ნოდიკო ტატიშვილი და სამი ლამაზმანი

ნოდიკო ტატიშვილისათვის 2012 წელი იღბლიანი იყო. ახალგაზრდა შემსრულებლის კარიერაში მნიშვნელოვანი მოვლენები მოხდა, სოლო კონცერტი გამართა, მიუზიკლ "ვერის უბნის მელოდიებში" ითამაშა და ორი კლიპი გადაიღო. ამის აღსანიშნავად და ახალი კლიპის საპრეზენტაციოდ კოლეგები კინოთეატრ "რუსთაველში" შეკრიბა. ამით ერთი კარგი საქმეც გააკეთა – ერთმანეთს დიდი ხნის მონატრებული მომღერლები შეახვედრა.
ნოდიკოს ახალ კლიპში სამი ლამაზმანი თამაშობს. კრისტი და რუსა ჩაჩუა ასე თუ ისე ყველამ იცის, აი, ნინუცა ფოცხიშვილის ეგზოტიკურმა გარეგნობამ კი ყველა სასიამოვნოდ გააკვირა. სრულიად ახალი სახე რეჟისორ ზაზა ორაშვილის აღმოჩენაა. ნინუცას დედა – ჩინელი, მამა კი ქართველი ჰყავს.
პრემიერის ბოლოს ნოდიკომ ტრადიციულად სადღესასწაულო ტორტი გაჭრა. ყველას კმაყოფილება ეტყობოდა, კოლეგებმა ნოდიკოს ახალი ნამუშევარი შეუქეს, თუმცა ზოგიერთი ირონიულადაც ეკითხებოდა: "კი, მაგრამ ეს კლიპი რომელ არხზე უნდა დაატრიალო?". კითხვა პასუხგაუცემელი დარჩა.
– სიმღერა "მინდა, ჩემთან იყო" ძალიან მომწონს და გადავწყვიტე, გადამეღო კლიპი. ზაზა ორაშვილს მივმართე და სრულიად ვენდე. შემოქმედებით პროცესში საერთოდ არ ჩავრეულვარ. ამ კლიპით ერთგვარად ჩემი წლევანდელი საქმიანობა შევაჯამე. წელს მქონდა სოლო კონცერტი, მიუზიკლი "ვერის უბნის მელოდიები", კიდევ ერთი კლიპი დათუნა მგელაძესთან და ივანასთან ერთად. ასე რომ, ნამდვილად წარმატებული წელი მქონდა, – გვითხრა ნოდიკო ტატიშვილმა