სიმსივნეები
ჩვენს სხეულებში უჯრედები მუდმივად იყოფა, რადგან ახალი უჯრედები ძველებს ცვლიან. მაგრამ ხანდახან ეს პროცესი არასწორად მიმდინარეობს და კიბოს უჯრედები წარმოიქმნება. კიბოს უჯრედები ძალიან სწრაფად იყოფა და ქმნის კვანძებს, რომლებსაც სიმსივნეები ეწოდება. მათ შეუძლიათ მთელი ორგანო მოიცვან და მისი ნორმალური ფუნქციონირება შეწყვიტონ. თუ უჯრედები სიმსივნეს მოწყდა, ისინი სხეულის სხვადასხვა ნაწილებში მოხვდებიან და ახალ სიმსივნეებს წარმოქმნიან.
დარწმუნებით ვერ ვიტყვით რატომ ემართება სიმსივნე ზოგ ადამიანს, ზოგს კი არა, მაგრამ დაზიანებული გენები ზოგიერთი სიმსივნის მიზეზად ნამდვილად შეიძლება ჩაითვალოს. სხვა სიმსივნეებს გარემოში არსებული ქიმიური ნივთიერებები და მიკრობები იწვევს.
სხვადასხვა სახის კიბო
კიბო მხოლოდ ერთი დაავადება როდია სხვადასხვა სახის კიბოს სხეულის თითქმის ყველა ნაწილის დაზიანება შეუძლია. ყველაზე გავრცელებული კიბო საჭმლის მომნელებელ სისტემასა და ფილტვებში ვითარდება. ქალებში გავრცელებულია მკერდისა და საშვილოსნოს ყელის კიბო.
ფილტვის კიბოს თითქმის ყველა შემთხვევის გამომწვევი მიზეზი მოწევაა. თამბაქოს კვამლი შეიცავს კანცეროგენულ ნივთიერებებს, რომლებიც ფილტვების სათუთ სარჩულს აღიზიანებს. რაც უფრო მეტს ეწევა ადამიანი, მით მეწია კიბოთი დაავადების საშიშროება. საბედნიეროდ, რისკის ფაქტორი აღარ იარსებებს, თუ ადამიანი მოწევას თავს დაანებებს.
აგრეთვე ძალიან გავრცელებულია კანის კიბო. სხვადასხვა სახის რადიაციებს, განსაკუთრებით, მზის ულტრაიისფერ სხივებს, შეუძლია კანის უჯრედების დაზიანება და კიბოს გაჩენა.
კიბოს მკურნალობა
სიმსივნეების უმრავლესობის მკურნალობა შესაძლებელია, თუ მათი აღმოჩენა ადრეულ სტადიაში მოხდება. ზოგჯერ, მკურნალობა სიმსივნის მოსაშორებლად ქირურგიულ ჩარევას მოითხოვს, რასაც როგორც წესი, ძლიერი წამლების (ქიმიოთერაპიის) კურსი მოჰყვება. ამ წამლების უმრავლესობას უსიამოვნო გვერდითი ეფექტები აქვს, რადგან ისინი კიბოს უჯრედებთან ერთად ჯანმრთელ უჯრედებსაც კლავენ.
ყველაზე თანამედროვე მკურნალობაში, ‘‘ჯადოსნური ტყვიების’’ საშუალებით წამლებს პირდაპირ კიბოს უჯრედებს აწვდიან. ‘‘ჯადოსნური ტყვიები’’ სპეციალური ანტისხეულებია, რომლებიც მხოლოდ კიბოს უჯრედებს უერთდება.
|
|
|
|
|
|
|
|
|
|
|
|
