ბოლოკის ხსენებაზე თვალწინ კვასკვასა წითლისა და თეთრის კომბინაციით ცნობილი ძირხვენა ბოსტნეული წარმოგვიდგება. მაგრამ არსებობს შავი ბოლოკიც – ძვირფასი სამკურნალო პროდუქტი, რომელსაც უაღრესად სასარგებლო თვისებები აქვს და მისი ფასი თბილისის ბაზრებში არცთუ ისე მაღალია – კილოგრამი 3-4 ლარი ღირს.
ხალხური მედიცინის სპეციალისტები დიდი ხანია, რაც მას სხვადასხვა დაავადებების სამკურნალოდ იყენებენ. შავი ბოლოკის სამკურნალო თვისებების შესახებ ჯერ კიდევ ჰიპოკრატე საუბრობდა. ამ კულტურას ფართოდ მოიხმარდნენ ძველ საბერძნეთში – საკვებადაც და სამკურნალოდაც, მცენარის ფესვებიდან კი ზეთს ხდიდნენ.
შავი ბოლოკის შემადგენლობა
შავი ბოლოკი დიდი რაოდენობით შეიცავს ნახშირწყლებს, ცილებს, მინერალურ ნივთიერებებს, გლუკოზიდებსა და ფიტონციდებს. ძირხვენაში მოიპოვება В და С ჯგუფის ვიტამინები, რომლებიც აუცილებელია ადამიანის ორგანიზმის გამართული მუშაობისთვის.
შავი ბოლოკის მიღება სასურველია უმი სახით.
100 გრამ პროდუქტშია: თითქმის 2 გრ. ცილა, 0,2 გრ. ცხიმი, 6,7 გრ. ნახშირწყლები, 2,1 გრ. უჯრედისი, ასევე ორგანული მჟავები, წყლი, სახამებელი, მონო- და დისაქარიდები. ასევე, შავ ბოლოკში მოიპოვება ვიტამინები РР (0,3 მგ), А (3 მკგ), ბეტა-კაროტინი (0,02 მგ), В ჯგუფის ვიტამინები: В1 (0,03 თიამინი), В2 (0,03 მგ რიბოფლავინი), В5 (0,2 მგ პანტოთენის მჟავა), В6 (0,06 მგ პირიდოქსინი), Е (29 მგ). პროდუქტის კალორიულობა, სულ რაღაც, 36 კილოკალორია, ამის გამო, შავი ბოლოკის გამოყენება რეკომენდებულია ყველასთვის, ვისაც წონის დაკლება სურს.
შავი ბოლოკის ზემოქმედება ორგანიზმზე
ნატრიუმის, კალიუმის, კალციუმის, რკინის, იოდის, ფოსფორისა და სხვა ელემენტების დიდი რაოდენობა შავ ბოლოკს სასარგებლო ნივთიერებების საბადოდ აქცევს.
ეს განსაკუთრებით დასაფასებელია ადრეულ გაზაფხულზე, როდესაც ადამიანის ორგანიზმი სხვადასხვა დაავადებების მიმართ ნაკლებ რეზისტენტულია. მაგრამ, შავი ბოლოკი განსაკუთრებით ფასობს ნივთიერება ლიზოციმის შემცველობის გამო, რომელიც ჩვენს ორგანიზმში სოკოსა და ბაქტერიების გავრცელებას ბლოკავს.
ასევე, შავი ბოლოკი შეიცავს გლიკოზიდებს – ეს ორმაგად ანტიმიკრობულ მოქმედებას ნიშნავს.
ამ ძირხვენის გამოყენება, უჯრედისის მაღალი შემცველობის გამო, დადებითად მოქმედებს ადამიანის საჭმლის მომნელებელ სისტემაზე, არეგულირებს კუჭ-ნაწლავის მოქმედებას, ებრძვის ყაბზობას, კვებავს საჭმლის მომნელებელი სისტემის უჯრედებს. გარდა ამისა, შავი ბოლოკის გამოყენება ეფექტურია გრიპოზული დაავადებების, შარდკენჭოვანი დაავადებების, სხვადასხვა ლოკალიზაციის შეშუპებებისა და ათეროსკლეროზის დროს.
ფიტონციდების (მცენარეების მიერ პროდუცირებული ბაქტეროციდული ნივთიერებები) რაოდენობით შავი ბოლოკი ხახვს უტოლდება. სწორედ ეს ნივთიერებები ანიჭებს მას მოცხარო გემოს. შავ ბოლოკში შემავალ ფიტონციდებს იმდენად მძლავრი ბაქტეროციდული თვისებები აქვს, რომ მათ ანტიბიოტიკების ჩანაცვლებაც კი შეუძლიათ. ამის გამო, შავ ბოლოკს აქტიურად ურჩევენ ბრონქიტით, პნევმონიით, ყივანახველით, ანგინით, გრიპით დაავადებულებს. ის ასევე შეუცვლელია დისბაქტერიოზის დროს, ნაწლავის მიკროფლორის გასაჯანსაღებლად.
კალიუმის მარილების მაღალი შემცველობის წყალობით ძირხვენას უნიშნავენ მაღალი წნევისა და პრობლემური სისხლძარღვების დროს. ის აუმჯობესებს ნივთიერებათა ცვლას, აქვს ორგანიზმის იმუნომასტიმულირებელი და გამაძლიერებელი თვისებები. შავ ბოლოკში შემავალი ნივთიერებები ორგანიზმიდან გამოდევნის ჭარბ ქოლესტერინს, ტოქსინებს, შლაკებს და წმენდს სისხლძარღვებს. ასევე, შავი ბოლოკის სალათი ხელს უწყობს სანაღვლე გზების, თირკმლისა და ნაღვლის კენჭების დაშლას. ძირხვენის გამოყენება ღვიძლის დაავადებების წარმოქმნისგან გვიცავს, მათ შორის – ღვიძლის ცხიმოვანი დისტროფიისგან.
თუ სისხლძარღვების გაწმენდა, დაღლილობისგან თავის დაღწევა, კუჭ-ნაწლავის დაავადებების, პირღებინებისა და თავის ტკივილის პრევენცია გსურთ, თქვენს რაციონში ჩართეთ შავი ბოლოკი. ამით თქვენს ორგანიზმს დაიცავთ გრიპოზული დაავადებებისგან, მას ვიტამინების, მიკრო და მაკროელემენტების მთელ საბადოს მიაწოდებთ, თან სრულიად მიზერულ ფასად.
შავი ბოლოკის უკუჩვენებები
მიუხედავად იმისა, რომ შავი ბოლოკი უამრავი სასარგებლო თვისებით გამოირჩევა, მისი გამოყენება ზოგიერთ შემთხვევაში უკუნაჩვენებია. ძირხვენას საკუთარ რაციონში ვერ შეიტანენ გასტრიტებისა და მომატებული მჟავიანობის, გულის ზოგიერთი დაავადების, თირკმელებისა და ღვიძლის ანთებითი პროცესების, პოდაგრის (ნიკრისის ქარები), ენტეროკოლიტის, წყლულოვანი დაავადებების მქონე ადამიანები და ორსულები.
დასახელებული პროდუქტის სამკურნალო მიზნით გამოყენების შემთხვევაში, უმჯობესი იქნება, მიმართოთ სპეციალისტს.
galanews.ge
|
|
|
|
|
|
|
|
|
|
|
|
