მოდა მუდმივად ბრუნავს და ხშირად ძნელია მისდიო უკანასკნელ მოდურ ტენდენციებს. თუმცა ყველა ადამიანს საკუთარი სტილი გააჩნია, რომელიც მოდისგან დამოუკიდებლად, ხასიათის, ცხოვრების სტილის და რა თქმა უნდა გემოვნების მიხედვით იცვლება. დღეს დღეობით იმისთვის, რომ კარგად გამოიყრებოდე სულაც არ არის საჭირო იცმევდე უკანასკნელ მოდაზე, ამისთვის საკმარისია შენს გარდერობს რამდენიმე მოდური აქსესუარი შემატო, მაგალითად ჩანთა, ფეხსაცმელი, ან რაიმე სამკაული, მაგრამ მოდური აქსესუარი შენს საკუთარ სტილს აუცილებლად უნდა ეთანხმებოდეს. ამ ყველაფერთან ერთად არსებობს რაღაც წესები, რომელთა დაცვის შემთხვევაშიც თქვენ აუცილებლად გემოვნებით ჩაცმული იქნებით იმის მიუხედავად რამდენი ჟურნალი გაქვთ წაკითხული უკანასკნელი მოდის თაობაზე და მაშინაც კი თუ თქვენს საფულეში საკმარისი თანხა არ არის.
1. ფერი და ნახატი – ჩვენ ყველას გვახსოვს, რომ არც ისე დიდი ხნის წინ ერთნაირი ფერის შენარჩუნება ტანსაცმელს, ფეხსაცმელსა და აქსესუარებს შორის კარგ ტონად ითვლებოდა და ფერების თამამი შეხამება განსხვავებულ გემოვნებაზე მიუთითებდა. დღეს ეს უკვე ისტორიას ჩაბარდა, ახლა უფრო ხშირად გამოიყენება მკვეთრი ფერის ტანსაცმელზე სადა აქსესუარები და პირიქით.
ნუ ეცდებით გააკვირვოთ თქვენი გარშემომყოფები ტანსაცმელში ფერთა სიმრავლით, თუ რა თქმა უნდა ეს ტანსაცმელი საკარნავალო არაა. ცნობილი დიზაინერები გვირჩევენ არ გამოვიყენოთ სამზე მეტი ფერი ჩაცმულობისას. თუ ამ რჩევას არ გაითვალისწინებთ თქვენ შეიძლება მიიქციოთ გამვლელთა ყურადღება ქუჩაში, მაგრამ არა იმიტომ, რომ თქვენი ტანსაცმელი შეუდარებელია. სულ უფრო პოპულარული ხდება ორიგინალური, აბსტრაქტული ორნამენტების გამოყენება სამოსში, მაგრამ უნდა შეეცადოთ თავი აარიდოთ მრავალფეროვან ნახატებს. მაგალითისთვის, თუ თქვენი ჯინსი მოდური ნახატითაა დამშვენებული დანარჩენი ტნსაცმელი აუცილებლად სადა უნდა იყოს.
2. ზომა – ალბათ ხშირად შეგხვედრიათ ადამიანები, რომლებიც ცდილობენ საკუთარი სხეულის ნაკლი დიდი ზომის ტანსაცმლით დაფარონ ან პირიქით ბევრად პატარა ზომის სამოსით ცდილობენ ხაზი გაუსვან კარგ აღნაგობას. სამწუხაროდ უმეტეს შემთხვევაში ასეთი ტანსაცმელი კი არ მალავს, არამედ აჩენს თქვენს ნაკლს. ჩვენი რჩევაა ატაროთ თქვენი ზომის ტანსაცმელი, თუნდაც ის ბევრად დიდი ან პატარა ზომის იყოს ვიდრე ცოტა ხნის წინ ხმარობდით.
3. ქცევის წესები და კანონები – ალბათ ხშირად შეგიმჩნევიათ ქუჩაში მოსიარულე გოგონებზე სამოსთან შეუხამებელი, მკვეთრი ფერის ბიუსჰალტერი. ჩვენ გირჩევთ, რომ არ ჩაიცვათ ქუჩაში ყველაფერი, რაც ლამაზად ჩანს პოდიუმზე. დიზაინერები ნამდვილად გაგიჟდებოდნენ რომ დაენახათ გარეთ მოსიარულე გოგონა გამჭვირვალე ყვითელი სარაფნითა და წითელი ბიუსჰალტერით, პოდიუმზე კი ეს დასაშვებია. ყველაფერი რაც აცვიათ და უხდებთ მოდელებს არ შეიძლება ჩაიცვას და მოიხდინოს ნებისმიერმა ადამიანმა.
4. ხარისხი – მოდური ტანსაცმლის შეძენისას არ დაგავიწყდეთ გაარკვიოთ თუ რა მასალისგანაა სამოსი დამზადებული, სწორედ მატერიის მიხედვით შიძლება მისი ხარისხის დადგენა. გახსოვდეთ რომ სჯობს ერთი სამოსი გქონდეთ და ხარისხიანი, ვიდრე უამრავი და უხარისხო.
მოდა და ჩაცმულობა უკვე ათეულობით წელია ძალიან მნიშვნელოვანია ადამიანებისთვის. თუკი ტანსაცმლის შეძენისას არ ხართ დარწმუნებული მის მოდურობასა და ხარის ში, რჩევისთვის აუცილებლად მიმართეთ ადამიანს, რომლის გემოვნებასაც თქვენ აბსოლიტურად ეთანხმებით და ენდობით. სამოსის შეძენისას არჩევანის გაკეთებაში თქვენი სტილისტიც შეიძლება დაგეხმაროთ, რომელსაც შეუძლია შეგირჩიოთ სამოსი თქვენი სახის მიხედვით თუმცა არ დაგავიწყდეთ, რომ თქვენ ყველაზე კარგად იცით თქვენი სხეულის ნაკლი და ღირსება. დღეს ნებისმიერი მოდური, თანამედროვე გოგონას მიზანია – გამოიყურებოდეს მომხიბვლელად ნებისმიერ სიტუაციაში!
წყარო: presa.ge
როგორ შევინარჩუნოთ მომხიბვლელობა მოდისგან დამოუკიდებლად
⏱️ 1 წთ.
👁️ 2 812
100%