5 მითი კატარაქტის შესახებ



კატარაქტა (ბროლის შემღვრევა) თვალის ერთ–ერთი ყველაზე გავრცელებული დაავადებაა. მის შესახებ მრავალი მითი არსებობს. მოდით, გავარკვიოთ, მათგან რომელია მართალი და რომელი – ტყუილი.

პირველი მითი: კატარაქტა ხანდაზმული ადამიანების ხვედრია. ახალგაზრდებს არ ემართებათ.
სინამდვილე: ხშირად კატარაქტა მართლაც ასაკობრივი პრობლემაა და ორგანიზმის დაბერების გარდაუვალ პროცესთან არის დაკავშირებული, მაგრამ შეიძლება დაავადება ნებისმიერ ასაკში, ბავშვებშიც აღმოცენდეს. საბედნიეროდ, პატარებში საკმაოდ იშვიათად გვხვდება (100 ათასი ახალდაბადებულიდან 5 შემთხვევა). ასაკობრივ ცვლილებებთან დაკავშირებულ კატარაქტას ხშირად იწვევს სომატური დაავადებები (მაგალითად, შაქრიანი დიაბეტი) ან ფიზიკური ზემოქმედება (მზის გამოსხივება, ტრავმა).

მეორე მითი: კატარაქტის განვითარების თავიდან აცილება შეიძლება.
სინამდვილე: არსებობს რომელიმე სხვა დაავადებით გამოწვეული კატარაქტის გართულებული ფორმების პროფილაქტიკა. ასეთ შემთხვევაში საუკეთესო ღონისძიებაა კატარაქტის მაპროვოცირებელი სნეულების ადეკვატური პროფილაქტიკა და მკურნალობა. მაგალითად, სისხლში შაქრის დონის გაკონტროლება (თუ შაქრიან დიაბეტზეა საუბარი). ასაკობრივი კატარაქტის განვითარების თავიდან აცილება, რომელიც ხშირად მემკვიდრეობითი ხასიათისაა, პრაქტიკულად შეუძლებელია.

მესამე მითი: კატარაქტისგან განკურება წვეთებით შეიძლება.
სინამდვილე: წვეთების შექმნის მრავალრიცხოვანმა მცდელობამ, რომელიც თითქოს ბროლის შემღვრევაზე გავლენას ახდენს, არ გაამართლა. არის მონაცემები, რომ კატარაქტის განვითარების რამდენადმე დამუხრუჭება შეუძლიათ, მაგრამ პრობლემას კარდინალურად ვერ ჭრიან.

მეოთხე მითი: კატარაქტის ოპერაცია მაშინ უნდა გაკეთდეს, როდესაც "მომწიფდება".
სინამდვილე: ამ საკმაოდ გავრცელებულ ცდომილებას ოფთალმოლოგები მუდამ ეჯახებიან. ოდესღაც ასეთი მიდგომა გამართლებული იყო. დაავადებისგან გათავისუფლების ტექნიკური შესაძლებლობები ისეთი იყო, რომ ქირურგებისთვის ნამდვილად მოსახერხებელი იყო მომწიფებული კატარაქტის ოპერაცია, მაგრამ სადღეისოდ სიტუაცია ძირფესვიანად შეიცვალა. კატარაქტის მკურნალობა ინდივიდუალურად უნდა გადაიჭრას. ყველაფერი დამოკიდებულია თავად პაციენტის შეგრძნებებზე.

მეხუთე მითი: ოპერაციის შემდეგ შეგიძლიათ სათვალე საერთოდ არ ატაროთ.
სინამდვილე: სადღეისოდ უკვე ამზადებენ მულტიფოკალურ ხელოვნურ ბროლებს, რომლებსაც შეუძლიათ როგორც შორს, ასევე ახლოს კარგი მხედველობა უზრუნველყონ.

წყარო
































ტექსტის სანახავად გაიარეთ რეგისტრაცია.