სილამაზის უჩვეულო პროცედურები, საინტერესო რეცეპტები და რჩევები ვარსკვლავებისგან



ვარსკვლავები სილამაზეს მხოლოდ პლასტიკური ოპერაციებითა და ძვირად ღირებული კრემებით როდი აღწევენ. მათაც აქვთ ნაცადი და ”ბებიების” რეცეპტები, რომლებითაც მშვენიერ ეფექტს აღწევენ:

მექსიკელი კინოვარსკვლავი სალმა ჰაიეკი ერთხელ ჟურნალისტებს გამოუტყდა, რომ ფიგურის შესანარჩუნებლად მწერებს მიირთმევს: ”შემწვარი ჭიანჭველები და მატლები ძალიან სასარგებლოა ავოკადოსთან ერთად, ხოლო პატარა კალიებს არაჩვეულებრივი არომატი და გემო აქვს”.

ლეგენდარული ვარსკვლავი სოფი ლორენი, რომელიც დღესაც სილამაზის ეტალონად ითვლება, ქალებს ბევრი წყლის დალევას ურჩევს. ”დღეში 7 ჭიქა მინერალური, უგაზო წყალი სვით”. გარდა ამისა, ლორენი კანის ელასტიკურობისთვის ყოველდღე სახეს ცივი წყლით სავსე თასში ყოფს, სადაც ყინულის ნაჭრები დაცურავს.

თუ დაკვირვებიხართ, გვენ სტეფანს ყოველთვის წითელი ფერის პომადა უსვია. მისი კბილები კი ქათქათა თეთრი ჩანს. ამ ეფექტს გვენი ძალიან მარტივად აღწევს: წითელ პომადაზე თხლად ისვამს გამჭვირვალე ცისფერ ტუჩის საცხს.

ამერიკელი მსახიობი სარა ჯესიკა პარკერი სახეზე ცხიმის მოსაშორებლად ტუალეტის ერთჯერად დასაფენებს იყენებს. ”რატომ გადავიხადო სახის ხელსახოცებში 50 დოლარი, თუ ნებისმიერ რესტორანსა და სასტუმროში მეგულება უნიტაზზე დასაფენი ქაღალდი?! ის შესანიშნავად მაშორებს ცხიმს და მაკიაჟსაც მინარჩუნებს”.

ანჯელინა ჯოლის აზრით, საბავშვო ტალკი მშრალი შამპუნის ეფექტს ქმნის და მისი გამოყენება აუცილებელია მაშინ, თუ თავის დაბანას ვერ ასწრებთ. ”ცოტა ტალკი თმაზე დაიყარეთ და ძირებიდან ბოლოებამდე გადაივარცხნეთ. დამიჯერეთ, ეფექტი გაგაოცებთ”.

ჰოლივუდის მსახიობი კეტრინ ზეტა-ჯონსი კბილების გასათეთრებლად მარწყვს იყენებს. კენკრის პიურეს იგი კბილებზე ისვამს. მსახიობის აზრით, მარწყვში შემავალი მჟავა კბილებს ნადებს აშორებს და ათეთრებს. ხოლო თმისთვის ბზინვარების მისაცემად, მსახიობი კვირაში ერთხელ თმაზე ლუდს ივლებს.

ლეგენდარული მოდელი სინდი კროუფორდი სახეს რძის ტონიკით იბანს. რეცეპტი მარტივია: ნახევარ ჭიქა რძესა და წყალს ერთმანეთში ურევს და მიღებული სითხით სახეს იბანს.

ცელულიტის მოსაშორებლად, ძვირად ღირებული კრემების ნაცვლად, მსახიობი ჰოლი ბერი ყავის ნალექს იყენებს. დილით დალეული ნატურალური ყავის ნალექით იგი ”ფორთოხლის ეფექტს” ებრძვის ფეხებსა და დუნდულებზე. კოფეინი ცხიმს ადნობს; ყავის ქვიშისებური ეფექტი კი კანს ასუფთავებს.

”სასოწარკვეთილი დიასახლისების” მსახიობს ტერი ჰატჩერს სილამაზის შენარჩუნებაში წითელი ღვინო ეხმარება. წყლით სავსე აბაზანაში რამდენიმე ბოთლ ღვინოს ასხამს და 10-15 წუთით წვება. ”ღვინოში შემავალი სასარგებლო ანტიოქსიდანტების წყალობით ჩემი კანი გლუვი და ფაფუკი ხდება”.

ჟღალთმიანი მსახიობი ნიკოლ კიდმანი თმის ფერის შესანარჩუნებლად ჟღალთმიან ქალბატონებს შტოშის ნატურალური წვენის გამოყენებას ურჩევს. ”თუ თმის ფერი გაგიხუნდათ და სალონში მისასვლელად დრო არ გაქვთ, თავი შტოშის წვენით დაიბანეთ”. გარდა ამისა, ბზინვარების შესანარჩუნებლად კიდმანი თმას შამპანურით იბანს.

”ლამაზმანი” ჯულია რობერტსი სახის კრემის, თმის ნიღბისა და ფრჩხილების სამკურნალო საშუალების ნაცვლად, ზეითუნის ზეთს იყენებს. ”ზეითუნის ზეთის შემდეგ თმა დამყოლი და ბზინვარე ხდება, კანი ენერგიით ივსება, ხოლო ფრჩხილები აღარ მემტვრევა და სწრაფად მეზრდება”.

სერიალ ”მეგობრების” ვარსკვლავები კორტნი კოქსი და ჯენიფერ ენისტონი თვალებს დამწვარი ასანთის ღერით იღებავენ. ”მაკიაჟის გაკეთებამდე დარწმუნდით, რომ ასანთი ბოლომდე ჩაიწვა და გაცივდა - ამბობს კოქსი - შემდეგ კი ფრთხილად წაისვით თვალებზე, ნახშირი თვალში რომ არ ჩაგივარდეთ”.

სილამაზის შესანარჩუნებლად და გასახდომად დემი მური წურბელებს ”დაუმეგობრდა”. ”შედეგით კმაყოფილი ვარ, - ამბობს მსახიობი. - წურბლის ნაკბენი ჯადოსნურად მოქმედებს, მაშორებს ზედმეტ წონასა და გამაახალგაზრდავებელ შედეგსაც იძლევა”.

ქერათმიანი მსახიობი გვინეტ პელტროუ, ბოტოქსის ნაცვლად, ნაოჭების გასასწორებლად სახეზე გველის შხამზე დამზადებულ კრემს ისვამს. ”გველის შხამი სახის კანს ბოტოქსზე უკეთესად ასწორებს”.

მსახიობი ჯენიფერ ლავ ჰიუიტი მუწუკებს კბილის პასტით ”ებრძვის”. ”პრობლემური კანი მაქვს და მუწუკებიც ხშირად მიჩნდება. სხვადასხვა ძვირად ღირებული კრემის შემდეგ მეგობარმა კბილის პასტა მირჩია. საღამოს მუწუკზე ვისვამ და დილით გამქრალი მაქვს”.

უკრაინელი მსახიობი ალიონა ვინიცკაია სახის კანს განსაკუთრებულად უვლის. მას საფირმო რეცეპტიც აქვს: შვრიის თბილ ფაფას 1 ჩ/კ თაფლს ურევს და მთელ სახეზე შეშრობამდე იჩერებს. მსახიობი ნიღაბს თბილით წყლით იშორებს.

უკრაინელი მომღერალი ანი ლორაკი კრემის ნაცვლად სახეზე დაჭყლეტილი მარწყვის ფაფას იდებს. კანის დასატენიანებლად კი სახეზე რგოლებად დაჭრილ კიტრს ისვამს.

ეს, რაც შეეხებოდა თანამედროვე ლამაზმანებს. ახლა კი გასული საუკუნის ლამაზმანების რეცეპტებსაც გადაავლეთ თვალი.

ვენეციელი ლამაზმანი ჯულიეტა მამაკაცებში დიდი პოპულარობით სარგებლობდა. მის გამო ხშირად იმართებოდა დუელი. ჯულიეტა კი გამარჯვებულს გონდოლით მიჰყვებოდა. ამბობდნენ, რომ მას საუცხოო სახის კანი ჰქონდა. ამისათვის კი ჯულიეტა საკმაოდ მარტივი სილამაზის რეცეპტითაც სარგებლობდა: ბამბის ნაჭერს შემთბარ ზეითუნის ზეთში ალბობდა და სახეზე (ცხვირისა და ტუჩების გარდა) იდებდა. ზევიდან კი ცხელ პირსახოცს იფარებდა. პირსახოცის გაცივების შემდეგ სახეს თბილ წყალში დასველებული ხელსახოცით იწმენდდა.

ნაპოლეონი ცოლზე, ჟოზეფინა ბოგარნეზე ხშირად ამბობდა: ”არის მასში ის, რაც მე უზომოდ მხიბლავს.- ის ნამდვილი ქალია”. თურმე, ჟოზეფინას ფორებიანი კანი ჰქონია და მისი რეცეპტით მრავალი პარიზელი დიდგვაროვანი სარგებლობდა. ახალდამწნილებული კომბოსტო სახის ფორებიან ნაწილზე დაიდეთ და სამჯერ, 10-10 წუთის ინტერვალით იცვალეთ. პროცედურის დასრულების შემდეგ სახე ცივი წყლით ჩამოიბანეთ.

ფრანგი კურტიზანი ნინონ დე ლენკლო ასაკშიც კი უჩვეულოდ მოვლილი კანით გამოირჩოდა. მისი რეცეპტიც მარტივია: წამოადუღეთ ნახევარ ჭიქა რძე თითო ჩ/კ კონიაკსა და ლიმონთან ერთად. მიღებული თბილი ”ლოსიონი” წაისვით სახეზე, ყელსა და დეკოლტეზე, დაელოდეთ შეშრობას და თბილი წყლით ჩამოიბანეთ.

ლუდოვიკო XV-ის ოფიციალურ ფავორიტ მარკიზა დე პომპადურს სახის კრემის საკუთარი რეცეპტი ჰქონდა: 1 კვერცხის გული 1 ს/კ თაფლთან ერთად გალესეთ, 15-12 წუთით გაიჩერეთ სახეზე და თბილი წყლით ჩამოიბანეთ.

ინგლისის მეფის, ჰენრი VIII-ს მეორე ცოლი ანა ბოლეინი კარგი სახის კანით გამოირჩეოდა. სახის მოსავლელად ისიც რძესა და ლიმონს იყენებდა. დაჭრილ ლიმონს 1 ჩ/ჭ თბილი რძე დაასხით და 3 საათით გააჩერეთ. აჭრილი რძე დაიდეთ სახეზე და გაიჩერეთ შეშრობამდე. ჩამოიბანეთ თბილი წყლით. ასეთი ”ლოსიონი” ათეთრებს და არბილებს კანს.

აქვე შემოგთავაზებთ სილამაზის ორიგინალურ პროცედურებს, რომლებსაც მე გვერდი ვერ ავუარე და იმედია, თქვენს ყურადღებასაც დაიმსახურებს:

მასაჟი ძვირფასი ქვებით

ეგვიპტეში ყოფნის დროს აუცილებლად ეწვიეთ სალონს, სადაც ”ბრილიანტის” და ”მარგალიტის წვიმის” პროცედურას ჩაგიტარებენ. ძვირფასი ქვების მასაჟი მოგაშორებთ ცელულიტს, დაგამშვიდებთ და მოგიხსნით სტრესს. თითოეული ქვა და ფერი ენერგიის მატარებელია. მათი მასაჟით ადამიანს უუმჯობესდება განწყობა და ჯანმრთელობა. სხვათა შორის, ზოგიერთ სალონში ხელის თითებისთვის ნახევრად ძვირფასი ქვების აბაზანას შემოგთავაზებენ.

თევზები პედიკიურისთვის

ძველად აღმოსავლურ მედიცინაში თევზებს კანის დაავადებების სამკურნალოდ იყენებდნენ, ახლა - პედიკიურისთვის. ზედმეტ კანთან ერთად, თევზები ბაქტერიებსაც მოგაშორებთ. ახლა, პედიკიურის გარდა, თევზები მანიკიურსაც აკეთებენ, პილინგსაც და სხეულის მიკრომასაჟსაც. ”ჯადოსნური თევზების” აკვარიუმი (40-50 ცალი) შეგიძლიათ სახლში იქონიოთ.

ლოკოკინების გამაახალგაზრდავებელი ლორწო

კოლუმბიაში ნაოჭებთან საბრძოლველად ბაღის ლოკოკინები გამოიყენეს. მედიკოსების აზრით, ლოკოკინას ლორწო ანტიბაქტერიულია, შეუძლია კანის გაახალგაზრდავება და მისი გაწმენდა ფორებისა და პიგმენტური ლაქებისაგან.

ბულბულის სკლინტი კანისთვის

ძველად იაპონელი გეიშები და კაბუკის თეატრის მსახიობები სახის კანის მოსავლელად ბულბულის სკლინტს იყენებდნენ. დღეს ამ პროცედურას სპა-ცენტრებშიც იყენებენ. დამუშავების შემდეგ სკლინტს არც სუნი აქვს და არც ფერი. რაც შეეხება ეფექტს, კანი ძვირფასი ფაიფურივით უნაკლო და გაახალგაზრდავებული ხდება.

ოქროს ნიღაბი

იაპონიის სპა-სალონებში მდიდარ კლიენტებს 24-კარატიანი ოქროს ნიღბის გაკეთებას სთავაზობენ. პროცედურის შემდეგ სახიდან ქრება მცირე ნაოჭები. სახის ნიღაბი 200 დოლარი ღირს, მთელი ტანის - 2 ათასი.

გველი მასაჟისტები

გველები მასაჟისტებად პირველად ინდოეთში გამოიყენეს. ახლა ამ მეთოდს ისრაელის სპა-ცენტრებშიც იყენებენ და მას ”რეპტილოთერაპიას” ეძახიან. პროცედურა მარტივია: 6 სახეობის გველს მსურველის ზურგზე ათავსებენ და გამოცდილი მწვრთნელი-მასაჟისტი აკვირდება, რომ რეპტილიები შორს არ გასრიალდნენ. რეპტილოთერაპია აუმჯობესებს სისხლის მიმოქცევას, ორგანიზმიდან გამოჰყავს მავნე ნივთიერებები, ამცირებს ტკივილის შეგრძნებას სახსრებსა და კუნთებში, ხსნის სტრესსა და ნერვულ დაძაბულობას.

მასაჟი კაქტუსით

მექსიკის კურორტებზე კი მსურველებს კაქტუსის მასაჟს სთავაზობენ. პროცედურამდე, კლიენტს ეკლიანი მცენარის რომ არ შეეშინდეს, ტეკილას სთავაზობენ. შემდეგ მთელ სხეულზე კაქტუსის ”ფოთლებს” აფენენ და აგავის წვენს ასხამენ, რაც აუმჯობესებს მასაჟის ეფექტიანობას.

ჟურნალი ”... და ქალი”



წყარო































ტექსტის სანახავად გაიარეთ რეგისტრაცია.