მეცნიერებმა დაამტკიცეს, რომ მამაკაცებს ბუნებით არ აქვთ მინიჭებული იმის ძალა, რომ გაერკვნენ ქალის ემოციებში; უფრო სწორად, მათ არ შეუძლიათ, გაერკვნენ იმ გრძნობებში, რომლებსაც ქალები ცდილობენ, გადმოსცენ თვალებით.
ჩატარებულ ცდებში მონაწილეობა ძლიერი სქესის 21-დან 52 წლამდე 22-მა წარმომადგენელმა მიიღო. ყველა მათგანს ჩაუტარდა მაგნიტო-რეზონანსული ტომოგრაფია, რომელიც საშუალებას იძლეოდა, გაერკვია ტვინის აქტივობა ამა თუ იმ მომენტში. მონაწილეებს აჩვენეს 36 ფოტო მამაკაცისა და ქალის თვალებით და სთხოვეს, აღეწერათ ემოციები, რომლებიც მათ ფოტოს ნახვისას გაუჩნდებოდათ.
შეგრძნების აღწერა მხოლოდ ერთი სიტყვით იყო შესაძლებელი, მაგალითად: შიში, ვნება, სიყვარული.
დავაკონკრეტებთ, რომ წარმოდგენილ ემოციათა სპექტრში შედიოდა პოზიტიური, ნეგატიური და ნეიტრალური ემოციები.
პირველი, რაც მეცნიერებმა ცდის პერიოდში შენიშნეს, იყო, რომ მამაკაცი ყველაზე მეტ დროს თვალების ამოკითხვას უთმობდა. მეორე – მამაკაცის ტვინის აქტივობა მაღალი იყო, რაოდენ უცნაურადაც უნდა მოგეჩვენოთ, თავისივე სქესის წარმომადგენლის თვალების დანახვისას.
მეცნიერებმა კვლევის შედეგად დაასკვნეს: მამაკაცები იმაზე ბევრად ნაკლებ თანაგრძნობას გამოხატავენ ქალების მიმართ, ვიდრე საკუთარი სქესის წარმომადგენლების მიმართ. მეცნიერების მიერ გამოთქმული კიდევ ერთი ვარაუდი ასეთია: ქალების ემოციური სიგნალების მიმართ მამაკაცის უყურადღებობა კაცობრიობის ევოლუციით არის გამოწვეული, თუმცა ეს მხოლოდ თეზისია და ამის მტკიცებულება ჯერჯერობით არ არსებობს.
სხვათა შორის, 2008 წელს ინდიანას უნივერსიტეტის მეცნიერებმა დაადგინეს, რომ ხშირად სუსტი სქესისგან წამოსულ მეგობრულ სიგნალებსაც ძლიერი სქესი სექსუალურ გამოწვევად აღიქვამს.
ერთის თქმა აბსოლუტური სიზუსტით შეიძლება: საყვარელ მამაკაცს დიდი ყურადღებით უნდა მოექცეთ და საუბარში მეტად გულახდილები და გახსნილები იყოთ, გამორიცხოთ ყველა მინიშნება, რადგან გამოხედვით, მიკიბულ-მოკიბულობით, ცრემლით – ისინი ვერაფერს გაიგებენ.
P.S. ფილმის - "რა სურთ ქალებს" გამოსვლის შემდეგ მელ გიბსონს ჰკითხეს, ბოლოს და ბოლოს გაიგეთ, რა სურთ ქალებს? რაზეც მსახიობმა უპასუხა: ეს სადღაც შამპანურსა და კომპლიმენტს შორის მდებარეობს.
წყარო
×