ჯიბლიბო – რა სიგნალს გვაძლევს ორგანიზმი?



ჯიბლიბო ქუთუთოების ანთებითი დაავადებაა, რომელიც ჩირქოვანი გამონადენითა და ტკივილით ხასიათდება. არასწორი მკურნალობის შემთხვევაში შესაძლოა, რეგიონალურ სისხლძარღვოვან სისტემაში ინფექციის გავრცელებითაც გართულდეს.
რა იწვევს ჯიბლიბოს, როგორია მისი სიმპტომები და რა უნდა გავითვალისწინოთ მისი მკურნალობისას?! „რუბრიკას“ ექიმი-ოფთალმოლოგი მანანა ხუბულია ესაუბრა:

რა არის ჯიბლიბო?

ჯიბლიბო თმის ფოლიკულის ან წამწამის ძირში განლაგებული ცხიმოვანი ჯირკვლის მწვავე ჩირქოვანი ანთებაა. გამოყოფენ ასევე, შიდა ჯიბლიბოს, ე.წ. მეიბომიტს, რომლის დროსაც ქუთუთოს ხრტილის ჯირკვლის ჩირქოვანი ანთება ვითარდება.


გამომწვევი მიზეზები

ჯიბლიბოს ძირითადი გამომწვევია ბაქტერიული ინფექცია (90-95% -ში ოქროსფერი სტაფილოკოკი).

ჯიბლიბოს განვითარების რისკ-ფაქტორებს კი წარმოადგენს:
ორგანიზმის ზოგადი სისუსტე და იმუნიტეტის დაქვეითება (შეიძლება ითქვას, ჯიბლიბო სიგნალია იმისა, რომ იმუნურ სისტემაში რაღაც პრობლემებია);
ორგანიზმის ზოგადი გადაცივება;
ავიტამინოზი;
საჭმლის მომნელებელი სისტემის ზოგიერთი ქრონიკული დაავადება;
ენდოკრინული დარღვევები (ხშირად, ჯიბლიბო შეიძლება იყოს შაქრიანი დიაბეტის გამოვლინება);
თვალის დაბინძურება;
სხვადასხვა კოსმეტიკური საშუალებები და ა.შ.
ჯიბლიბო გაცილებით ხშირად ვითარდება ქალებში, რასაც, როგორც უკვე მოგახსენეთ, კოსმეტიკური საშუალებების მოხმარება განაპირობებს.


დაავადების სიმპტომები და მიმდინარეობა

ჯიბლიბოს დროს აღინიშნება:
ქუთუთოს ანთება და შეშუპება;
მტკივნეულობა;
კონიუნქტივის სიწითლე;
ქუთუთოს კიდეზე წარმოიქმნება მტკივნეული შესიება, რომელზეც 2-4 დღის შემდეგ ჩნდება მოყვითალო თავი, საიდანაც ჩირქი და ნეკროზირებული ქსოვილების ნაწილები გადმოედინება.
ზოგ შემთხვევაში შესაძლებელია აღინიშნებოდეს:
თავის ტკივილები;
სხეულის ტემპერატურის მომატება;
ახლომდებარე ლიმფური ჯირკვლების გადიდება.
მსგავსი კლინიკური სურათი შეინიშნება შიდა ჯიბლიბოს შემთხვევაშიც, მხოლოდ იმ განსხვავებით, რომ შიდა ჯიბლიბოს დროს ანთება ნაკლებად მწვავედ მიმდინარეობს.


შესაძლო გართულებები

ჯიბლიბოდან ზეწოლით ჩირქის გამოდევნას შესაძლოა მოჰყვეს რეგიონალურ სისხლძაღოვან სისტემაში ინფექციის გავრცელება, რაც საბოლოოდ თვალბუდის ფლეგმონით, მენინგიტით (თავის ტვინის გარსის ანთება) ან სეფსისით შეიძლება დასრულდეს.


დიაგნოსტიკა

ჯიბლიბოს დიაგნოზის დასმა ვიზუალური დათვალიერებით არის შესაძლებელი, მაგრამ აუცილებლად უნდა მოხდეს მისი დიფერენცირება ისეთი სერიოზული დაავადებებისგან, როგორიცაა: ქალაზიონი (იგივე ხოშკაკალა), სიმსივნური წარმონაქმნი და ა.შ. საქმე იმაშია, რომ ეს დაავადებები ჯიბლიბოს მსგავსი სიმპტომებით ხასიათდებიან. იმ შემთხვევაში, თუ ჯიბლიბოს შემთხვევა განმეორდა, საჭიროა სათანადო გამოკვლევის ჩატარება შესაძლო გამომწვევი და ხელშემწყობი ფაქტორების გამოსავლენად.


მკურნალობა

ჯიბლიბომ შეიძლება, მკურნალობის გარეშეც გაიაროს, თუმცა გამოჯანმრთელების პროცესი მკურნალობის გარეშე უფრო მტკივნეული და ხანგრძლივი იქნება. ამიტომ შეგიძლიათ ჯიბლიბოს მომწიფების პროცესი მშრალი სითბოთი ან ადგილობრივად ბრილიანტის მწვანით დამუშავებით დააჩქაროთ. მშრალი სითბოსთვის შეგიძლიათ, სტერილურ მარლაში გადახვეული მოხარშული კვერცხის გამოყენება. მოხარშული კვერცხი დიდხანს ინარჩუნებს სითბოს, რაც ხელს შეუწყობს ანთებითი პროცესის მომწიფებას და ჯიბლიბოს თავის გახსნას.
იმ შემთხვევაში, თუ მდგომარეობა რამდენიმედღიანი მკურნალობის შემდეგაც არ გაუმჯობესდა, აუცილებლად მიმართეთ ექიმს, რადგან ასეთ დროს აუცილებელია ჯიბლიბოს მკურნალობაში ანტიბიოტიკების, არასტეროიდული და ანთების საწინააღმდეგო პრეპარატების ჩართვა. ჯიბლიბოს სამკურნალოდ გამოიყენება მალამოები, რომლებიც ასევე ანტიბიოტიკებს და სულფანილამიდებს შეიცავს. გარდა ამისა, მკურნალობის პროცესში შესაძლოა საჭირო გახდეს სხივური თერაპიის გამოყენებაც.
ჯიბლიბოს მკურნალობის პერიოდში საჭიროა ჰიგიენის დაცვა და დაუშვებელია კოსმეტიკური საშუალებების გამოყენება. არ არის რეკომენდირებული კომპრესები და სველი საფენების გამოყენება, ამან შეიძლება უარყოფითად იმომოდოს და პირიქით, ხელი შეუწყოს ინფექციის გავრცელებას.
აბსცესის (კაფსულით შემოსაზღვრული ჩირქოვანი ანთების კერა) წარმოქმნისას ან შიდა ჯიბლიბოს გართულების შემთხვევაში შესაძლოა, საჭირო გახდეს ქირურგიული ჩარევა.


პროფილაქტიკა

ჯიბლიბოს პროფილაქტიკაში ყველაზე მნიშვნელოვანია:
იმუნური სისტემის გაძლიერება და ჰიგიენის დაცვა (გამოიყენეთ მხოლოდ თქვენთვის განკუთვნილი პირსახოცი და კოსმეტიკა);
არ შეეხოთ თვალებს ხელებით (განსაკუთრებით მაშინ, როცა ხელები ჭუჭყიანი გაქვთ); ყოველ საღამოს დაიბანეთ სახე და მოიშორეთ მაკიაჟი.

galanews.ge
































ტექსტის სანახავად გაიარეთ რეგისტრაცია.