ალბათ, ისიც გსმენიათ, რომ მცირე დოზით წითელი ღვინო გულ-სისხლძარღვთა დაავადებებისათვისაა კარგი. სამწუხაროდ, იმავე თვისებით ვერ დაიკვეხნის სპირტიანი სასმელები.
თუ ლუდის მოყვარული ხართ, თქვენთვისაც გვაქვს დამამშვიდებელი სიახლე: ჩეხეთსა და ნიდერლანდებში ექსპერიმენტების შედეგად დადგინდა, რომ ვიტამინი B6, რომელსაც დიდი რაოდენობით შეიცავს ლუდი, ხელს უშლის ინფარქტის წარმოშობას.
ამას გარდა, ლუდი დიდი რაოდენობით პოლითენოლს შეიცავს, რომელიც "ცუდ" ქოლესტერინს არეგულირებს.
ყურადღება: დღიური ნორმა უნდა იყოს ერთი კათხა ლუდი ან ერთი ბოკალი წითელი ღვინო.
2. კალორიების თვლა
კალორიების წინააღმდეგ ბრძოლისას გაზიანი სასმლის მოყვარულები ცდილობენ, მისი დიეტური ანალოგი მიირთვან.
ტეხასის შტატის უნივერსიტეტში 622 მონაწილეს 8 წლის განმავლობაში აკვირდებოდნენ. აღმოჩნდა, რომ ისინი, ვინც დიეტურ გაზიან სასმელს მიირთმევდნენ, გაცილებით სწრაფად იმატებდნენ წონაში, ვიდრე ისინი, რომლებიც აკრძალვებს არ ემორჩილებოდნენ.
საქმე ისაა, რომ სასმელი, რომელიც "0 კალორიას" შეიცავს, ცრუ სიგნალის მატარებელია- თუმცა ტკბილი, მაგრამ სინამდვილეში ორგანიზმს სიტკბოს მოთხოვნას ვერ უკმაყოფილებს.
ყურადღება: სჯობს კვირაში ერთხელ გაზიანი სასმელი მიირთვათ, ვიდრე ყოველდღიურად "დიეტური" სასმელები სვათ.
3. სმს-შეტყობინება
10 მილიარდზე მეტი სმს-შეტყობინება - დაახლოებით ამ რაოდენობის მესიჯი იგზავნება მსოფლიოში ყოველკვირეულად. ეს ყველაფერი ადამიანებთან ნახვის აუცილებლობას ასე თუ ისე აგვარებს, რაც ცუდია, თუმცა ეს კატასტროფა არ არის. პირიქით, მობილური ტელეფონები კომუნიკაციას აადვილებს, მათ შორის - მშობელთა და შვილებს შორის. ამ ყველაფრის დადებითი მხარე ლაკონურობაა.
მესიჯის წყალობით ნაკლებად ჩანს გაბრაზება ან განრისხება, რაც პირად ურთიერთობებში ძნელია, დამალო.
ყურადღება: სმს-მანიამ შესაძლოა ნამდვილ მანიაკად გაქციოთ. იმისათვის, რომ ამ რისკ-ჯგუფში არ მოხვდეთ, გირჩევთ, ერთ ჯერზე 5-10 წუთზე მეტხანს ნუ იმესიჯებთ.
4. უცხიმო პროდუქტის ფანები
თუკი რძის, იოგურტისა და ყველის ყიდვისას აუცილებლად აკვირდებით მასში შემავალი ცხიმის რაოდენობას და მხოლოდ ამის შემდეგ ყიდულობთ პროდუქტს, შეგიძლიათ მოდუნდეთ - უელსის უნივერსიტეტის სწავლულებმა 25 წელს გადაცილებული 2375 მამაკაცი გამოიკვლიეს.
აღმოჩნდა, რომ ისინი, რომლებიც ცხიმიან პრუდუქტს მოიხმარდნენ, 63%-ით იშვიათად იტანჯებოდნენ მეტაბოლური სინდრომებით, რომლებიც დიაბეტსა და გულ-სისხლძარღვთა დაავადებებს იწვევს.
ყურადღება: ცხიმიანი პროდუქტის დადებითი თვისება დიეტასთან ბალანსის დროსაა თვალსაჩინო. წინააღმდეგ შემთხვევაში, წონის მატება გარანტირებული გექნებათ.
5. ხმამაღალი მუსიკა
თუ სასოწარკვეთილი ხართ იმის გამო, რომ თქვენი შვილის ოთახიდან მუსიკის გამაყრუებელი ხმა სისტემატურად ისმის, დამშვიდდით! ეს გარკვეულწილად სასარგებლოც კი შეიძლება აღმოჩნდეს.
მეცნიერებმა დაადგინეს, რომ რაც უფრო ხმამაღლა უსმენ მუსიკას, მით უფრო მეტ სიამოვნებას განიჭებს იგი და ტვინს დადებითი ემოციის სიგნალი მიეწოდება.
ყურადღება: ხმამაღალი მუსიკა დისკოთეკებზე ხშირად 100 დეციბალს აჭარბებს. დასაშვებია 85 დეციბალამდე მუსიკის მოსმენა მხოლოდ 8 საათამდე, მაგრამ თუ მუსიკა 88 დეციბალამდე აღწევს, ეს დრო ორჯერ უნდა შემცირდეს.
6. ოჯახსა და სამსახურს შორის
თქვენ მუშაობთ, შვილებიც გყავთ და ქმარსაც უვლით? გგონიათ, რომ შესაძლოა გადაღლილობას ვეღარ გაუძლოთ? გვერწმუნეთ, ასეთი პერსპექტივა არ გემუქრებათ. ინგლისელი მეცნიერების დასკვნით, მსგავს ყოფაში მყოფი ქალები ბევრად სრულფასოვნად და ბედნიერად გრძნობენ თავს, ვიდრე დიასახლისები და უშვილოები.
7. კომპიუტერომანია
ბავშვს ვერაფრით აშორებთ კომპიუტერს? გამუდმებული თამაშის გამო პატარა სწავლას გულს ვეღარ უდებს? თქვენ წარმოიდგინეთ, ეს არც ისე საგანგაშოა. მეცნიერები ირწმუნებიან, რომ მოზარდებს კომპიუტერული თამაშების წყალობით კონცენტრაციის უნარი უვითარდებათ და გონებრივი განვითარების კოეფიციენტიც უფრო მაღალი აქვთ.
ტვინზე ჩატარებულმა გამოკვლევებმა აჩვენა, რომ ვიდეოთამაშები პატარებს ჰიპოთეზების ფორმულირებაში უწყობს ხელს. ამასთან, რამდენიმე საგანზე ერთდროულად კონცენტრირების უნარს გამოუმუშავებს მათ.
ყურადღება: კომპიუტერულმა თამაშებმა ბავშვს მხოლოდ დადებითი ემოციები უნდა მოჰგვაროს. თამაშს არ უნდა ჰქონდეს ძალიან მაღალი ხმა, მასში არ უნდა იყვნენ საშიში პერსონაჟები და არ უნდა ფიგურირებდეს სისხლი. ასევე, თამაშები ბავშვის ასაკს უნდა შეესაბამებოდეს.
თუკი თამაშისას ბავშვი მოგებას ვერ ახერხებს და ამას რეალურად განიცდის, მაშინ ამ თამაშის სხვა ალტერნატივით შეცვლა ურჩიეთ.
8. საშიში კოფეინი
ამ თეორიის მიმდევრები თავს იმით იმშვიდებენ, რომ უკოფეინო ჩაი და ყავა ბევრად სასარგებლოა, რადგან არ აჩქარებს გულისცემას და ამცირებს კიბოს რისკს. არადა, ეს სინამდვილეს არ შეესაბამება. მეცნიერებმა დაადგინეს, რომ მამაკაცებს ყავა პარკინსონის წინააღმდეგ ბრძოლაში ეხმარება.
იაპონელი მკვლევარები კი ამტკიცებენ, რომ ის ადამიანები, რომლებიც ყოველდღიურად სვამენ ყავას, ფილტვის კიბოთი ნაკლებად ავადდებიან. რაც შეეხება მატონიზირებელ ეფექტს, კოფეინი არა მარტო გუნება-განწყობას ამაღლებს, არამედ სპორტულ აქტივობასაც ზრდის.
ყურადღება: არსებობს მოსაზრება, რომ კოფეინი საზიანოა დიაბეტით დაავადებულთათვის და მათთვის, ვისაც ჰიპერტონია აწუხებს. ამ შემთხვევაში ექიმები გვირჩევენ, ბოროტად არ გამოვიყენოთ ყავა.
ჟურნალი "და ქალი"