წიწმატის მაცოცხლებელი ძალა



ქართულ სასაუბრო ლექსიკონში ბევრი მცენარე ვერ დაიკვეხნის ისეთი პოპულარობით, როგორც წიწმატი. სიტყვა „გაწიწმატდა“ ისევე მყარად არის დამკვიდრებული, როგორც „აპილპილდა“ ან „გაცხარდა“, რაც ჩვენში ამ კულტურის გამოყენების ძირძველ ტრადიციაზე მიუთითებს.

წიწმატის სასარგებლო თვისებებზე ჯერ კიდევ ძველბერძნულ და რომაულ წყაროებშია საუბარი.

ჰიპოკრატე ამტკიცებდა, რომ წიწმატი წმენდს სისხლს და ავადმყოფს სასიცოცხლო ძალებს უბრუნებს.

ძველ ეგვიპტეში კი წიწმატისგან გამოხდილი ზეთით, სქესობრივი ლტოლვის დაქვეითებას მკურნალობდნენ, როგორც ქალებში, ისევე კაცებში.

შუა საუკუნეებში წიწმატი აქტიურად მოჰყავდათ ევროპაში. მას განსაკუთრებით დიდი დაფასება გერმანიაში ჰქონდა.

ჯვაროსანთა ოჯახის ამ მცენარეს რამდენიმე სახეობა აქვს, სწრაფად იზრდება, ყინვაგამძლეა და ნიადაგის მიმართ უპრეტენზიო.

ბევრს ის იმიტომ მოსწონს, რომ მოცხარო, პიკანტური გემო აქვს, რაღაცით პირშუშხას ჩამოჰგავს, ბოტანიკოსებს კი მიაჩნიათ, რომ მისი გემო სხვადასხვა გემოთა ნაზავს წარმოადგენს.

წიწმატის შემადგენლობა

წიწმატის თითქმის ყველა სახეობის ქიმიური შემადგენლობა პრაქტიკულად იდენტურია და მათ შორის მხოლოდ არაარსებითი განსხვავებაა.
მასში შემავალი ვიტამინებისა და სხვა სასარგებლო ნივთიერებების რაოდენობა შთამბეჭდავია, მათი შეხამება კი – ძალზე წარმატებული.
ეს გახლავთ კაროტინი, А, Е, С, К, D, РР და В ჯგუფის თითქმის ყველა ვიტამინი, მინერალები: ფოსფორი, კალციუმი, მაგნიუმი, რკინა, იოდი;
ასევე, ცილები, ნახშირწყლები, ეთერზეთები, გლიკოზიდი, ალკალოიდი ლეპიდინი, ფლავონოიდები და ზეთი.

სასარგებლო თვისებები

წიწმატის რეგულარულად გამოყენების შემთხვევაში, ჩვენს ორგანიზმს ის ბევრ სასარგებლო სამსახურს გაუწევს:
აუმჯობესებს მადას, აწესრიგებს მონელების პროცესს, დევნის ტოქსინებსა და შლაკებს და არეგულირებს სისხლის წნევას.
ხალხური მედიცინა წიწმატს უხსოვარი დროიდან იყენებს, როგორც ორგანიზმის იმუნიტეტის გამაძლიერებელ და ანთების საწინააღმდეგო, ასევე შარდმდენ, ამოსახველებელ, დამამშვიდებელ, ანტისკლეროზულ საშუალებას.
წიწმატს ანტიოქსიდური თვისებები აქვს, უხდება დეპრესიულ მდგომარეობას და აუმჯობესებს ძილს.
დიდი ხანი არაა, რაც ოფიციალურმა მედიცინამ წიწმატი თვალის დაავადებათა საპროფილაქტიკო საშუალებათა შორის დაასახელა. მისი რაციონში ჩართვა თავიდან აგვაცილებს კატარაქტის წარმოქმნას და აქვეითებს კიბოს წარმოქმნის ალბათობას. წიწმატის ფოთლებით ხალხური მედიცინა დამწვრობებს, კანის დაავადებებს, ჭრილობებსა და წყლულებს მკურნალობს. ის რეკომენდებულია გაციების დროს, განსაკუთრებით ბრონქიტისა და მდგრადი ხველის დროს, ასევე, ნაღველკენჭოვანი დაავადებებისა და სახსრების ტკივილისას.

წიწმატი დამხმარე საშუალებად გამოიყენება პროსტატიტისა და ონკოლოგიური დაავადებების მკურნალობისას. თანამედროვე მედიცინამ მასში სისხლის უჯრედების მთლიანობის უზრუნველმყოფი ნივთიერებები აღმოაჩინა – ამგვარად, სისხლის კიბოს განვითარების ალბათობა მისი გამოყენებისას მკვეთრად ქვეითდება.

თუ წიწმატს ყოველდღიურად მივირთმევთ, ძილი გაგვიუმჯობესდება და სტრესის დამანგრეველი გავლენა შემცირდება.

პაროდონტოზის (ღრძილების დაავადება) და კბილების სხვა დაავადებების პროფილაქტიკისთვის, საჭიროა ყოველდღიურად მივიღოთ ქორფა წიწმატი.

წიწმატი კოსმეტოლოგიაში

კოსმეტოლოგიაში გამოიყენება როგორც თავად წიწმატი, ასევე, მისი წვენი და ზეთი: ეს ყველაფერი საოცრად უხდება კანისა და თმის მოვლას – თმა ჯანსაღი და ლამაზი ხდება, კანი კი იწმინდება და ხალისდება. განსაკუთრებით ეფექტურია წიწმატის ნიღბების გამოყენება გამონაყარის, განსაკუთრებით ჩირქოვანის, დროს. სილამაზის სალონებში მას, სხვა კომპონენტებთან ერთად, ანთების საწინააღმდეგო შრატად იყენებენ.

წიწმატის უკუჩვენებები

წიწმატის უკუჩვენებები პრაქტიკულად უცნობია და შესაძლოა, აისახოს მხოლოდ ამ პროდუქტის ინდივიდუალურ მიუღებლობაზე, რაც სხვადასხვა ალერგიულ რეაქციებში შეიძლება გამოიხატოს.

galanews.ge
































ტექსტის სანახავად გაიარეთ რეგისტრაცია.