მთავარია მოერიდოთ ფიგურის „გადამჭრელ“ კომპლექტებს, რაც არასწორ ადგილას აქსესუარის ან ფერთა გადასვლის მეშვეობით შეიძლება სრულდებოდეს. მაგალითად, თეძოებზე ჩამოშვებული ქამარი ან დაბალწელიანი ჯინსი აუცილებლად ამოკლებს ფეხებს იმის მიუხედავად, ფეხები გრძელია თუ არც მთლად.
ფეხებს ამოკლებს მინი კაბა, რომლის სიგრძეც წვივის შუამდე უწევს. თუ ცოტა სრული ფიგურა გაქვთ, აჯობებს ტრაპეციის ფორმის, მუხლებამდე კაბა ჩაიცვათ, თუ გამხდარი ხართ, არაჩვეულებრივი ვარიანტია ვიწრო, მუხლებამდე სიგრძისა და ოდნავ მაღალწელიანი კაბის შერჩევა. არც მთლად იდეალური მუხლების შემთხვევაში, ისინი შეგიძლიათ კლასიკური სიგრძის კაბით დაფაროთ და მასთან ერთად აუცილებლად მაღალქუსლიანი ფეხსაცმელი ჩაიცვათ.
სილუეტს და მათ შორის, ფეხებსაც კარგად აგრძელებს ოდნავ მუხლს აშორებული სიგრძის კაბა. თუ ძალიან გამხდარი ხართ, კაბა მუხლს ქვემოთ არ უნდა იყოს. თუ ფიგურა მინიკაბის ჩაცმის საშუალებას არ გაძლევთ, შეარჩიეთ მაქსი სტილი, რომელიც კოჭებს ქვემოთ იქნება დაშვებული.
ფეხების ვიზუალურად დაგრძელების კარგი საშუალებაა მაღალწელიანი შარვლები, რომელიც არაჩვეულებრივად ეხამება მომდგარ კოფთას, პერანგს ან ტოპს. თუ წელი ისეთი ვიწრო არ გაქვთ, რომ მომდგარი ტანსაცმელი ატაროთ, შეგიძლიათ მაღალწელიანი კაბა ჩაიცვათ, მაგრამ აქ აუცილებელია მაღალქუსლიანი ფეხსაცმლის ჩაცმაც.
პრაქტიკულად ყველა ჩაცმულობის მთავარი ღირსება მაღალი ქუსლია. ეს განსაკუთრებით აქტუალურია, როცა თქვენს სილუეტს ვიზუალურად დაგრძელება სჭირდება, რადგან მაღალი ქუსლი ბუნებრივად აგრძელებს ფეხებს. ვისაც წვრილ ქუსლზე სიარული არ გამოსდის, მისთვის კომფორტული გამოსავალი ე.წ. „ტანგეტკაა“. ასეთი ფეხსაცმელი სასურველია ღია ფერისა და ზედმეტი მორთულობების გარეშე იყოს, რათა სიმძიმის შთაბეჭდილება არ შექმნას.
მოკლე ფეხებს არ უხდება ფეხსაცმელი, რომელიც ქამრით, ლენტით ან თასმით არის შემოხვეული კოჭზე ან წვივზე. ფეხებს მხოლოდ სრულიად ღია ფეხსაცმელი აგრძელებს. დახურული ფეხსაცმელი, განსაკუთრებით დაბალ ქუსლზე კაბასთან ერთად არ უნდა ჩაიცვათ.
და კიდევ რამდენიმე ეშმაკობა, რომელიც თქვენს ფეხებს უფრო გრძელს გამოაჩენს:
* შავი ფერის გლუვი ფაქტურის წინდა, რომელიც ზუსტად ემთხვევა ფეხსაცმლის ფერს;
* ვერტიკალურზოლიანი შარვალი;
* კონტრასტი მაღალწელიან შარვალსა ან კაბასა და მოკლე ტოპს შორის;
* ღია ფეხსაცმელები წვრილ ქუსლებზე.
ამ მარტივი რჩევების გათვალისწინებით თქვენი გრძელი ან არც ისე გრძელი ფეხები ყოველთვის მიიპყრობს მოხიბლულ მზერებს.
წყარო: friday.ge