ექიმების, ფსიქოლოგებისა და დიეტოლოგების საერთაშორისო ჯგუფმა სიცოცხლისა და ახალგაზრდობის გასახანგრძლივებლად რამდენიმე რჩევა ჩამოაყალიბა.
მართალია, გენეტიკურად ადამიანი 120 წელი უნდა ცოცხლობდეს, მაგრამ სინამდვილეში სიცოცხლის ხანგრძლივობა გაცილებით ნაკლებია.
ნუ შეჭამთ ზედმეტს
ჩვეული 2500 კალორიის ნაცვლად, დღეში 1500 კალორია მიიღეთ. ამით განტვირთავთ ორგანიზმს და შეძლებთ უჯრედების აქტიურობის შენარჩუნებას. ასეთ შემთხვევაში უჯრედები გაცილებით სწრაფად მრავლდება და ახლდება, რაც, თავის მხრივ, მრავალი დაავადების რისკს ამცირებს. იკვებეთ ნორმალურად - არც ცოტა და არც ძალიან ბევრი.
რაციონი ასაკს უნდა შეესაბამებოდეს
30 წელს გადაცილებულ ქალებს პირველი ნაოჭები გაცილებით გვიან გაუჩნდებათ, თუ რეგულარულად შეიტანენ საკვებ რაციონში საქონლის ღვიძლსა და ნიგოზს. 40 წელზე უფროსებისთვის რეკომენდებულია ბეტა-კაროტინი, 50 წლის ზევით კი - კალციუმი ძვლებისთვის და მაგნიუმი - გულისთვის.
40 წელზე უფროსი ასაკის მამაკაცებისთვის საჭიროა სელენი, რომელსაც შეიცავს ყველი და საქონლის თირკმელები. სელენი სტრესს აგაშორებთ. თუ 50 წლის შემდეგ რაციონს თევზით გაამდიდრებთ, დაიცავთ გულსა და სისხლძარღვებს.
ეცადეთ, თქვენთვის შესაფერისი სამუშაო იშოვოთ
სწორად შერჩეული სამუშაო ახალგაზრდობის შენარჩუნებას უწყობს ხელს. უმუშევარი ადამიანი თავის ასაკთან შედარებით 5 წლით უფროსად გამოიყურება. სოციოლოგების აზრით, ზოგი პროფესია ახალგაზრდობის შენარჩუნებაში გვეხმარება. მათ რიცხვს მიეკუთვნება დირიჟორის, ფილოსოფოსის, მხატვრისა და მღვდლის პროფესიები.
იპოვეთ ცხოვრების მეგობარი
სიყვარული და სინაზე არაჩვეულებრივი საშუალებაა სიბერის წინააღმდეგ. კვირაში ორჯერ სექსით დაკავებული ადამიანი საკუთარ ასაკზე 14 წლით ახალგაზრდად გამოიყურება. სქესობრივი აქტის დროს ორგანიზმში გამომუშავდება ჰორმონი ენდორფინი. იგი აძლიერებს იმუნურ სისტემას.
იმოძრავეთ
დღეში მხოლოდ 8 წუთით სპორტული ვარჯიშების ჩატარება სიცოცხლეს ახანგრძლივებს. მოძრაობის პროცესში გამოთავისუფლდება ზრდის ჰორმონი, რომლის გამომუშავებაც მნიშვნელოვნად მცირდება 30 წლის შემდეგ.
დროდადრო თავს ფუფუნების უფლება მიეცით
თუ ძალიან მოგეწონათ რაიმე ნივთი, მაშინვე ეკონომიაზე ნუ დაიწყებთ ფიქრს. იყიდეთ და გაიხარეთ. ასევე, თუ რაღაც მომენტში მეგობრებთან ერთად სიგიჟე და ალკოჰოლის მიღება მოგესურვათ, თავს ნურც ამას დაუშლით. ოღონდ ამას რეგულარულ ხასიათს ნუ მისცემთ.
ბოღმას გულში ნუ დააგროვებთ
ვინც წყენას გულში აგროვებს, გაცილებით ხშირად ავადმყოფობს. ამიტომ თქვენი გულისტკივილი ახლობელ ადამიანს გაუზიარეთ. საერთაშორისო ტესტირების მონაცემებით, კიბოთი დაავადებულთა 64% ხშირად ბოღმას გულში იკლავს.
ტვინი ავარჯიშეთ
დროდადრო კროსვორდები ამოხსენით, ითამაშეთ კოლექტიური თამაშობები, რომლებიც სწრაფ აზროვნებას მოითხოვს. ტვინის ვარჯიში ანელებს გონებრივი შესაძლებლობების ასაკობრივი დეგრადაციის პროცესს. იმავდროულად, ააქტიურებთ გულის მუშაობას, სისხლის მიმოქცევის სისტემას და ნივთიერებათა ცვლის პროცესს.
×