ტიპი 1- ქალი, რომელიც ყველაფერზე პასუხისმგებლობას საკუთარ თავზე იღებს
დევიზი: ,,თუ გინდა, საქმე გამოგივიდეს, შენს გასაკეთებელს შენზე უკეთ ვერავინ გააკეთებს."
,,ნუ შეგეშინდება, ნუ მოითხოვ, ნუ ენდობი".
ხასიათის თავისებურებები: ამაყი, არ უყვარს დიდხანს ლოდინი და მოვალეობების დელეგირება, სანდოა, 100%-ით იხარჯება, მუშაობს სრულ გადაღლამდე.
მთავარი საფრთხე: ვერც მუდმივ გადაღლილობას და გადატვირთულობას გრძნობს და ვერც ჯანმრთელობის გაუარესებას ამჩნევს. ასეთ შემთხვევაში ერთბაშად მოწყვეტა ემუქრება.
რეკომენდაცია: ეცადეთ, ნაკლებად გადაიტვირთოთ. აკეთეთ ის, რაც გსურთ და არა ის - რაშიც ვალდებული ხართ, აკეთოთ. თქვენ ნაცვლად თქვენს სასურველს ვერავინ გააკეთებს. გაითავისეთ: ,,ჯერ თავო და თავო, მერე ქმარო და შვილო". გადამწვარი და უბედური არც საკუთარ თავს და, მით უმეტეს, არც სხვას გამოადგებით.
აიღეთ ფურცელი და ჩამოწერეთ ასი თხოვნა. დაიწყეთ სიტყვებით: ,,მე მინდა..." წარმოიდგინეთ, რომ თქვენი ვალდებულება სხვამ შეითავსა. განავითარეთ ეს სიტუაცია. დააკვირდით, რა მოხდება, რა მოჰყვება ამ ყველაფერს. იმსჯელეთ მანამ, სანამ ლოგიკურ დასასრულამდე არ მიხვალთ. ან დარწმუნდებით, რომ არაფერი განსაკუთრებული არ ხდება, ან დარჩებით იმ აზრზე, რომ მთელი მსოფლიოს საზრუნავი თქვენს კისერზეა.
ტიპი 2 - პერფექციონისტი
დევიზი: ,,სურვილი მაქვს, ცას მივწვდე და შევეხო"
,,სრულყოფილებას არა აქვს ზღვარი"
ხასიათის თავისებურებანი: პედანტი, ზედმეტად კორექტული, უნდობი, ეჭვის თვალით უყურებს სხვის წარმატებას, მიაჩნია, რომ მათ იდეალურობამდე ბევრი აკლიათ.
მთავარი საფრთხე: მუდმივი განცდა იმის, რომ გარშემო ყველა და ყველაფერი არ არის იდეალური, მუდმივ სტრესში გადასდის.
რეკომენდაცია: დაუშვით, რომ უნაკლო არავინაა, მათ შორის, თქვენც. მიეცით თავს უფლება, მოიხსნათ შეზღუდვები. გამხიარულდით, ხანდახან მკაცრ წესებს გადაუხვიეთ და გაიმარტივებთ ცხოვრებას.
სასარგებლოა სუფთა ჰაერზე სეირნობა და ეზოში მოთამაშე ბავშვების ხშირად თვალყურის დევნება.
ტიპი 3 - გვერდზე მდგომი
დევიზი: ,,ფიგარო - აქ, ფიგარო - იქ, ფიგარო - ყველგან"...
ხასიათის თავისებურებანი: რბილი, მიმნდობი, ხშირად იმაზე მეტს ჰპირდება ადამიანებს, ვიდრე ამის გაკეთება შეუძლია. არ არის მომთხოვნი და არ უყვარს საკუთარი უარყოფითი განწყობების გაზიარება. ძალიან გულჩათხრობილია.
მთავარი საფრთხე: სხვისი დახმარების აღმატებული სურვილი და არაშესაბამისი საშუალება წარმოქმნის სტრესისა და უმაყოფილების გრძნობის მეტად საშიშ ნაზავს. დროთა განმავლობაში ფსიქოსომატური დაავადებები ან დეპრესიული მდგომარეობა გარდაუვალია.
რეკომენდაცია: უნდა მიეჩვიოთ დამაჯერებლად უარის თქმას და შეძლოთ საკუთარი სურვილების რაციონალურად ჩამოყალიბება.
თუ ჩვევად გაქვთ, რომ დახმარება მანამ შესთავაზოთ, სანამ ადამიანი პრობლემას ჩამოაყალიბებს, გირჩევთ: ხშირად გააკეთეთ პაუზა, გადაწყვეტილება საჭირო დროს და არა სპონტანურად უნდა მიიღოთ. თავს უმალვე ნუ დააქნევთ – ,,დიახ, მე დავფიქრდები და დავრეკავ" – ეს ფრაზა გაცილებით მართებულია.
აწონ-დაწონეთ ზარალი და მოგება. ყოველ კონკრეტულ შემთხვევაში ჰკითხეთ საკუთარ თავს, რა მოხდება, რომ დროებით გადადოთ თქვენი ინტერესები. იაზროვნეთ მასშტაბურად, ახლო მომავლით ნუ შემოიფარგლებით. შედეგებზე პერსპექტივაში იფიქრეთ. როგორ აისახება თქვენი თავდადებული ნაბიჯი ოჯახთან, კოლეგებთან, მეგობრებთან ურთიერთობაზე ან თვითშეფასების კოეფიციენტზე.
ტიპი 4: იდეალური ქალი ,,ტერმინატორი”:
დევიზი: "ერთი ყველასათვის!"
ხასიათის თავისებურებები: მეგობრული, დადებითი, მშვიდი, ყოველთვის ენერგიულად და მხნედ გამოიყურება. ცდილობს, ერთდროულად იდეალური მეუღლე, დედა და წარმატებული ბიზნესლედი იყოს. მას ხშირად იყენებენ, რასაც თავადაც აცნობიერებს, თუმცა იმიჯის შესანარჩუნებლად სიტუაციას ეგუება.
მთავარი საფრთხე: ნაადრევი სიბერე, რაც გამოწვეული იქნება ემოციების შეკავებით და დაფარული შინაგანი სტრესებით.
რეკომენდაცია: მიეჩვიეთ, შეძლოთ ვალდებულებების დელეგირება. დაეთანხმეთ და გაითავისეთ ახალი პრინციპი: ”ბოლომდე ნუ დაიხარჯებით”. დარწმუნებული ბრძანდებოდეთ, რომ თქვენი სასურველი მაქსიმუმის ნახევარი სავსებით საკმარისი იქნება, როგორც საქმის წარმატებულად წარმართვის, ასევე იმიჯისა და შინაგანი სიმშვიდის შენარჩუნებისთვის...
ინა ნერგაძე
ჟურნალი ”... და ქალი”