ქართული ესტრადის ერთ–ერთი გლამური მომღერალი მარკუს მეტრეველი

მარკუს მეტრეველი დაიბადა თბილისში. 10 წლამდე იზრდებოდა თბილისის ერთ-ერთ კოლორიტულ უბანში, 90-იან წლებში მარკუსის ოჯახმა დატოვა საქართველო და საცხოვრებლად გადავიდნენ საბერძნეთში. ჯერ კიდევ სწავლის პერიოდში მარკომ დიდ წარმატებას მიაღწია. იგი გიმნაზიის დამთავრების შემდეგ დაბრუნდა კვლავ საქართველოში და ჩაირიცხა ი. ჯავახიშვილის სახელობის უნი-ში ბერძნულ ფილოლოგიურ ფაკულტეტზე, მაგრამ 1 წლის შემდეგ მარკო მიხვდა რომ ეს პროფესია მას არ აკმაყოფილებდა და გადავიდა სამხატვრო აკადემიის ფაკულტეტზე.



პარალელურად მოღვაწეობას იწყებს შოუ-ბიზნესში მომღერლის ამპლუაში. მან გადაიგო პირველი კლიპი ''თავისუფლება''.2001 წელს მას ქონდა მიწვევა მაროკოში სადაც მისმა გამოსვლამ სრული ანშლაგით ჩაიარა და მარკოს ოჯახის გადაწყვეტილებით ისინი კვლავ საბერძნეთში ბრუნდებიან. მან ითანამშრომლა საბერძნეთის წამყვან დიზაინერებთან, პროდიუსერებთან და მომღერლებთან. 2009 წელს მარკომ გადაწყვიტა კვლავ თავის სამშობლოში დაბრუნება და ის მიიწვიეს 10-ე მუსიკალური ცერემონიის დაჯილდოებაზე ''მეგა-2009''. მარკო და მისი პროდიუსერი ბევრ სიახლეს გვპირდებიან.



მომღერალი მარკუს მეტრეველი სკანდალურ იმიჯს იქმნის და, როგორც აღმოჩნდა, ქალებიც ასეთი მოსწონს – გამომწვევი, ვულგარულიც კი. როცა უყვარდება, ცდილობს, საყვარელი ქალი შეცვალოს, "შეფუთოს" ისე, როგორც თვითონ მოსწონს. როგორ ადამიანს ისურვებდა გვერდით, ამაზე მარკუსი თავად გვიამბობს.

– მარკუს, ჟურნალისტები მუდმივად გისვამენ კითხვას, გყავთ თუ არა შეყვარებული, ვინ არის და ა.შ. იქნებ თქვათ ბოლოს და ბოლოს შეყვარებული თუ ხართ ან ვინ არის თქვენი გულისსწორი?

– რა თქმა უნდა, შეყვარებული ვარ. სიყვარულის გარეშე ცხოვრება და შემოქმედებითი ზრდა არ შემიძლია. ამიტომ ყოველთვის შეყვარებული ვარ. ჩემი შეყვარებული ქართველია. მრავალი წლის განმავლობაში ვიცხოვრე ევროპაში და მინდა, აღვნიშნო, როგორც საქართველოში მიყვარდება, ისე ვერც ერთ ქვეყანაში შევძელი, შემყვარებოდა.



– რატომ, რა არის ქართველი ქალის საიდუმლო?

– ქართველი ქალები ძალიან ერთგულები არიან, ამას ძალიან ვაფასებ.ოჯახი უყვართ და, რაც მთავარია, მათ აქვთ გაგება.

– გაგება რისი?

– არ ვგულისხმობ მენტალიტეტს, ვგულისხმობ ერთი და იმავე ეროვნების ადამიანების გაგებას. როგორც ჩვენ ვუგებთ ერთმანეთს, ისე სხვა ქვეყნის წარმომადგენლებს ვერ გავუგებთ.

– სხვა ეროვნების ქალთან ხანგრძლივი ურთიერთობა გქონიათ?

– საბერძნეთში ძალიან ცნობილ მომღერალთან მქონდა ექვსთვიანი რომანი, მაგრამ ვერ გავუგე, ვერ შევიყვარე, ჩემთან ახლოს ვერ მოვიდა. მასთან უბრალოდ კარგი სექსი მქონდა.

– უარყოფითი მხარეებს თუ ხედავთ ქართველ ქალში?

– ქართველს ქალს კომპლექსები აქვს. ამ ბოლო ხანებში უფრო განვითარდნენ. კომპლექსებს თუ დაძლევენ, კარგი იქნება. ვთვლი, რომ ქალს და მამაკაცს ქორწინებამდე სექსი უნდა ჰქონდეთ. ჩემს აზრს არავის ვახვევ თავს, მაგრამ მე ამას სრულფასოვან ურთიერთობებს ვეძახი. ქართველ ქალებს მატერიალური მდგომარეობა არ უწყობთ ხელს იმაში, რომ მუდმივად მოწესრიგებულები იყვნენ. ისინი ძალიან ლამაზები არიან, მაგრამ ეს არ კმარა. ადამიანს სჭირდება მოვლა, შოპინგი, პარფიუმერია და თავის მოვლის სხვა საშუალებები.



– პირველ რიგში, ქალმა რას უნდა მიაქციოს ყურადღება?

– სახის მოვლას დიდი თანხა არ სჭირდება...

– ამაში ვერ დაგეთანხმებით.

– ყოველ შემთხვევაში, მე ასე ვფიქრობ. სახლის პირობებშიც შეიძლება თავს მოუაროს. მაგალითად, არ უნდა ჰქონდეს ულვაშები, როგორიც მაქვს მე. წარბები უნდა ჰქონდეს დახვეწილი, მოვლილი. თმას ყოველდღე სალონში თუ ვერ დაიყენებს, მაინც მოწესრიგებული უნდა ჰქონდეს. გარდა ამისა, ადამიანი უნდა უვლიდეს ფრჩხილებს და ა.შ.

– მაკიაჟიანი ქალები მოგწონთ?

– კი, ნამდვილად. ძალიან მომწონს, როცა ქალს მაკიაჟი აქვს. ჩემი ყოფილი ცოლი, ყოველ დილით, როცა დგებოდა საწოლიდან, მაკიაჟს იკეთებდა, რადგან მიყვარს, ქალი მოწესრიგებული რომ არის. ეს უფრო მიმზიდველია ჩემთვის.

– ეს თქვენი მოთხოვნა იყო – დილიდანვე მაკიაჟი?

– უბრალოდ ეს წესი დროთა განმავლობაში ჩამოგვიყალიბდა. ჰქონდა იმის საშუალება, რომ ყოველდღიურად ფორმაში ყოფილიყო. მისთვის სხვა საზრუნავი მართლა არ არსებობდა. რაც შეეხება უბრალოებას, ესეც მიყვარს, მაგრამ არა – ყოველდღიურ რეჟიმში.



– გარეგნობაში პლასტიკური ქირურგიის ჩარევას მიესალმებით?

– რა თქმა უნდა, მივესალმები. ჩემს მეუღლეს ისევ ვახსენებ. როცა ოჯახში ჩამოვარდა საუბარი, თუ რა გაეკეთებინა და გარეგნობაში რა შეეცვალა, ვურჩიე, რომ ცხვირი გაეკეთებინა. ოდნავ საჭიროებდა მისი ცხვირი შეცვლას და გაიკეთა კიდეც. ეს არის ადამიანისთვის წინსვლა და განვითარება.

– თქვენს ყოფილ ცოლს თბილად იხსენიებთ. არადა ერთ–ერთ შოუში საშინელ ბრალდებებს გიყენებდათ. როგორი ურთიერთობა გაქვთ ახლა ერთმანეთთან?

– ყოფილ ცოლთან უკვე მეგობრული დამოკიდებულება მაქვს. ამას წინათ შევხვდით და ვილაპარაკეთ სამომავლო გეგმებზე, შვილებზე. ამით ძალიან ბედნიერი ვარ.

– ცოლი მთლიანად აკმაყოფილებდა თქვენს კრიტერიუმებს?

– სიმართლე გითხრათ – არა. მე ის შემიყვარდა, როგორც ადამიანი. მთავარია, ადამიანი შემიყვარდეს და მერე უკვე ვცდილობ, ის ადამიანი დავხვეწო, ჩამოვაყალიბო, შევცვალო ისე, როგორც მე მომწონს.

– კონკრეტულად როგორი ქალები მოგწონთ?

– მიყვარს მაღალი, ვულგარული, გამომწვევი, სექსუალური ქალები. და მიყვარს ძალიან განათლებული ქალბატონები.

– როცა ქალს ხვდებით პირველად, რა იქცევს თქვენს ყურადღებას?

– სიარულის მანერა და მისი სექსუალურობა. თუკი ეს ყველაფერი ჩაჯდა ჩემს გემოვნებაში, მერე უკვე ვაკვირდები სხვა დეტალებს – თვალებს, მკერდს, ფეხებს... ამას წინათ ბარში გვერდით ქალი დამიჯდა, დაახლოებით 50 წლის იქნებოდა. ისეთი დახვეწილი და ლამაზი იყო, თვალი ვერ მოვწყვიტე. იმ ქალთან სიამოვნებით მექნებოდა ურთიერთობა.

– ქალი ძალიან ლამაზი უნდა იყოს, რომ მოგეწონოთ?

– აუცილებლად. ვიზუალურად ლამაზი თუ არ არის, ურთიერთობა გამიჭირდება. ქალი როგორც გარეგნულად, ისე შინაგანად, ლამაზი უნდა იყოს, მაგრამ, პირველ რიგში, გარეგნობით ვაფასებ და მერე ვიწყებ მისი შინაგანი ხასიათისა თუ თვისებების გაცნობას.

– რა იგულისხმება შინაგან სილამაზეში?

– განათლებული და ძლიერი უნდა იყოს. იუმორის გრძნობა უნდა გააჩნდეს. დახვეწილი, ქალური და ნაზიც უნდა იყოს, ასევე – მეგობრული და დამთმობი. ერთგული რომ უნდა იყოს, ეს თავიდანვე აღვნიშნე.

– დამთმობი ქალი რას ნიშნავს?

– არ ვგულისხმობ იმას, რომ ქალი ჩემი მარიონეტი უნდა გახდეს. თუკი ხვდება, რომ მამაკაცმა რაღაც საკითხში მასზე მეტი იცის, რაღაც კომპრომისებზე უნდა წავიდეს.

– გვერდით თქვენზე განათლებულ ქალს გაუძლებთ?

– აუცილებლად. ეს ჩემთვის კარგი იქნება, რომ გავიზარდო. ამისთვის მზად ვარ. ჩემზე განათლებული ადამიანისგან დიდი სიამოვნებით ავიღებ ცხოვრებისეულ გამოცდილებას და ბევრ სხვა რამეს. ყოველდღიურად თითოეული თქვენგანისგან რაღაცას ვსწავლობ. ასე რომ, იყოს ქალი ჩემზე განათლებული, ეს მეც ბევრ რამეში წამადგება.

– ქალის რა თვისებამ შეიძლება გამოიწვიოს თქვენი ანტიპათია?

– ვერ ვიტან უკულტურობას, უზრდელობას. ქალს ბილწსიტყვაობა არ უხდება. ასეთს ქალად ვეღარც აღვიქვამ. ასევე არ მიყვარს, როცა ქალი დაუმთავრებლად, გაუჩერებლად ლაპარაკობს და ენას არ აჩერებს.



– ქალს სამზარეულო უფრო ამშვენებს თუ საქმიანი გარემო?

– არ მინდა, რომ ჩემი ცოლი 24 საათი სამზარეულოში იყოს დაკავებული. თავისი საქმე უნდა ჰქონდეს, მასთან ერთად უნდა მოვიარო მთელი მსოფლიო, ვიყოთ კარგი მეგობრები, ორივეს გვქონდეს ჩვენი ცხოვრება და ჩვენი საქმე. ერთმანეთზე ჩამოკიდებული არ უნდა ვიყოთ. ამიტომ ქალს სამსახური აუცილებლად უნდა ჰქონდეს. მე და ჩემი მეუღლე ერთმანეთს უნდა ვეყრდნობოდეთ.

– როგორ უნდა ეცვას ქალს?

– ძალიან ვულგარულად ჩაცმული ქალები მომწონს.

– ერთადერთი კაცი ხართ, ვისგანაც ეს მოვისმინე. მაინც რას გულისხმობთ ვულგარულ ჩაცმულობაში?

– ჩემთვის სწორედ ის არის მიმზიდველი, როცა ქალს გამომწვევად აცვია. მიყვარს ტანზე მომჯდარი ჯინსები, ელასტიკი, კორსეტები, ღრმა დეკოლტე, ძალიან მოკლე კაბა. ჩემთვის დამალული არაფერი უნდა იყოს. არ უნდა ვფიქრობდე, მაინცდამაინც საწოლამდე მივიყვანო, რომ მისი სხეული შევიგრძნო.

– ვულგარულად ჩაცმული ქალი რომ ერთგულებასთან არ ასოცირდება, ამაზე გიფიქრიათ? ყოველ შემთხვევაში, ქართველი კაცები ასე ფიქრობენ.

– ეს სიმართლეა, მაგრამ, იცით, რა არის? მე მყავდა ცოლი, რომელსაც ვაცმევდი გამომწვევად, მაგრამ მას ვენდობოდი და ვიცოდი, ისეთს არაფერს გააკეთებდა, რომ მწყენოდა და გული მტკენოდა. ასეთი ნდობის საფუძველზე იწყება ქალის გაშიშვლება, სიყვარული.



– შიშველი ქალი ჯერ ვნებას აღძრავს თქვენში და არა – სიყვარულს, არა?

– არა. გაშიშვლებული შემიყვარდება, მაგრამ შემდეგ უკვე "შევფუთავ" ჩემებურად. პროფესიით დიზაინერი ვარ და გარკვეულ წილს საყვარელი ქალის ჩაცმულობაში მე შევიტან.

– როგორ ქალს აყოლებთ ქუჩაში თვალს?

– მაღლებს და ლამაზებს. თუკი რამე არ მომეწონება, ჩემს წარმოსახვაში დავხვეწ და უფრო გავალამაზებ ხოლმე.

– რა ამშვენებს ქალს?

– ქალს ძლიერი კაცი, ფინანსები და სიყვარული ამშვენებს.



ჟურნალისტი : ანა ნოდია

წყარო: mary.ge