ლიმონი სილამაზის სამსახურში



ლიმონი ბევრი სასარგებლო თვისების მატარებელია. ყველამ იცის, რომ ის ვიტამინების ერთ-ერთი საუკეთესო წყაროა. თუმცა, შესაძლოა სულაც არ იცოდეთ, რა დანიშნულება აქვს ლიმონს სილამაზესა და თავის მოვლაში...

1. ლიმონი სახის საუკეთესო გამწმენდია.

გამომდინარე იქიდან, რომ ლიმონი ვიტამინებითა და საკვები ნივთიერებებით მდიდარი პროდუქტია, ის საუკეთესო საშუალებაა სახის გასაწმენდად. ლიმონის წვენი კანს სიღრმისეულად წმენდს, ატენიანებს მას და შავი წერტილების გაქრობასაც უწყობს ხელს. შეგიძლიათ მარტივ ხერხს მიმართოთ: ლიმონი ორად გაჭერით და მთლიან სახეზე კარგად წაისვით, შემდეგ კი ცივი წყლით ჩამოიბანეთ.

2. ლიმონი კანის ფერს აუმჯობესებს.

არაფერი აფუჭებს სახის კანს ისე, როგორც აკნეს კვალი და შავი წერტილები. როგორც აღმოჩნდა, ციტრუსებში შემავალი მჟავები ამ ლაქების გაუფერულებას ეხმარება. ასე რომ, ლიმონის წვენი არა მხოლოდ გამოაცოცხლებს თქვენს კანს, არამედ მას ერთიან, ნათელ ელფერსაც შესძენს და აღდგენით პროცესებსაც დაეხმარება. გირჩევთ, ყოველდღიურად დაასველოთ ბამბა ლიმონის წვენში და მთლიან სახეზე გადაისვათ. არ დაგავიწყდეთ ცივი წყლით ჩამობანა.

3. ლიმონი ფრჩხილების ფერსაც აუმჯობესებს.
სამი სუფრის კოვზ ზეითუნის ზეთს დაამატეთ ერთი სუფრის კოვზი ლიმონის წვენი. კარგად აურიეთ ერთმანეთში და მიღებულ სითხეში ფრჩხილები ცოტა ხანს გააჩერეთ. ეს ნარევი ფრჩხილებს ჯანსაღ ელფერს მატებს და ატენიანებს. მთავარია, არ დაიზაროთ.

4. ლიმონი თმას ბზინვარებას მატებს.
ეს ბავშვობიდან გვესმის, მაგრამ ერთ-ერთი მითი გვგონია. არადა, სიმართლეა! ლიმონის წვენი თმას მბზინვარებას ნამდვილად მატებს! შეურიეთ თბილ წყალს და თმაზე სპრეის საშუალებით მიიპკურეთ. კარგი იქნება, თუ მომდევნო ერთ საათს მზის შუქზე გაატარებთ და თმას მხოლოდ ამის შემდეგ ჩამოიბანთ.

5. ლიმონი არბილებს იდაყვის კანს.
იდაყვის გაუხეშებული კანი ბევრი ადამიანის პრობლემაა. ლიმონს ამის მოგვარებაც შეუძლია. ლიმონის წვენს შეურიეთ სოდა მანამ, სანამ კრემისებრ მასას არ მიიღებთ. შემდეგ კი, ეს კრემი იდაყვებზე შეიზილეთ.

6. ლიმონს ქერტლის გაქრობა შეუძლია.
იმისათვის, რომ თავის კანის მდგომარეობა გაიუმჯობესოთ და ქერტლმაც აღარ შეგაწუხოთ, საკმარისია, ერთმანეთს შეურიოთ წყალი, ჯანჯაფილის ფესვები, ლიმონის წვენი და ზეითუნის ზეთი. მიღებული მასით თავი ჩამოიბანეთ. დაიცადეთ მანამ, სანამ თმა და კანი არ გაშრება და შამპუნი მხოლოდ ამის შემდეგ გამოიყენეთ.

okmagazine.ge
































ტექსტის სანახავად გაიარეთ რეგისტრაცია.