ყველა ქალი თავისებურად მშვენიერია - ეს ერთი; ყველა ქალი თავისებურად საინტერესოა – ესეც ორი; ბოლოს და ბოლოს, ყველა ქალი თავისებურად უნიკალურია! ყველაზე ნაკლებად გონიერმა მამაკაცმაც კი იცის, რომ ეს ჭეშმარიტებაა. სამწუხარო მხოლოდ ისაა, რომ “სუსტი” სქესის წარმომადგენლებს ეს თავად არ სჯერათ.
დიახ, დიახ, არ შეუძლიათ, ვერაფრით დარწმუნდნენ, იმიტომაც იტანჯებიან ათასგვარი დიეტით და სპორტკლუბში ტრენაჟორებთან “ბრძოლით”. სულ მოთქვამენ, ხან ზედმეტი 5 კილოგრამის გამო, ხანაც საჭირო და არარსებული 5 კილოგრამისთვის. ზოგი საყვარელ ჯინსებში ჩასატევად ირჯება, ზოგიც იმისთვის, რომ ეს ჯინსები როგორმე არ ჩასძვრეს. ბრძოლა ნამდვილია, ნატურალური – სამკვდრო-სასიცოცხლო! და რისთვის? პოტენციურ ან შემდგარ მეორე ნახევარს რომ მოეწონოს. არა, ეს ბუნებრივი ამბავია, მაგრამ იმთავითვე - უაზროც, იმიტომ რომ ...
კაცების კლონირება ჯერ არავის გამოსვლია, ეს კი იმას ნიშნავს, რომ ისინი, როგორი უცნაურიც არ უნდა იყოს, საშინლად უნიკალურები, ათასნაირები არიან და სულ ირჩევენ. საკუთარი უნიკალურობის მიხედვით, თითოეული იმას ირჩევს, რაც მის სულს უხარია და მის გულს გამალებით ცემას აიძულებს (ჰო, მათაც აქვთ გული). ზემოთქმული კი, ძვირფასო ქალბატონებო და საქალბატონეებო, მოწმობს იმას, რომ თქვენს თავზე თმის ფერის, ფეხსაცმელში თქვენი ფეხის ზომის და კიდევ ბევრი რამის მიუხედავად – მშვენიერი და განუმეორებელი ხართ და ვიღაცას, უეჭველად, ჭკუას აკარგვინებთ!
უფრო მეტიც, დიდიხანია, ცნობილია, რომ კაცს, პირველ რიგში, ქალის მგრძნობელობა იზიდავს და არა ამ მგრძნობელობის გარეგნობაში გამოხატვა და, თქვენ წარმოიდგინეთ, ეგრეთ წოდებული “კოლგოტკების” ფერი. თუმცა ... მუნდირი რაღაც დოზით მაინც მნიშვნელოვანია. ერთი სიტყვით, ქალი, რომელსაც - პოდიუმთან საერთო არაფერი აქვს, მაგრამ იცის, როგორ წარმოუდგინოს და შესთავაზოს ადამიანს საკუთარი თავი არა მარტო საძინებელში, არამედ ცხოვრებაშიც - უინიციატივო ფაიფურის ლამაზმანზე გაცილებით საინტერესო და მიმზიდველია. გინდ დაიჯერეთ, გინდ არა, მამაკაცებმა გაუცნობიერებლად, დამოუკიდებლად, თავადვე გამოიყვანეს ქალის მომხიბვლელობის ფორმულა, რომელიც ასე იკითხება: მეტ აღფრთოვანებას მამაკაცში ის ქალი იწვევს, რომლის თეძოს გარშემოწერილობა წელისას 30-%-ით აჭარბებსო. თანაც, ეს სიმპათია ქვეცნობიერ დონეზე იბადება და ვრცელდება ყველა ქალზე, გამონაკლისის გარეშე. ასე რომ, ძვირფასო ქალბატონებო, თქვენს ბუნებისმიერ აღნაგობას, ამ შემთხვევაში, მნიშვნელობა სრულიად არ აქვს, მთავარი პროპორციებია.
სექსოლოგებს ამ საკითხზე თავისი მოსაზრება აქვთ და თვლიან, რომ უფრო მეტად მიმზიდველი არიან მკვრივი აღნაგობის არც თუ მაღალი ქალები, გამოკვეთილი მკერდითა და თეძოებით და შედარებით მოკლე ფეხებით. აი, გრძელფეხება გამხდარი მოდელები კი, მეცნიერულ ტვინებს თუ დავუჯერებთ, მგზნებარებით სწორედ რომ არ გამოირჩევიან. საიდან მოვიდა ეს პოსტულატი, კაცმა არ იცის. რადგან მეცნიერული ვერსიაა, ალბათ ცდებზე დაყრდნობით… როგორც უნდა იყოს, ფაქტი ფაქტად რჩება, “ყოველი მეორე” მამაკაცი მრგვალფორმებიან ქალს ირჩევს და ამ დროს გულწრფელად სჯერა, რომ სისავსე სიგამხდრეზე ამაღელვებელია.
ყველაფრის მიუხედავად, მარაგში ე. წ. “ყოველი პირველი” მამაკაცი გვრჩება. ეს “ინდივიდი”, თავის მხრივ, უპირატესობას გამხდარ ქალებს ანიჭებს, ფიგურით სტილში იუნისექსი. ანუ ბიჭური აგებულების ფიგურა, რომელსაც, ფაქტობრივად არც თეძო და არც მკერდი სხეულზე დიდად არ აღენიშნება და მაინც გამაოგნებლად სექსუალური და პროვოკაციულია.
ერთი სიტყვით, ძვირფასო ქალბატონებო, არავითარ შემთხვევაში, გესმით? არავითარ შემთხვევაში თავს არ უღალატოთ, დააფასეთ საკუთარი "მე", გიყვარდეთ ბუნების ნაჩუქარი თქვენი სხეული, და დაიმახსოვრეთ: კაცები ქერებს, წითურებს და შავთმიანებს კი არა, ერთნაირად განსხვავებულებს და განსხვავებულად გამაოგნებელ ქალებს ირჩევენ!.. რომელთა რიცხვში თქვენ უპირობოდ შედიხართ!
ს. გულიაშვილი
წყარო: eva.ge
ჩემი მშვენიერი ქალბატონი!
⏱️ 1 წთ.
👁️ 2 309
100%