ახალი წლის მოახლოვებასთან ერთად ფსონებსაც უფრო მეტი დებს, თუმცა ამჯერად აზარტული თამაშების ნაცვლად, საუბარი სატელევიზიო პროექტებზეა. სულ მალე მაყურებელი "ცეკვავენ ვარსკვლავების” ამ სეზონის გამარჯვებულს გამოავლენს. შესაბამისად სამშაბათ დღეს კიდევ უფრო დიდი ინტერესით და მეტი ინტრიგების მოლოდინით ველით.
ინტრიგების რა გითხრათ და წინა გადაცემაში პროექტი ერთ-ერთმა მონაწილემ დატოვა. სოფო ნიჟარაძეს მამა გარდაეცვალა. მომღერალმა ამის შესახებ ჩაწერის დაწყებამდე ცოტა ხნით ადრე შეიტყო. სამწუხარო ამბის შემდეგ ცეკვავენ ვარსკვლავების მესვეურებმა შემდეგი გადაწყვეტილება მიიღეს: გადაცემის ბოლოს აუთსაიდერი წყვილიდან აღარავინ გავარდნილა.
თუმცა არა იმას განვიხილავთ, რაც უკვე მოხდა, არამედ ახალ ჭორებს გაგანდობთ. კულუარული ინფორმაციის მიხედვით, დიდი შანსია პროექტს იულია ქავთარაძე და ოთო ფოლადაშვილი დაუბრუნდნენ. წყვილის გავარდნის შემდეგ ეს თემა აქტუალობას დიდი ხანი არ კარგავდა.
თუმცა წყვილი პროექტში აღარ დაუბრუნებიათ, სამაგიეროდ ეხლა, როდესაც ერთი კონკურსანტი გაუთვალისწინებელი სამწუხარო მიზეზის გამო პროექტს გამოეთიშა, იულიას და ოთოს დაბრუნების თემამ ისევ წინ წამოიწია.
როგორც კულუარულ ჭორებში ამბობენ, ამჯერად ერთადერთი წინაღობა მესვეურებისთვის დარჩენილი მონაწილეებია. როგორც გავიგეთ, კონკურსანტები იულიას დაბრუნებას სასტიკად აპროტესტებენ. მიუხედავად იმისა, რომ გადაცემის მიღმა დარჩენილი მომღერალი ყველა კონკურსანტს თბილად იხსენებს, ეტყობა კონკურენცია მაინც თავისას შვება. არავის აწყობს, რომ პროექტის ბოლოსკენ შემადგენლობას ძლიერი კონკურსანტი შეემატოს.
მიუხედავად ყველაფერისა, გამორიცხული არაფერი არაა. ჯერ-ჯერობით ოფიციალურად გადაცემის მესვეურები არაფერს აჟღერებენ, მაგრამ თუ იმას გავითვალისწინებთ, რომ იულიას საქართველო არ დაუტოვებია და ისევ თბილისში იმყოფება, გამორიცხული არაფერია…
წყარო: musicbox.ge
დაბრუნდება თუ არა იულია ქავთარაძე "ცეკვავენ ვარსკვლავებში"?!
⏱️ 1 წთ.
👁️ 1 802
100%