პალმის ზეთი - "დამალული" საფრთხე



პალმის ზეთი და მისი გავლენა ორგანიზმზე ის თემაა, რომელიც უამრავ ადამიანს აღელვებს. რისგან შედგება იგი და რატომ საუბრობენ მასზე ამდენს?შეიძლება თუ არა მისი ყოველდღიურად გამოყენება საკვებად და რა შესაძლო ალტერნატივა არსებობს?

პალმის ზეთი მცენარეული ზეთია, რომელიც ზოგიერთი სახეობის პალმის ნაყოფის ცხელი დაწურვის მეთოდით მიიღება. ეს პალმები ძირითადად სამხრეთ-აღმოსავლეთ აზიასა და ცენტრალურ აფრიკაში იზრდება. ამ ზეთის წარმოება ძალიან მომგებიანია, დაბალი ფასის გამო, დღესდღეობით, მას ყველაზე დიდი რაოდენობით მოიხმარენ მსოფლიოში.

პალმის ზეთი - "დამალული" საფრთხე


პალმის ზეთს მოიხმარენ საკვებ ინდუსტრიაში, კოსმეტიკაში, აგრეთვე ბიოსაწვავში. ის შედის იმ უამრავ პროდუქტში, რომელსაც ყოველდღიურად მოვიხმართ: ჩიპსებში, კრუტონებში, სწრაფი მომზადების სუპებში, ცნობილ ნუთელაში და სხვა შოკოლადის პასტებში, ბისკვიტებში, ბავშვის რძეში, კონსერვირებულ პროდუქტში, ბულიონის კუბებში, ნაყინებში, შოკოლადის ბატონებში, პამიდვრის საწებლებში, მიუსლში, მარგარინში, მაიონეზში, ხშირად ქარხნულ პურშიც. ერთი სიტყვით, ყველგან. ეს სია გრძელი და ძალიან შთამბეჭდავია!

პალმის ზეთი - "დამალული" საფრთხე


მთავარი მიზეზი, რის გამოც პალმის ზეთი ასე მასიურად გამოიყენება, დაბალი ფასის გარდა მისი ფიზიკური და ორგანული მახასიათებლებია, რომლებიც საშუალებას იძლევა პროდუქტი მომხმარებლის მოთხოვნებს და მოლოდინს პასუხობდეს. მას ნეიტრალური გემო აქვს, კარგად ინახება, კარგად იტანს თერმულ დამუშავებას და საკვებს სირბილესა და სიფაფუკეს ანიჭებს. სწორედ მისი დამსახურებით შოკოლადის ბატონი არ დნება მაცივრის გარეშე და ნაყიდი ნამცხვრებიც მადისაღმძვრელად ხრაშუნობენ.

არარაფინირებული , ცივად გამოხდილი პალმის ზეთი მდიდარია A და E ვიტამინებით, ბეტაკაროტინით, მაგრამ გაცხელებისა და რაფინირებისთანავე ყველა სასარგებლო თვისება ქრება. გვრჩება მხოლოდ ნაჯერი ცხიმებით მდიდარი პროდუქტი, რომლის ხანგრძლივი მიღება ჯანმრთელობისთვის სასარგებლო არ არის.

ნაჯერ ცხიმებს მეორენაირად ცუდ ცხიმებსაც უწოდებენ. მათი ხშირი და ხანგრძლივი მიღება გულსისხლძარღვთა პრობლემებს და მავნე ქოლესტერინის მომატებას იწვევს. ორგანიზმს უჭირს მისი გადამუშავება.

რადგან პალმის ზეთი უამრავ, ყოველდღიურად მოხმარებულ პროდუქტში შედის, ჩვენ გაუაზრებლად ვიღებთ ამ მავნე ცხიმის გადაჭარბებულ რაოდენობას, ისე რომ ყურადღებასაც კი არ ვაქცევთ. უფრო მეტიც, ძალიან ხშირად, ეტიკეტზე არ არის დაზუსტებული ამ ცხიმის სახელწოდება და მხოლოდ "მცენარეული ცხიმი" აწერია. თუ მწარმოებელი არ აზუსტებს კონკრეტულად რომელ მცენარეულ ცხიმს შეიცავს პროდუქტი, დიდი შანსია, რომ ეს სწორედ პალმის ზეთი იყოს!

ევროპის ქვეყნები საკმაოდ დიდ მნიშვნელობას ანიჭებენ ჯანსაღი ცხოვრებისა და კვების წესს, ამიტომ სულ უფრო მეტი მწარმოებელი უბრუნდება სასარგებლო ცხიმების გამოყენებას. ევროპულ პროდუქციაზე ხშირად შეხვდებით წარწერას "პალმის ზეთის გარეშე".

პალმის ზეთის მასიურმა გამოყენებამ გარემოსაც მოუტანა დიდი ზიანი. ათასობით ჰექტარი ტროპიკული ტყე გაიჩეხა და მის ნაცვლად ზეთისთვის გამოსადეგი პალმის სახეობები გაშენდა. დაბინძურდა გარემო, გადაშენების პირასაა უამრავი სახეობის ფრინველი, ცხოველი. ეს ფოტო ბორნეოს მაგალითს გვიჩვენებს:

პალმის ზეთი - "დამალული" საფრთხე


ახლა, როცა გვაქვს ინფორმაცია, გამოსავალი თავად უნდა ვიპოვოთ. ყურადღებით უნდა დავაკვირდეთ ეტიკეტს და უარი ვთქვათ პალმის ცხიმის შემცველ პროდუქტებზე. მას ხომ ზიანის გარდა სხვა არაფერი მოაქვს ჩვენი ჯანმრთელობისთვის. საგულისხმოა, რომ პალმის ზეთი ხშირად სხვადასხვა სახელით "იმალება" ეტიკეტებში. მათგან ყველაზე გავრცელებულია:
მცენარეული ცხიმი, მცენარეული ზეთი (ნუ ენდობით სიტყვა "მცენარეულს"), პალმის ცხიმი, ჰიდროგენიზებული მცენარეული ცხიმი, პალმის მჟავა და ა.შ.

წყარო
































ტექსტის სანახავად გაიარეთ რეგისტრაცია.