გახდომას აპირებთ? კარაქიან პურზე უარს ნუ იტყვით



მიუხედავად იმისა, რომ მხოლოდ წიწიბურასა და კიტრს მიირთმევთ და საყვარელ საკვებზე უარს ამბობთ, წონაში არა და არ იკლებთ? აუცილებლად გაითვალისწინეთ დიეტოლოგთა შემდეგი რჩევები, რომლებიც ხელს შეუწყობს ნივთიერებათა ცვლის პროცესს.

მიირთვით კარაქიანი პური

მცდარი მოსაზრებაა დამკვიდრებული, თითქოს დიეტაზე მყოფთათვის საუკეთესო საუზმე ერთი ნაჭერი ყველი და უშაქრო ყავაა. უფრო მეტიც, ზოგი საერთოდ უარს ამბობს საუზმეზე. არადა, მთელ მსოფლიოში დიეტოლოგებმა კარგა ხანია საპირისპირო რამ დაადასტურეს: რაც უფრო ნოყიერია საუზმე, მთელი დღის განმავლობაში მით უფრო უკეთ წვავს ორგანიზმი კალორიებს.

რა თქმა უნდა, საუზმე ჯანსაღი საკვებისგან უნდა შედგებოდეს, ცილებსა და შაქარსაც უნდა შეიცავდეს, რომ ტვინს სამუშაო ჰქონდეს. იდეალური საუზმეა - ერთი თეფში წყალში მოხარშული შვრიის ფაფა, შეგიძლიათ ერთი ჩაის კოვზი თაფლი დაუმატოთ; თხლად კარაქწასმული ერთი ნაჭერი დაცეხვილი პური და ერთი ნაჭერი ყველი ან მოხარშული მჭლე ხორცი.

სასმელებიდან - ჩაი ან ყავა. ამგვარი საუზმის შემდეგ სადილზე რაიმე აკრძალულისკენ თვალი არ გაგექცევათ. თუ მაინც მკაცრ დიეტას ამჯობინებთ, შეგიძლიათ ფაფა და ყველი გამორიცხოთ. აი, კარაქიან პურზე უარის თქმა კი არ შეიძლება.

გემრიელი არ ნიშნავს მავნეს

დიეტებში ხშირად აკრძალულია მაკარონი. სულ ტყუილად! წონისთვის სახიფათოა არა თვით მაკარონი, არამედ ის სოუსები, რომლებსაც მაკარონთან ერთად მიირთმევთ ხოლმე. მიირთვით მაკარონი კარაქისა და განსაკუთრებით, მზა სოუსების გარეშე. შეგიძლიათ, ბეკონი კრევეტებით ან სხვა ზღვის პროდუქტებით შეცვალოთ; ყველს კი ვერაფრით შეცვლით, რადგან ის ბევრ ცხიმსა და მარილს შეიცავს.

მოამზადეთ სწორად

კერძის მომზადების პროცესზე ბევრი რამ არის დამოკიდებული. მაგალითად, მკაცრი დიეტის დროს შეგიძლიათ საჭმელი ორთქლზე მოამზადოთ. დიეტის გარეშეც, უმჯობესია, მოერიდოთ შემწვარ-მოხრაკულს. ჯანსაღი და სწორად მომზადებული საკვები არა მარტო თქვენს წონაზე, თქვენს ჯანმრთელობაზეც და შესაბამისად, სილამაზეზეც დადებითად აისახება.

დესერტზე უარს ნუ იტყვით

დესერტი? რა თქმა უნდა, შეიძლება, ოღონდ აქაც ჯანსაღი პროდუქტი შეარჩიეთ. მაგალითად, შოკოლადი, ნამცხვარი და ნაყინი შეგიძლიათ, ხილით, სუფლეთი და სორბეტებით შეცვალოთ. შოკოლადის ალტერნატივადაა მიჩნეული, ასევე, მარმელადი და ზეფირი, ოღონდ შოკოლადის გარეშე. საუკეთესო დესერტი კი ახალი ხილი და კენკროვანებია.

შეიყვარეთ ბალახები

სურნელოვან ბალახებსა და სუნელებს იოლად შეუძლია მარილის შეცვლა: ისინი კერძს განსაკუთრებულ სურნელსა და გემოს სძენს. გარდა ამისა, ზოგიერთი საკაზმი, მაგალითად, ნიორი, ხახვი, ოხრახუში, მწვანე წიწაკა და კოჭა ხელს უწყობს ნივთიერებათა ცვლის პროცესს და ორგანიზმს ცხიმების დაწვაში ეხმარება.

მწვანე ჩაი - მწვანე ჩაის სასარგებლო თვისებები ფართოდაა ცნობილი. მიუხედავად ამისა, დიეტოლოგები არ გირჩევენ დღეში სამ ფინჯანზე მეტის დალევას. მწვანე ჩაის შეცვლა სამკურნალო ბალახების - პიტნის, გვირილის ან ბარამბოს ნაყენით შეიძლება. მათი სმა შეუზღუდავად შეგიძლიათ.
































ტექსტის სანახავად გაიარეთ რეგისტრაცია.