შემწვარი ღვიძლი

შემწვარი ღვიძლი

(shemwvari gvidzli)


მასალა:

500 გრ ღვიძლი, 50 გრ კარაქი, 2 თავი ხახვი, ოხრახუში, ბროწეულის მარცვლები, მარილი - გემოვნებით.

მომზადების წესი:


გასუფთავებული, გარეცხილი ღვიძლი დავჭრათ, მოვაყაროთ მარილი, ამოვავლოთ ფქვილში, შევწვათ ცხელ, ცხიმიან ტაფაში ორივე მხრიდან.
თავი ხახვი დავჭრათ ალყა-ალყა, ოდნავ მოვწვათ ღვიძლის შეწვის შემდეგ დარჩენილ ცხიმში.
შემწვარი ღვიძლი დავდოთ თეფშზე, მასზე მომწვარი ხახვი, მოვაყაროთ ოხრახუში და ბროწეულის მარცვლები. მაგიდასთან შეგვიძლია მივიტანოთ შემწვარ კარტოფილთან ერთად.


მოშუშული ღვიძლი

მოშუშული ღვიძლი

(moshushuli gvidzli)


მასალა:

500 გრ. ღვიძლი, 100 გრ. კარაქი, 300 გრ. თავი ხახვი, პილპილი და მარილი - გემოვნებით.

მომზადების წესი:

გასუფთავებული და გარეცხილი ღვიძლი დავჭრათ, ჩავდოთ ქვაბში, შემოვდგათ ცეცხლზე, ვურიოთ იქამდე, ვიდრე სითხე არ ამოშრება.
ტაფაში 50 გრ კარაქში მოვშუშოთ წვრილად დაჭრილი ხახვი, გადავიტანოთ ღვიძლიან ქვაბში, დავამატოთ 50 გრ კარაქი, პილპილი, მარილი და მოვშუშოთ მზადყოფნამდე.

მოხარშული ენა

მოხარშული ენა

(moxarshuli ena)


მასალა:

1 ც. საქონლის (ხბოს) ენა, 2 თავი ხახვი, 1 ც სტაფილო, დაფნის ფოთოლი, ნიახური, ოხრახუში, 200 გრ სალათის ფოთოლი, 400 – 400 გრ კიტრი და პომიდორი, მარილი - გემოვნებით.

მომზადების წესი:

საქონლის ენა გავასუფთავოთ, მოვაცილოთ ყბის ძირში მოთავსებული სანერწყვე ჯირკვლები, კარგად გავრეცხოთ, ჩავდოთ ცხელ წყლიან ქვაბში და მოვხარშოთ (მოხარშვის დრო შეადგენს 3-4 საათს). როდესაც ენა თითქმის მოიხარშება, ამოვიღოთ ქვაბიდან და ჩავუშვათ ცივ წყალში, მაშინვე გავაცილოთ კანი და ისევ ჩავდოთ ქვაბში, ვხარშოთ 15-20 წუთი, დავამატოთ ნიახური, ოხრახუში, სტაფილო, ხახვი, დაფნის ფოთოლი, მარილი და ვხარშოთ მზადყოფნამდე.
მოხარშული ენა შევამშრალოთ ტილოთი, დავჭრათ განივად, 5-6 მმ სისქის ნაჭრებად. თეფშზე ან სინზე დავალაგოთ სალათის ფოთლები, მათზე მოვათავსოთ ენის ნაჭრები, ზემოდან მოვაყაროთ ალყა-ალყა დაჭრილი ხახვი და ოხრახუში. შეიძლება გარშემო შემოვუწყოთ მრგვლად დაჭრილი კიტრი და პომიდორი.


ენა თეთრ ღვინოში

ენა თეთრ ღვინოში

(ena tetr gvinoshi)


მასალა:

1 ც. საქონლის (ხბოს) ენა, 5 თავი ხახვი, 100 გრ კარაქი, 1 ჩაის ჭიქა თეთრი ღვინო, 3 კბილი ნიორი, წიწაკა, ოხრახუში, ქინძი, მარილი - გემოვნებით.

მომზადების წესი:

საქონლის ენა გავასუფთავოთ, გავრეცხოთ, მოვხარშოთ ჩვეულებრივად (იხ. წინა რეცეპტი) და დავჭრათ.
თავი ხახვი დავჭრათ ალყა-ალყა და მოვშუშოთ კარაქში. დავასხათ 2 ჭიქა გაწურული ბულიონი და 1 ჭიქა თეთრი ღვინო. დავამატოთ მარილი, წიწაკა და ვხარშოთ 5 წუთი. ჩავდოთ დაჭრილი ენის ნაჭრები და ნელ ცეცხლზე ვადუღოთ 5 წუთი, დავამატოთ წვრილად დაჭრილი მწვანილი, ნიორი (გემოვნებით), წამოვადუღოთ და გადმოვდგათ ცეცხლიდან.

ხბოს ენა შამფურზე

ხბოს ენა შამფურზე

(xbos ena shamfurze)


მასალა:

1 ც. ხბოს ენა, 2 თავი ხახვი, ოხრახუში, მარილი - გემოვნებით.

მომზადების წესი:

ხბოს ენა გავასუფთავოთ, გავრეცხოთ, წამოვაგოთ შამფურზე, მოვათავსოთ მაყალზე და შევწვათ უალო ნაკვერჩხლებზე სრულ მზადყოფნამდე. შეწვის დროს შამფური განუწყვეტლივ ვატრიალოთ, პერიოდულად წავუსვათ მარილწყალი.
მზა შემწვარი ენა დავჭრათ თხელ ნაჭრებად, მოვაყაროთ ალყა-ალყა დაჭრილი ხახვი, ოხრახუში და მივიტანოთ მაგიდასთან ცხელი.

მოშუშული ენა

მოშუშული ენა

(moxarshuli ena)



მასალა:

1 ც საქონლის ან ხბოს ენა, 4 თავი ხახვი, 50 გრ კარაქი, 800 გრ პომიდორი, 2 თავი ნიორი, ოხრახუში, კამა, ქინძი, ტარხუნა, წიწაკა და მარილი - გემოვნებით.

მომზადების წესი:

საქონლის ენა გავასუფთავოთ, გავრეცხოთ, მოვხარშოთ ჩვეულებრივად (იხ. რეცეპტი: მოხარშული ენა). დავჭრათ პატარა ნაჭრებად, ჩავდოთ ტაფაში, დავამატოთ წვრილად დაჭრილი ხახვი, კარაქი და მოვშუშოთ. მოვხარშოთ პომიდორი, გავხეხოთ, ჩავასხათ მოშუშულ ენიან ტაფაში, დავამატოთ დანაყილი წიწაკა და ნიორი, წვრილად დაჭრილი მწვანილი, მოვაყაროთ მარილი, ვადუღოთ 10-15 წუთი და გადმოვდგათ ცეცხლიდან.

ღორის ხორცის მუჟუჟი

ღორის ხორცის მუჟუჟი

(goris xorcis mujuji)


1 კგ ღორის ხორცი, 2 ც დაფნის ფოთოლი, 10 მარცვალი სურნელოვანი პილპილი, 1 ჭიქა ღვინის ძმარი, მარილი - გემოვნებით.
ღორის ხორცი გავასუფთავოთ, მოვაცილოთ ჯირკვლები და ზედმეტი ცხიმი, დავჭრათ და ჩავალაგოთ ქვაბში, დავასხათ წყალი, დავამატოთ დაფნის ფოთოლი, სურნელოვანი პილპილი, მოვხარშოთ მზადყოფნამდე.
როცა ხორცი მოიხარშება, დავამატოთ ღვინის ძმარი, მოვაყაროთ მარილი, წამოვადუღოთ, გადმოვდგათ ცეცხლიდან, გადავიტანოთ შესაბამის ჭურჭელში, გავაცივოთ.

გოჭის მუჟუჟი

გოჭის მუჟუჟი

(gochis mujuji)



1 კგ გოჭის ფეხები, 2 ც სტაფილო, 3 თავი ხახვი, 8 ც სურნელოვანი პილპილი, 3 ც დაფნის ფოთოლი, 3/4 ჩაის ჭიქა ღვინის ძმარი, მარილი - გემოვნებით.
გასუფთავებული და გარეცხილი ფეხები გავჭრათ შუაზე, ჩავალაგოთ ქვაბში, დავასხათ წყალი, შემოვდგათ ცეცხლზე და მოვხარშოთ ნახევრად მზადყოფნამდე, გადავიტანოთ სხვა ქვაბში. ნახარში გავწუროთ, დავამატოთ ღვინის ძმარი (2,5 ჭიქა ნახარში - 1/4 ჭიქა ძმარი), დავასხათ გოჭის ფეხებს და მოვხარშოთ გოჭის ფეხების მზადყოფნამდე. ხარშვის დამთავრებამდე 30-40 წუთით ადრე დავამატოთ ალყა-ალყა დაჭრილი ხახვი, სტაფილო, დაფნის ფოთოლი, სურნელოვანი პილპილი, მარილი.
მზა კერძი გადავიტანოთ მათლაფებზე, მაგიდასთან მივიტანოთ ცივი.

არტალა

არტალა

(artala)


1 კგ არტალა, 1 თავი ხახვი, ნიახური, ოხრახუში, ნიორი და მარილი - გემოვნებით.
არტალა გავასუფთავოთ, გავრეცხოთ, დავჭრათ, ჩავდოთ ქვაბში, დავასხათ წყალი ისე, რომ არტალა დაიფაროს, დავახუროთ სახურავი, შემოვდგათ ცეცხლზე და მოვხარშოთ. ხარშვის დროს მოვქაფოთ. დავამატოთ თავი ხახვი, ნიახური და ოხრახუში.
მაგიდასთან მოვიტანოთ ცხელი, დანაყილ ნიორთან და წვრილად დაჭრილ მწვანილთან ერთად.


ხაში თბილისურად

ხაში თბილისურად

(xashi tbilisurad)


2 კგ ძროხის ჩლიქი და ფაშვი, ნიორი და მარილი - გემოვნებით.

ხაში (ძროხის ჩლიქი და ფაშვი) გულდაგულ გავასუფთავოთ, გავრეცხოთ. ჩლიქი გავყოთ ორ ნაწილად, ფაშვი დავჭრათ პატარა ნაჭრებად. მომზადებული ხაში ჩავდოთ დიდ ქვაბში, დავასხათ წყალი და შემოვდგათ ცეცხლზე. როდესაც წყალი წამოდუღდება, გადავღვაროთ, ისევ დავასხათ წყალი და შემოვდგათ ცეცხლზე, პერიოდულად მოვქაფოთ. ვხარშოთ ნელ ცეცხლზე რამოდენიმე საათი.
ხაშთან ერთად მაგიდასთან მივიტანოთ თონის პური (ლავაში), სასურველია წინა დღისა, ასევე დანაყილი ნიორი და მარილი.
ხაში შეიძლება მოვხარშოთ მხოლოდ ჩლიქებისაგან, ან მხოლოდ ფაშვისაგან.


Âñ¸ íåîáõîäìîå äëÿ äâèæêà DLE