამსახური თქვენი ოჯახური კეთილდღეობის საწინდარია.

შეინარჩუნეთ დამოუკიდებლობა ქმრის გვერდით. ნუ დაემსგავსებით პატარა გოგონას, რომელიც მამაკაცის გარეშე ნაბიჯსაც ვერ დგამს. მაგრამ ნურც გადააჭარბებთ: მამაკაცი უნდა გრძნობდეს, რომ ქალს მისი დაცვა და თანადგომა სჭირდება, რომ ის სწორედ ის ადამიანია, რომელსაც ქალი იმედიანად დააყრდნობდა მხარზე თავს. ამიტომ, დაინტერესდით მისი მოსაზრებით, ჰკითხეთ რჩევა, აჩვენეთ, რომ ის თქვენთვის ავტორიტეტია.

ნუ მოუყვებით ნურავის თქვენი ურთიერთობების, განსაკუთრებით კი ინტიმური საკითხების შესახებ, ნუ დასცინებთ მას და ნურასოდეს გამოაჭენებთ არასასურველ საზოგადოებაში. თავი შეიკავეთ მისი გამონათქვამების დამამცირებელი კომენტარებისაგან. ღირსეულად მოექეცით და პატივი ეცით თქვენს მეუღლეს. მისდამი განსაკუთრებულ კორექტულობას გირჩევთ მისი მეგობრებისა და ნათესავების წრეში.

ნურასოდეს გააკრიტიკებთ და დასცინებთ საკუთარ და მეუღლის მშობლებს. ყველაფერი მოიმოქმედეთ მისი ნათესავების, განსაკუთრებით კი დედისთვის თავის მოსაწონებლად. ხშირად შეაქეთ ქმარი მათი თანდასწრებით, გამოხატეთ მათ მიმართ პატივისცემა და მოწონება. მაშინაც კი, თუ ეს ასე არ არის. ისინი ხომ ის ადამიანები არიან, რომელთაც თქვენი მეუღლე აღმერთებს. ასე რომ, უნდა შეეგუოთ ამ ფაქტს.

იზრუნეთ საკუთარ სტატუსზე, მაშინაც კი, როცა ოჯახში თავს მყარად გრძნობთ. რაც უნდა სასაცილოდ მოგეჩვენოთ, თუ ქალი ქმრის თვალში ფასობს, მამაკაცი ფიქრობს, რომ ის ჯილდოდ ერგო მას. ე.ი. გამუდმებით საჭიროა მისი მოპოვება. და მართლაც, რა შეიძლება იყოს მამაკაცისთვის გარემომცველ სამყაროსთან ბრძოლის ფასად ნადავლის მოპოვებაზე უფრო სასურველი?! ასე რომ, იყავით ქალი, რომელსაც მამაკაცი პრიზად, ბედის საჩუქრად აღიქვამს, და თქვენს ცხოვრებაში ყველაფერი კარგად იქნება.

წყარო: eva.ge
































ტექსტის სანახავად გაიარეთ რეგისტრაცია.