სასიყვარულო სამკუთხედი – პუტინი, კაბაევა, მუსელიანი

შეინარჩუნებს თუ არა ლუდმილა პუტინა პირველი ლედის სტატუსს, მთლად გადაწყვეტილი არ არის.
ბოლო ხანს უცხოური პრესა კიდევ ერთხელ აჭრელდა ვლადიმერ ვლადიმეროვიჩისა და ცნობილი რუსი სპორტსმენის, ალინა კაბაევას (მხატვრულ ტანვარჯიშში ევროპის, მსოფლიოსა და ოლიმპიური თამაშების ჩემპიონი) რომანზე სტატიებით. რუსულ პრესაში დაიწერა ისიც, რომ აგვისტოს ომის შემდეგ ოკუპირებულ ცხინვალში კაბაევამ სპორტის სასახლის მშენებლობა წამოიწყო. ამბობენ, რომ სწორედ ის ჩაუდგება სათავეში ოკუპირებულ ტერიტორიაზე სპორტის განვითარებას, თუმცა ცხინვალის რეგიონი ერთადერთი არაა, რაც ვლადიმერ პუტინის ფავორიტ სპორტსმენს საქართველოსთან აკავშირებს. არცთუ შორეულ წარსულში ის ქუთაისელების სარძლო გახლდათ. 40 წლის მილიციის კაპიტანი შალვა მუსელიანი და 26 წლის ალინა კაბაევა დღეს, ალბათ, ოფიციალურ ქორწინებაშიც იქნებოდნენ, მათ ცხოვრებაში ვლადიმერ პუტინი რომ არ გამოჩენილიყო.

ვინ არის შალვა მუსელიანი და გახდა თუ არა ალინა კაბაევასთან მისი დაშორების მიზეზი რუსეთის პირველი პირი?
ქუთაისში შალვა მუსელიანის შესახებ ინფორმაციის მოძიება არცთუ ადვილი აღმოჩნდა. ის საქართველოდან 1990-იანი წლების დასაწყისში წავიდა და ბოლოს მშობლიურ ქალაქს 5 წლის წინათ სტუმრობდა. თავად მუსელიანების ოჯახი ქუთაისის ერთ-ერთ უბანში, საცხოვრებელი კორპუსის მე-3 სართულზე, სხვებისგან არცთუ გამორჩეულად ცხოვრობს. სახლში შალვა მუსელიანის დედა გვხვდება. ქალბატონი ნანი ჩვენმა გამოჩენამ გააკვირვა. სიტყვაძუნწობის მიუხედავად, ნანი მუსელიანთან მისი ვაჟის გახმაურებული რომანის შესახებ რამდენიმე დეტალის დაზუსტება მაინც მოვახერხეთ. მოკლედ, შალვა მუსელიანი, რომელსაც ახლობლები დათოს ეძახიან, 90-იან წლებში რუსეთში ასპირანტურაში ჩაბარების მიზნით წავიდა, თუმცა ასპირანტურის ნაცვლად ადგილობრივი მილიციის განყოფილებაში მოეწყო. მოსკოვში გაიცნო მომავალი მეუღლე ოლღა, რომელთანაც ერთადერთი ქალიშვილი – ნანა შეეძინა. რამდენიმეწლიანი თანაცხოვრების შემდეგ ოჯახი დაინგრა. ეს მას შემდეგ მოხდა, რაც შალვა მუსელიანმა ალინა კაბაევა გაიცნო. თავად ოლღა, რომელიც ამჟამად მოსკოვში ქალიშვილთან ერთად ცხოვრობს, ჯერ კიდევ 5 წლის წინათ რუს ჟურნალისტს მოუყვა, რომ მეუღლესთან მისი დაშორების მიზეზი ალინა კაბაევა არ გამხდარა, თუმცა იქვე საინტერესო დეტალი გაამჟღავნა, – შალვამ ალინას ძვირადღირებული „მერსედესი“ აჩუქაო. მოგვიანებით მედიამ ისიც გაარკვია, რომ მაღალი კლასის ავტომობილი კაბაევამ თავად შეიძინა და მეტი რომანტიზმისთვის საქმროს საჩუქრად გაასაღა. კაბაევების ოჯახს სურდა, შალვა მუსელიანი შეძლებულ სასიძოდ წარმოეჩინა, თუმცა, როგორც ჩანს, ალინამ გამოგონილ შეძლებულს ნამდვილი მილიარდერი არჩია, თანაც რუსეთის პირველი პირი.
შალვა მუსელიანის დედა „პრაიმტაიმთან“ საუბრისას ამბობს, რომ ამჟამად მის ვაჟს კაბაევასთან ურთიერთობა აღარ აქვს.

ნანი მუსელიანი, შალვა მუსელიანის დედა:
– საერთოდ არ მსურს ამ თემაზე საუბარი. პოლიტიკაში ნუ გამრევთ, ძალიან გთხოვთ.
– პოლიტიკა რა შუაშია. საუბარია თქვენი ვაჟისა და ცნობილი რუსი სპორტსმენის ურთიერთობაზე. ალინა კაბაევასთან კვლავ...
– არა, გენაცვალე, დამთავრდა ეგ. მორჩა.
– ანუ დაშორდნენ ხომ?
– დიახ, არც ჰქონდათ ისეთი ურთიერთობა.
– თუ გაგაცნოთ თავის დროზე ოჯახს? როგორც ცნობილია, მის ცოლად მოყვანას აპირებდა.
– არა, აქ არ ჰყოლია ჩამოყვანილი. მისი მეუღლე იყო ოლღა, რომელთანაც ერთი ქალიშვილი ჰყავს, 12 წლის ნანა.
– ახლა თუ ჰყავს შალვას მეუღლე?
– ოლღასაც დასცილდა, ახლა არის უცოლო. დაკავებულია თავისი საქმეებით. სხვას ვერაფერს გეტყვით.
– ალბათ, იცით, რომ შალვასა და ალინას რომანის შესახებ უცხოური პრესაც წერდა...
– კი, წერდა, მაგრამ ახლა ვის მოაგონდა ეს ამბავი? ეს იყო 5 წლის წინათ. ხომ გითხარით, დამთავრდა-მეთქი. 5 წელი გავიდა მას შემდეგ. რატომ გაინტერესებთ, არ მესმის. თქვენი მოქალაქე არაა, ცხოვრობს საზღვარგარეთ, რატომ გაინტერესებთ?!
– გვაინტერესებს იმიტომ, რომ ქართველია...
– ასე უამრავი ქართველი ცხოვრობს რუსეთში.
– თუმცა ყველას არა აქვს რომანი პუტინის რჩეულ სპორტსმენთან?
– ხომ გითხარით, ვერაფერს გეტყვით მაგ თემაზე. მორჩით შეკითხვებს? ჩემგან ვერაფერს გაიგებთ. მე ჩემს შვილთან არ მაქვს ურთიერთობა.
– რატომ? არ გიკავშირდებათ ხოლმე?
– არ ველაპარაკები. 5 წელია, არ გვქონია საერთო. მე ქუთაისში ვცხოვრობ, ის – რუსეთში. რა გითხრათ, აბა. ბოლოს 5 წლის წინათ იყო ჩამოსული.
– ალინას მას შემდეგ დასცილდა, რაც პუტინთან მისი ურთიერთობის შესახებ გახდა ცნობილი?
– არა, არა. მანამდე უკვე აღარ იყვნენ ერთად.
– შვილიშვილთანაც არ გაქვთ ურთიერთობა?
– კი, როგორ არ მაქვს. ბავშვი პატარა იყო, როცა ოლღას დასცილდა. ალინას კი საერთოდ არ ვიცნობ.
– ამბობენ, რომ ალინას გამო მიატოვა ცოლი...
– არ ვიცი, არ მაინტერესებს საერთოდ ეგ სახელი. ღმერთმა კარგად ამყოფოს, მშვენივრად არის ეგ გოგო. რომ ჰქონდა ურთიერთობა, ეგ ვის აინტერესებს, მაგაზე დაიწერა საზღვარგარეთ და მორჩა ამბავიც. ვის აინტერესებს ჩემი შვილის ისტორია, არ მესმის. აქ იყო, ვერ იშოვა სამსახური და წავიდა რუსეთში. მისი ძმაც იქ ცხოვრობს.
– დაიწერა, რომ ალინა კაბაევას გამო პუტინის დაცვა გაუსწორდა და სწორედ ამის შემდეგ შეწყვიტა ურთიერთობაო...
– ეგ ყველაფერი სისულელეა. სხვას ნამდვილად ვერაფერს გეტყვით. ნახვამდის.

თავად კაბაევას ცხოვრება კი ელვის სისწრაფით შეიცვალა მას შემდეგ, რაც მისი სექსუალური იმიჯით რუსეთის პრეზიდენტი მოიხიბლა. მხატვრულ ტანვარჯიშში მიღწეული წარმატება მას ნამდვილად დაუფასდა. ახალგაზრდა, სექსუალურ სპორტსმენს მკერდზე მედალი პირადად ვლადიმერ პუტინმა დაჰკიდა. მალე ალინა „ედინაია როსიას“ წევრი გახდება და რუსეთის პარლამენტის მანდატსაც დაეუფლება. ქართველი შალვა მუსელიანის მსგავსად, მომხიბლავი სპორტსმენით კრასნოდარის მხარის გუბერნატორის ვაჟიც დაინტერესდა. ამ ამბის გახმაურების შემდეგ კი გუბერნატორი თანამდებობიდან გაათავისუფლეს. იგივე ბედი გაიზიარა შალვა მუსელიანმაც, რომელიც კაბაევასთან რომანის შემდეგ შავ სამყაროსთან კავშირში და ქრთამის აღებაში დაადანაშაულეს. ამ პერიოდში პრესა ალინა კაბაევას თითქმის უკვე დარწმუნებით უწინასწარმეტყველებდა, რომ ის კრემლის მთავარი დიასახლისი გახდებოდა. „ნიუ-იორკ პოსტი“ იმასაც კი წერდა, კაბაევამ ვლადიმერ პუტინს მემკვიდრე გაუჩინაო. რამდენად ახდება მედიის წინასწარმეტყველება, ეს, ალბათ, მას შემდეგ გაირკვევა, რაც ვლადიმერ პუტინი პრეზიდენტის პოსტს ოფიციალურად კიდევ ერთხელ მოირგებს.


რამდენს შოულობს პუტინის საყვარელი??

სპორტსმენმა, დეპუტატმა და უბრალოდ ლამაზმანმა ალინა კაბაევამ, რომელსაც ყვითელი პრესა ვლადიმერ პუტინის სასიყვარულო კავშირში ამხელს, თავისი შემოსავლები გამოამზეურა. შარშან მას ჯიბეში 13 მილიონი რუბლი ჩაუვიდა. საკუთრებაში მას აქვს ნაკვეთი, სამი ბინა და ორი მანქანა