„Mediamall.ge“ - ის რუბრიკა „ბლოგ“ - ში ეს მასალა ასევე სოციალურ ქსელ „ფეისბუქიდან“ მოხვდა და რამოდენიმე საათში რეიტინგის პირველ ადგილზე აღმოჩნდა.
ჩვენ მალევე დაგვიკავშირდა ადამიანი, რომელმაც საკუთარი თავი როგორც ნინი შერმადინის მეგობარმა გაგვაცნო (მან გვთხოვა, არ გაგვემჟღავნებინა მისი სახელი) და მომღერლის კომენტარი მოგვაწოდა. მის ტექსტს უცვლელად გთავაზობთ:
„იმ სამწუხარო კომენტარების პასუხად, რაც სულ ახლახანს გავრცელდა სოციალურ ქსელში, მინდა გითხრათ, რომ ადამიანის ფუნდამენტალურ ღირებულებებს - სამშობლოს, რელიგიასა და ეროვნებას - უდიდეს პატივს ვცემ და ჩემთვის აბსოლუტურად მიუღებელია ამ მიმართულებით რაიმე არაკორექტული ქმედების ჩადენა. მოგეხსენებათ რომ მართლმადიდებელ ქრისტიანთა შორის მოიძებნება ადამიანთა მცირერიცხოვანი დაჯგუფებები, რომლებიც მართლმადიდებლობის სახელით ჩადიან ისეთ ქმედებებს, რომელიც აბსოლუტურად მიუღებელია როგორც ჩვენი, ასევე ყველა სარწმუნოების მატარებელთათვის. ასეთი პატარა სექტანტური დაჯგუფებები არიან სხვა სარწმუნოების რიგებშიც. სწორედ ასეთ ჯგუფს გადავაწყდი და მათგან ერთერთმა ჯვარზე მომაფურთხა. ეს იმიტომ მოხდა, რომ მათ აღიზიანებთ მართლმადიდებლური სიმბოლიკა. მე ჯვარი გავწმინდე, გავისწორე, ვეამბორე და ხმამაღალი ლოცვის თანდასწრებით პირჯვარი გამოვისახე. რამაც ის ადამიანები განარისხა და ვაგონი დატოვეს. ჩემი სარწმუნოება მე მიკრძალავს ადამიანის და მითუმეტეს რომელიმე რელიგიის შეურაცხყოფას. ვინც მე მიცნობს დამეთანხმება, რომ არასოდეს არავისთვის არ მიმიყენებია შეურაცხყოფა - არც პირადად, არც წერილობით. მითუმეტეს არ დავცინებ და არ შეურაცხვყოფ იმ ერს, რომელსაც მე ძალიან დიდ პატივს ვცემ და ძალიან მიყვარს. მინდა ვთქვა, რომ მყავს ბევრი ებრაელი მეგობარი. და მაინც, პრესაში დაბეჭდილი გაუგებარი ინტერვიუს გამო, რომელმაც ასეთი ვნებათაღელვა და გაუგებრობა გამოიწვია, დიდ ბოდიშს ვუხდი იმ ადამიანებს, ვინც ჩათვალა, რომ მე მათ რაიმე ფორმით გული ვატკინე და შეურაცხყოფა მივაყენე. ასეთი სურვილი მე არ მქონია და არც არასოდეს მექნება.
პატივისცემით, ნინი შერმადინი“.
თუმცა არსებობს სხვა პოზიციაც. მასალის ავტორმა - ჟურნალ "რეიტინგის" ჟურნალისტმა ნინო მჭედლიშვილმა, აღნიშნული ინტერვიუს აუდიოჩანაწერი და სპეციალური მიმართვა გაავრცელა: "დაახლოებით ერთი თვის წინ, როცა მომღერალი ნინი შერმადინი ამერიკიდან საქართველოში ცოტა ხნით დაბრუნდა, მას სახლში ვესტუმრეთ და მონატრებულ მომღერალთან ინტერვიუ ჩავწერეთ. ინტერვიუს თემა მისი ამერიკული ცხოვრება და იქ მიღწეული მუსიკალური წარმატებები იყო. ინტერვიუს ბოლოს ნინი საკუთარი ინიციატივით ამერიკაში მცხოვრებ ებრაელებსაც შეეხო, რბილად რომ ვთქვათ, არასახარბიელო კონტექსტში მოიხსენია. შემთხვევა, რომელიც ამერიკის ერთ-ერთი შტატის მეტროში მოხდა ნინისა და ებრაელ მორწმუნეებს შორის, ნინიმ ჩემს ინტერვიუში დეტალურად გაშალა. ინტერვიუს ამ ნაწილს უარყოფითი გამოხმაურება მოჰყვა“.
წყარო