ზღვის მარილი - ჯანმრთელობისა და სილამაზის მინერალი



ჯანმრთელობა წყლიდან

უხსოვარი დროიდან ადამიანი ბუნებრივ წამალთა მოიმედე იყო, მათ შორის, სამკურნალო წყლებისა.

ძველად, გრანდიოზულ აბანოებში, სხვადასხვა იმპერატორებისა და კეისრების თერმებში, ბერძნები თუ რომაელები არა მარტო სასიამოვნოდ ატარებდნენ დროს, არამედ კაჟდებოდნენ და ჯანსაღდებოდნენ კიდეც - წყალი სიცოცხლის გახანგრძლივების მნიშვნელოვან კომპონენტს წარმოადგენდა. ნერონის ცოლი პოპეა ვირის თბილი რძის აბაზანებს იღებდა, ხოლო ურალელ მდიდართა ცოლები ბანაობას ძვირფას ეთერულ ზეთებში ამჯობინებდნენ. საუკეთესო აბაზანად მაინც მინერალური წყლები ითვლებოდა. მათი მოქმედება დღესაც სწრაფი და სასიამოვნოა. ბალნეოლოგიური მკურნალობით სარგებლობდნენ ძველი ინდოელები და ბერძნები, სკვითებიც კი.

ზღვის მარილი სწორედ ბუნებრივი ბალნეოლოგიური საშუალებაა. მასში მოქმედი ძირითადი ნივთიერება ნატრიუმის ქლორიდია. იგი შეიცავს ბუნებრივი ნივთიერებების მთელ კომპლექსს _ ნატრიუმს, კალციუმს, კალიუმს, მაგნიუმს, ლითიუმს, რკინას, ქრომს, მანგანუმს, ბრომს, წყალში უხსნად ნივთიერებებს. ვიდაიდან იგი მდიდარია სამკურნალო მაკრო და მიკროელემენტებით, მისი გამოყენება ააქტიურებს ნივთიერებათა ცვლის პროცესს, ასტიმულირებს შინაგანი სეკრეციის ჯირკვლების მოქმედებას, ახასიათებს მატონიზირებელი მოქმედება, ზრდის ორგანიზმში სიცოცხლის ტონუსს, ხელს უწყობს კანის სტრუქტურის აღდგენასა და გაახალგაზრდავებას, დადებითად მოქმედებს კანის ტონუსზე, ასტიმულირებს ვეგეტატიურ ნერვულ სისტემას, შესაბამისად სტრესისა და სპაზმის საწინააღმდეგოდ ეფექტურად გამოიყენება. ამრიგად, ზღვის მარილის აბაზანები ორგანიზმის მოძლიერებასა და გაკაჟებას უწყობს ხელს.

ზღვის მარილის სიკეთეები


ზღვის მარილი თქვენი ჯანმრთელობის სამსახურშია - მისი აბაზანები განკუთვნილია კანის დამატებითი კვებისთვის, რომელიც ენერგიით ავსებს, ხელს უწყობს მის სიმკვრივესა და ელასტიურობას. აბაზანის მიღების შემდეგ კანი გლუვი და კრიალა ხდება, იდევნება შლაკები. ზღვის მარილში შემავალი ბრომი და მაგნიუმი ამშვიდებს ცენტრალურ ნერვულ სისტემას, ხოლო იოდი სასარგებლოა ფარისებრი ჯირკვლის ჰორმონებისთვის. ზღვის მარილი აუმჯობესებს ძვლის ტვინის ფუნქციასაც, ზრდის ჰემოგლობინის დონეს, რეკომენდირებულია ანემიის დროსაც, სასარგებლოა ბრონქებისა და ფილტვების დაავადებათა პროფილაქტიკისთვის, ხსნის კუნთოვან დაძაბულობას. განსაკუთრებით სასარგებლოა მკვდარი ზღვის მარილი, რომლის წყალიც მდიდარია იოდითა და რკინით. გულ-სისხლძარღვთა სისტემით დაავადებულთათვის ზღვის მარილიან აბაზანებს შეიძლება უკუჩვენება ჰქონდეთ.

სილამაზის ფორმულა


დღეს განსაკუთრებით მოდურად ითვლება ზღვის პროდუქტებით მკურნალობა. მას თალასოთერაპია ეწოდება. ზღვის, თერმული, მინერალური წყლის, წყალმცენარეებისა თუ ტალახების, მარილის, ქვიშისა და ზღვიდან მიღებული სხვა კომპონენტების გამოყენებით ხდება SANUS PER AQUA (SPA) თერაპია, რომელიც საკმაოდ ძვირი სიამოვნებაა. აქ სუსტი სქესის წარმომადგენლები დადიან გასახდომად, გასალამაზებლად და თვითშეფასების მოსამატებლად. როდესაც დაძაბული დღის რეჟიმი, სტრესი, დაღლილობა თუ უძილობა ქალის ცხოვრების ყოველდღიური ნაწილი გახდა, ხოლო SPA თერაპია კი ძვირადღირებული მკურნალობა, მაშინ სპეციალისტები ზღვის მარილის აბაზანებს გვირჩევენ. იგი ძალიან ეფექტურია ცელულიტის სამკურნალოდაც. ზღვის მარილიან წყალში კანი ნაკლებად კარგავს ტენიანობას. ხშირი აბაზანები თანდათანობით ამცირებს ცხიმგროვებს სხეულზე.

ზღვის მარილის აბაზანები ძალიან ეფექტური და სასიამოვნო პროცრესია, ამისათვის 37 გრადუსს ტემპეტატურაზე გამთბარ წყალში გახსენით 300-დან 400 გრ-მდე ზღვის მარილი და მიიღეთ აბაზანა 20-30 წუთის განმავლობაში ყოველდღე ან დღეგამოშვებით. შეგიძლიათ აბაზანაში ნატურალური ან მცენარეული ექსტრაქტების ეთერზეთიც დაუმატოთ დაახლოებით 10-15 წვეთი, ასევე, ერთი ჭიქა მწვანე ჩაი. თუ თქვენი კანი მგრძნობიარეა, შეგიძლიათ, ცოტა ზეითუნის ზეთიც შეურიოთ. ზღვის მარილის აბაზანები სახლის პირობებშიც ადვილად შესაძლებელია. ეს პროცედურა ხსნის დაღლილობას, დაძაბულობას, ამშვიდებს ნერვებს, აახალგაზრდავებს კანს და ორგანიზმის სრულ რელაქსაციას ახდენს.

• ნებისმიერი ანტიცელულიტური აბაზანის წინ, კანი უნდა მოამზადოთ _ დაიზილოთ უხეში ღრუბელით ან პირსახოცით, შემდეგ მიიღოთ შხაპი და ჩაწვეთ აბაზანაში. შეგიძლიათ ზღვის მარილს ერთი თხელი ნაჭერი ლიმონი ან ცოტაოდენი რძე დაუმატოთ. კვირაში ორჯერ ასეთი პროცედურის ჩატარება საკმარისია. იგი არ არის რეკომენდირებული ორსულებში, გულ-სისხლძარღვთა და თირკმელების პრობლემების დროს;

• სხეულზე კანი რბილი და ელასტიური რომ გქონდეთ, ერთმანეთში აურიეთ ზღვის მარილი და სოდა, სველი ხელის მსუბუქი მოძრაობით გადაისვით მთელ ტანზე და გააჩერეთ ხუთი წუთი, შემდეგ ჩამოიბანეთ და შეიმშრალეთ;

• ზღვის მარილით პირის დაბანა და ნიღბის გაკეთება მოდუნებულ კანს გააახალგაზრდავებს, აურიეთ ერთმანეთში თაფლი, ხაჭო და წვრილმარცვლიანი ზღვის მარილი და წაისვით სახესა და ყელზე. 5 წუთის შემდეგ ჩამოიბანეთ თბილი წყლით. თქვენი კანი ელასტიური და ხავერდოვანი გახდება;

• იმისათვის, რომ ფრჩხილები გაგიმაგრდეთ, ხელებზე კანი კი, უფრო რბილი გაგიხდეთ, ერთ ჩაის ჭიქა თბილ წყალში ჩაყარეთ ერთი სადილის კოვზი ზღვის მარილი, ჩააწვეთეთ რამდენიმე წვეთი ლიმონი და ჩაყავით ხელები 10 წუთის განმავლობაში;

• ტერფების პილინგისთვის 2 კოვზი ზღვის მარილს დაამატეთ 4 კოვზი თაფლი და წრიული მოძრაობით წაისვით ტერფებზე და გაიჩერეთ რამდენიმე წუთით, შემდეგ დაიბანეთ და წაისვით დამატენიანებელი კრემი;

წყარო:
































ტექსტის სანახავად გაიარეთ რეგისტრაცია.