როგორ მოვუაროთ სახის კანს (სახის მოვლა)



სოდა ფორებს ჭუჭყისგან გაგითავისუფლებთ, მკვდარ უჯრედებს მოგაშორებთ და კანსაც უფრო გლუვსა და ნაზს გახდის

სახის კანმა ადვილად რომ გადაიტანოს სუსხი, ქარი და მოემზადოს გაზაფხულისთვის, მას განსაკუთრებული მოვლა სჭირდება. ბევრმა ქალბატონმა საკუთარი გამოცდილებიდან იცის, რომ ზოგჯერ კანის მოვლის ყველაზე ძვირადღირებული საშუალებებითაც კი ვერ აღწევენ სასურველ შედეგს. სწორედ ამიტომ, გთავაზობთ სახის კანის მოვლის გამოცდილ მეთოდებს.

სახის კანის დამარბილებელი ნიღაბი

1. შავი პურის გული (არ დაფხვნათ) დაალბეთ რძეში, მერე ოდნავ გაწურეთ და დაილაგეთ მთელ სახეზე. სასურველია წამოწვეთ. 20 წუთის შემდეგ ჩამოიბანეთ თბილი წყლით და წაისვით შესაბამისი მკვებავი.

2. 1 ცალი მოზრდილი კარტოფილი კანიანად მოხარშეთ კარგად, გაფცქვენით და ჩასრისეთ. დაუმატეთ 2 სადილის კოვზი რძე, 1 ცალი კვერცხის გული, კარგად აზილეთ დაიდეთ სახეზე. ზემოდან დაიფინეთ ქაღალდის ხელსახოცი ან რბილი ნაჭერი და წამოწექით. 20 წუთის შემდეგ ჩამოიბანეთ თბილი წყლით და წაისვით მკვებავი.

თუ მშრალი კანი გაქვთ

50 გრამ საფუარს დაუმატეთ ნახევარი ჭიქა თბილი რძე და ცოტა მცენარეული ზეთი. კარგად აურიეთ, სახეზე წაისვით და 20 წუთის შემდეგ თბილი წყლით ჩამოიბანეთ.

დასრესილ ბანანს დაამატეთ 1 ჩაის კოვზი რძე, კარგად აურიეთ, წაისვით სახეზე და 15-20 წუთის შემდეგ თბილი წყლით ჩამოიბანეთ.

დასრესილ ბანანს დაუმატეთ კარტოფილის ფქვილი, კარგად აურიეთ და წაისვით სახეზე. ნიღაბი 20 წუთის შემდეგ ჩამოიბანეთ თბილი წყლით. შედეგი უკეთესი იქნება, თუ ამ პროცედურას კვირაში ორჯერ ან ყოველკვირა თუ ჩაიტარებთ.

წვრილად გახეხილ კიტრს დაამატეთ რამდენიმე წვეთი ლიმონი, კარგად აურიეთ, წაისვით სახეზე და 20 წუთის შემდეგ თბილი წყლით ჩამოიბანეთ.

რძის პროდუქტები თქვენი სილამაზისთვის

ერთ მუჭა გვირილის ყვავილებს დაასხით 75 მილილიტრი რძე და 20 წუთი თავდახურულ ჭურჭელში გააჩერეთ. ნაყენი გაფილტრეთ, შეათბეთ, შეურიეთ 1 სუფრის კოვზი ქატო და 1 ჩაის კოვზი თაფლი და ურიეთ იქამდე, სანამ ერთგვაროვან მასას არ მიიღებთ. თბილი ნიღაბი სახისა და დეკოლტეს მიდამოებში წაისვით, 15 წუთის შემდეგ კი, თბილი წყლით ჩამოიბანეთ.

3 სუფრის კოვზ ხაჭოს ამდენივე შავი ჩაის ნაყენი შეურიეთ, სახეზე წაისვით, 10-15 წუთით გაიჩერეთ და შემდეგ თბილი წყლით ჩამოიბანეთ.

2 სუფრის კოვზ უცხიმო ხაჭოს 1 ჩაის კოვზი ჩაის მაგარი ნაყენი და 3-4 წვეთი ლიმონის წვენი დაასხით. ბამბის ორი ტამპონი მიღებულ ნაყენში დაასველეთ, თვალებზე დაიწყვეთ და 10 წუთის შემდეგ ჩამოიბანეთ. შეშუპებაც გაივლის და კანიც გაცილებით ელასტიკური გახდება.

კანის კვებისთვის განკუთვნილი სპეციალური საშუალებები

25 გრამი გარჩეული ნუში დანაყეთ, დაასხით ნახევარი ჭიქა თბილი, ანადუღარი წყალი, კარგად შეანჯღრიეთ, დაუმატეთ ცოტა მარილი გაწურეთ და შეინახეთ გრილ ადგილას. გამოყენებამდე (დილა-საღამოს) კვლავ კარგად შეანჯღრიეთ ხოლმე დაისხით ხელისგულზე 1-2 ჩაის კოვზი ლოსიონი და წაისვით სახისა და ყელის მიდამოებში.

თუ მშრალი კანი გაქვთ ან გამონაყარს უჩივით, სასურველია, დღეგამოშვებით თბილი კომპრესების დადება ან სახის შემდეგი ნაყენით გაწმენდა: 1 სუფრის კოვზი ცაცხვის ყვავილი მოხარშეთ ნახევარ ჭიქა რძეში, მიღებული ნაყენი 15- 20 წუთით მოათავსეთ მდუღარე წყალში. თუ მგრძნობიარე, ნაზი ან ფორებიანი კანი გაქვთ, მაშინ ცაცხვის ყვავილის ნაცვლად, აიღეთ ვარდის ან სალბის მშრალი ფურცლები, მოხარშეთ ნახევარი ჩაის ჭიქა წყალში და დაასხით ამდენივე რაოდენობის რძე. სახე კი ამ ნაყენში დასველებული ბამბის ტამპონებით გაიწმინდეთ.

მარილიანი წყლით დაბანა კარგად მოქმედებს სახის კუნთებზე. დილით, კრემის წასმიდან 20-25 წუთის შემდეგ, სახე დაიბანეთ გრილი, მარილიანი წყლით (1 ჩაის ჭიქა წყალზე, 1 ჩაის კოვზი მარილი) პროცედურა შეასრულეთ 15-20 დღის განმავლობაში ყოველდღე, 2-3 კვირით შეისვენეთ და შემდეგ გაიმეორეთ.

1 ცალი კვერცხის გული, 1 სუფრის კოვზი არაჟანი, 1 სუფრის კოვზი თაფლი ერთმანეთს შეურიეთ. მასა ბამბის ტამპონით სახესა და ყელის მიდამოებში წაისვით. პირველი ფენის გაშრობის შემდეგ, ზემოდან მეორე ფენა გადაისვით, შემდეგ მესამე... 20-25 წუთის შემდეგ კი, სახე ტამპონებით ჩამოიწმინდეთ.

საჭმელი სოდა - კანის მოვლის საშუალება

პილინგისთვის: პირსაბან ქაფს ან გელს დაუმატეთ ცოტაოდენი სოდა, კარგად აურიეთ და სახეზე წრიული მოძრაობით წაისვით, თითქოს მასაჟს იკეთებდეთ. რამდენიმე წუთის შემდეგ, სოდა ფორებს ჭუჭყისგან გაგითავისუფლებთ, მკვდარ უჯრედებს მოგაშორებთ და კანსაც უფრო გლუვსა და ნაზს გახდის.

ფერისმჭამელების წინააღმდეგ: ფერისმჭამელების სამკურნალოდ, თბილ წყალში გახსნილი სოდა დაგეხმარებათ. სოდიანი წყალი აცხრობს ანთებას და აქრობს გამონაყარს.

პრობლემური კანი თუ გაქვთ: ერთმანეთში აურიეთ სახამებელი ან 2 სუფრის კოვზი შვრიის, ხორბლის ან წიწიბურას ფქვილი და 1 ჩაის კოვზი საჭმელი სოდა. გააზავეთ თბილი წყლით ფაფისებური მასის მიღებამდე. წაისვით გასუფთავებულ სახეზე წრიული მოძრაობით. 10-15 წუთის შემდეგ, სახე თბილ წყალში დასველებული ბამბის ტამპონით გაიწმინდეთ. პროცედურა კვირაში ერთხელ გაიმეორეთ.

არბილებს, აახალგაზრდავებს კანს და მატებს მას მსუბუქ ნამზეურს.

ნიღბისათვის დაგჭირდებათ შემდეგი ინგრედიენტები:

- 1 სუფრის კოვზი თაფლი;

- 1 სუფრის კოვზი ყავა;

- 3 წვეთი აბუსალათინის ზეთი;

- 1/2 ჭიქა რძე.

ეს ინგრედიენტები ერთმანეთში საგულდაგულოდ აურიეთ და მიღებული მასა წაისვით სუფთა სახეზე. 15 წუთის შემდეგ, ჩამოიბანეთ თბილი წყლით. წაისვით მკვებავი კრემი. ნიღბის წასმამდე, სასურველია, გაიკეთოთ სახის პილინგი.

ფორბის შესავიწროებელი ნიღაბი

1 კვერცხის ცილა კარგად ათქვიფეთ, შეურიეთ 100 გრამი იოგურტი ან მაწონი. წაისვით სუფთა სახეზე და გაიჩერეთ 15-20 წუთის განმავლობაში. ჩამოიბანეთ გრილი წყლით და წაისვით შესაბამისი მკვებავი. ნიღაბი გაიკეთეთ კვირაში ორჯერ.

1 კვერცხის გული ათქვიფეთ და დაუმატეთ იმდენი პურის ფქვილი, რომ ფაფისებური მასა მიიღოთ. წაისვით სუფთა სახეზე და გაიჩერეთ 15 წუთი. ჩამოიბანეთ ჯერ თბილი, შემდეგ კი ცივი წყლით.

კვირაში ორჯერ სახეზე წაისვით 1 სუფრის კოვზი ხაჭოსა და 1 ჩაის კოვზი ლიმონის წვენის ნაზავი.

2 ჩაის კოვზი კვერცხის ცილა ათქვიფეთ ბუშტულების წარმოქმნამდე, თანდათანობით დაუმატეთ 1 ჩაის კოვზი ლიმონის წვენი. წაისვით სუფთა სახეზე და ყოველ 4-5 წუთში 2-3-ჯერ განაახლეთ ნიღაბი. ჩამოიბანეთ ჩაის ნაყენში დასველებული ბამბის ტამპონით.
































ტექსტის სანახავად გაიარეთ რეგისტრაცია.