აქ მდინარე ზამბეზი 120 მეტრი სიმაღლის ბექობიდან ვარდება და წყლის მტვრის გიგანტურ სვეტებს წარმოქმნის. ამ საოცრების სიგანე თითქმის ორი კილომეტრია. ადგილობრივი მოსახლეობა ვიქტორიას „მო-ზი-ოა-ტუნიას“ („კვამლი, რომელიც ხმაურობს“) და „სეონგოს“ („ცისარტყელა“) უწოდებს.
ჩანჩქერის სილამაზით დატკბობა ხიდიდანაც შეიძლება, რომელიც მის მახლობლად მდებარეობს, მაგრამ ყველა როდი კმაყოფილდება პასიური დამკვირვებლის როლით. მათ შორის სულ უფრო ხშირად გვხვდებიან თავზეხელაღებულები, რომელთაც ერთი სული აქვთ, სიკვდილს გაეთამაშონ და ეგრეთ წოდებულ „ეშმაკის ყურეში“ გაგრილდნენ, რომელიც ჩანჩქერ ვიქტორიის კიდეში მდებარეობს.
წარმოიდგინეთ, რომ თქვენ წყალში ჭყუმპალაობთ და სულ ერთი ნაბიჯი გაშორებთ 120-მეტრიანი უფსკრულისგან, რომელშიც ყოველ წუთს გამაყრუებელი გრუხუნით ეშვება 550 ათასი კუბური მეტრი წყალი. ერთი არასწორი მოძრაობა და...
ლონდონის გაზეთმა „ტაიმსმა“ ექსტრემალური ტურიზმისათვის ყველაზე საშიში ადგილების რეიტინგის შედგენისას „ეშმაკის ყურეს“ პირველი ადგილი მიაკუთვნა, თუმცა ადგილობრივ გიდებს ეს სასაცილოდ არ ჰყოფნით. მათი აზრით, ამ წყალსატევში ბანაობა საკუთარ სხალში აბაზანის მიღებაზე საშიში არ არის, თუკი, რა თქმა უნდა, ერთი საიდუმლო იცი.
საქმე ის გახლავთ, რომ გაზაფხულზე მდინარე ზამბეზი, რომელიც ჩანჩქერს კვებავს, ადიდებულია და ამ დროს „ეშმაკის ყურესთან“ მიახლოებაც კი არ შეიძლება.
ასეთ შემთხვევაში სიკვდილი გარანტირებულია, ხოლო სექტემბრიდან დეკემბრამდე, როცა წყლის დონე ეცემა, წყალსატევი მძინარე ყრმასავით მშვიდდება. წლის ამ პერიოდში აქ ცურვაც შეიძლება, თუკი, ცხადია, ნერვები წესრიგში გაქვთ.
წყარო: etanews.ge