დარბაისელი ნინო - Darbaiseli Nino



ამპულა (ოპუსი N ?)

(ampula (opusi N ?)


ენაცვალოს ბაბო! წუხელ ისეთი მოვიდა, ტუფლების გახდის თავიც არა ჰქონდა. ტახტზე მიეგდო, ცოტა, ტელევიზორს ვუყურებო და ეგრევე ჩაეძინა. დილაადრიან თვალდახუჭულმა გაიპარსა წვერი და გავარდა.
ან რასა ჭამს, ან რასა სვამს მთელი დღე ! სუ დაიავადებს იმ კუჭ-ნაწლავს. დილდილობით ჰერკულესის ფაფას ვუხარშავ და კოვზით მივდევ, მაგრამ გამასწრებს ხოლმე.
ცხრისაც არ იყო, მამამისი ნეფრიტით რო კვდებოდა. რეანიმაციიდან ვერ გამოგვყავდა, იქ ედგა თავზე. მერე ვიღაცას წამოსცდენია, ერთი წამალი უშველის, ერთი საავადმყოფოს მთავარ ექიმს ის ამპულა სეიფში აქვს ჩაკეტილიო.
გაგვეპარა. შესულა კაბინეტში და უთქვია. მამა მიკვდება, მე ვიცი,იმის გადასარჩენი წამალი მარტო თქვენა გაქვთ, აი ფული, ჩემი მოგროვილია, კაცურად მიშველეთ, ჯერ პატარა ვარ, გავიზრდები,მეც კაცი გავხდები და გამოგადგებითო. იმასაც მიუცია და ფულიც არ გამოურთმევია, მაგრამ რაღა, რა! გვიანი იყო.
ობლად გავზარდე, უბეში. დედამისს სამაგისოდ ნერვები არა ჰყოფნიდა.სულ დედაშვილშუა ვიდექი. ბიჭი ძნელი გასაზრდელია. ხან იცელქებს, ხან იზარმაცებს, ხან იჩხუბებს, კუდში დავდევდი, რამე არ შეეშალოს, გზიდან არ ამიცდეს-მეთქი.
დედამისს არც არაფერს უყვება. მე კიდე, ხანდახან გულსაც გადამიშლის ხოლმე. რჩევასაც მეკითხება, ბაბო, ეს როგორა ვქნა, ის - როგორაო , მერე კი მაინც თავის ჭკუაზე აკეთებს, რაც უნდა, მაგრამ მე ხო მაინც მიხარია!
შენგან, ვიცი, არ გავა და, ერთი თვე ამზადებდა ოპერაციას ნარკომანების დიდი ჯგუფის ასაყვანად. პირველი საქმე იყო და უფროსმა უთხრა, აბა, შენ იცი, ეგ თუ გამოგივიდა, საგამომძიებლოს უფროსს რო დააწინაურებენ, იმის ადგილზე შენ უნდა გადაგიყვანოო. ხედავს, რო მონდომებულია და კარგი თვალით უყურებს.
ჰოდა, რო შეურეკიათ აყვანილები განყოფილებაში და ამპულებით სავსე ამოდენა სუმკებიც რო დაუხსნიათ, მთელი ქვეყნიერება შეიყარა, ტელევიზორშიც იმდენჯერ აჩვენეს, მაგრამ იქ მაგას ვერ დაინახავდი. უფროსმა მისცა ინტერვიუ, ეგ იმ დროს დაკითხვაზე იყო. ტელევიზია რო წასულა, გამოვიდა გარეთ და რასა ხედავს! ის კაცი, აი, მთავარი ექიმი რო იყო, დაბერებული , სუ გაჭაღარავებული და უკბილო , იქ არა დგას, კუთხეში?! ერთის მამა ყოფილა.
შესულა უხმოდ ჩემი ტატო უფროსთან და ეუბნება: ერთი კაცი აქედან უნდა გავუშვა და მერე , თუ გინდათ, ამ სამსახურიდან სუ წავალო. რაშია საქმე, ვინ არისო და , ჩემი ნათესავიაო. მერე ამდენი ხანი ჯგუფზე მუშაობდი და შიგ რო შენი ნათესავი ერია, ეხლა გაიგეო ? ...მაგრამ ხელი ჩაუქნევია და კარგი, ოღონდ დაავერბოვკეო.
შეუყვანია თავის ოთახში ის ბიჭი, იმისთანა უცემია, დედის რძე არ შეურჩენია, მერე კარებიდან წიხლით გამოუგდია. იცოდე, მეორედ არ გადამეყარო, თორე საცა დაგიჭერ, ადგილზე გაგათავებო.
ვეუბნები, შვილო, მერე არ უთხარი, მამაშენს გადაეცი, მე ის ბიჭი ვარ . აი, ხო დაგპირდით, კაცი გავიზრდები და მეც გამოგადგებითო ? არაო. ვერც იმ კაცსა ? -მეთქი და, ე-ეჰ, ბაბო, შენ ეგეთ ხალხს არ იცნობ. ის ბიჭი ნარკომანობას არ მოიშლის, კიდე ჩავარდება, მამამისმა რო გაიგოს , ვინცა ვარ, მერე ადგება და პირდაპირ მე მომადგებაო.
დედამისი კიდე, მაგისგან კაცი არ გამოვაო... ეგე, თუ არ გამოვიდა!
































ტექსტის სანახავად გაიარეთ რეგისტრაცია.