ჭარბი ოფლიანობა
მომატებულ ოფლიანობას ჰიპერჰიდროზი ეწოდება, რომლის მიზეზის დადგენა ზოგიერთ შემთხვევაში ექიმებსაც უჭირთ. ამ პრობლემის გამო ადამიანს მრავალი კომპლექსი უჩნდება: ხელის ჩამორთმევა ერიდება, იღლიებში სველი ლაქების გამო უხერხულობას გრძნობს, არაფერს ვამბობთ წინდების უსიამოვნო სუნზე.
მიუხედავად იმისა, რომ ოფლის აქტიურად გამოყოფის ჭეშმარიტი მიზეზი დღემდე უცნობია, მისი მექანიზმი საკმაოდ კარგადაა შესწავლილი. საქმე ვეგეტატურ ნერვულ სისტემას ეხება, რომლის მოვალეობაა შინაგანი ორგანოების მართვა. შინაგანი სამყაროდან მიღებული სიგნალების შემდეგ, თავის ტვინი მათ ამუშავებს, სიტუაციას აფასებს და ვეგეტატური ნერვული სისტემის მეშვეობით შინაგან ორგანოებს "მითითებებს აძლევს". ადამიანი გარბის – გული სწრაფად მუშაობას იწყებს. სირბილიდან სიარულზე გადადის – რიტმს ანელებს. ასეთივე პრინციპით მუშაობს ოფლის ჯირკვლებიც. გარემოს ტემპერატურამ მოიმატა – ჯირკვლები ოფლს გამოყოფენ. სისველე ორთქლდება და სხეული გრილდება.
ძლიერი ოფლდენა შეიძლება ნიშანი იყოს ისეთი სერიოზული დაავადებების, როგორიცაა დიაბეტი, სტენოკარდია ან მიოკარდის ინფარქტი. ოფლის აქტიური გამოყოფა ხშირად ქავილით მიმდინარე დერმატოზების დროსაც ხდება. აღსანიშნავია ისიც, რომ უფროსი ასაკის ქალბატონებს კლიმაქსის პერიოდში მომატებული ოფლიანობა აქვთ.
ზოგჯერ სრულიად ჯანმრთელ ადამიანებშიც აღინიშნება ძლიერი ოფლდენა. ასეთ შემთხვევებში მიზეზი ხშირად გარემო ფაქტორებია. შესაძლებელია საქმე ეხება წამლებს, რომლებსაც პიროვნება იღებს. მაშინ საჭიროა ექიმს მიმართოს, რათა ისინი შეცვალოს.
რატომ აქვს ოფლს სუნი?
საოფლე ჯირკვლების ორი სახეობა გვაქვს. ე.წ. ეკრინული ჯირკვლები მთელ სხეულზეა "მიმობნეული". მათი თავმოყრა შედარებით მჭიდროა იღლიის ღრმულში, ხელისგულებზე, ტერფებსა და მკერდზე. გარემოსა და თვით ორგანიზმის ტემპერატურის ნებისმიერი ცვლილების დროს ამ ჯირკვლების "ჩართვა" ხდება. მეორე, აპოკრინული ჯირკვლები ჩვენს ემოციებზე – სტრესებზე, სიხარულზე, ტკივილსა და აღგზნებაზე რეაგირებენ. მათ აგრეთვე "სუნის ჯირკვლებსაც" უწოდებენ იმიტომ, რომ ასეთ მომენტებში მყარი არომატის მქონე სპეციფიკურ ფერომონებს გამოყოფენ. აპოკრინული საოფლე ჯირკვლები განლაგებულია ინტიმურ ადგილებში.
თავისთავად ოფლი 99% წყლისგან შედგება, ხოლო დანარჩენი 1%–ში შედის ნატრიუმის მარილები, კალიუმი, კალციუმი, სულფატები, ფოსფატები, თუთია, მანგანუმი, რკინა, ამინმჟავები, ქოლესტერინი, სტეროიდული ჰორმონები. პრაქტიკულად ახალგამოყოფილ ოფლს სუნი არ აქვს. რამდენიმე წუთის შემდეგ კი საქმეში ერთვებიან ბაქტერიები – საპროფიტები, რომლებიც ჩვენს კანზე საოფლე ჯირკვლების სადინარებთან ცხოვრობენ. ეს ორგანიზმები ოფლს ამუშავებენ და ჩვენს ყნოსვას სწორედ მათი ცხოველმოქმედების პროდუქტები აღიზიანებს.
როგორ ვებრძოლოთ ოფლს
ყველაზე ძველი და ყველაზე მარტივი საშუალება საპონი და წყალია, მაგრამ ის ყოველთვის ხელთ არ გვაქვს, თანაც ხანმოკლე დროით შველის. უახლესი დეზოდორანტები–ანტიპერსპირანტები უფრო ეფექტურია. მათ შეუძლია ოფლისა და მისი უსიამოვნო სუნისაგან რამდენიმე საათი ან მთელი დღე დაგიცვათ. მოსახერხებელიცაა და ორგანიზმისათვის უვნებელიც.
რჩევა
დეზოდორანტი მხოლოდ სუფთა კანზე წაისვით. არ ეცადოთ, სხეულის სუნი პარფიუმერული კომპოზიციებით გადაფაროთ. ასე არომატების საზიზღარ ნარევს მიიღებთ.
თუ სუნამოს ან ტუალეტის წყალს იყენებთ, მაშინ ოფლის საწინააღმდეგო უსუნო საშუალება შეარჩიეთ.
არ შეიძლება დეზოდორანტების გამოყენება დაზიანებულ კანზე. ასევე არარეკომენდებულია იღლიის ზონაში ეპილაციის გაკეთებისთანავე მისი წასმა. გაკაწვრას ან მიკროსკოპულ დაზიანებას შეუძლია ანთებითი რეაქციის, გაწითლების ან გამონაყარის პროვოცირება მოახდინოს. ამ შემთხვევაში საბავშვო ტალკი გამოიყენეთ.
იღლიაში ბეწვები რეგულარულად მოიშორეთ. ისინი უსიამოვნო სუნს აკავებენ.
თუ გსურთ, ყველაზე ცხელ ამინდშიც კი სიგრილის გრძნობა შეინარჩუნოთ:
დილით გრილი შხაპი მიიღეთ, შემდეგ წყლისა და ვაშლის ძმრის ნარევით (პროპორციით 1:3) მთელი სხეული დაიზილეთ.
ყოველ დილით 1 ჩაის კოვზი ვაშლის ძმრით განზავებული 1 ჭიქა წყალი დალიეთ. ეს პროცედურა ორმაგად სასარგებლოა: ვაშლის ძმარი არამხოლოდ ოფლდენას ამცირებს, ნივთიერებათა ცვლასაც ასტიმულირებს.
ყურადღებით მოეკიდეთ კვებას. სიცხეში ჭამეთ ნაკლები ხორცი, ძეხვი, შებოლილი და ცხარე პროდუქტები. ალკოჰოლი და მაგარი ყავა ასევე ჭარბ ოფლდენას უწყობს ხელს. ყველაფერი ეს ორგანიზმისათვის სასარგებლო ხილით, ბოსტნეულითა და რძის მჟავე პროდუქტებით შეცვალეთ.
სიცხეში შემოჭერილ, სინთეტიკურ ქსოვილებზე უარი თქვით. ატარეთ ბამბის, ტილოს სამოსი. ტკბილი გაზიანი წყალი მინერალურით შეცვალეთ.
სალბი ოფლის საწინააღმდეგო ეფექტური საშუალებაა. 1–2 ჩაის კოვზ სალბის ფოთლებს ჭიქა მდუღარე წყალი დაასხით, ერთი წუთი გააჩერეთ, გაწურეთ. დღიური დოზა – 1 ჭიქა.
დღეში ერთხელ 10 წუთიანი ფეხების აბაზანა გაიკეთეთ. არსებობს რამდენიმე რეცეპტი, რომლებიც ფეხების ოფლიანობას ამცირებს:
* 3 ლიტრ თბილ წყალში ერთი სუფრის კოვზი ღვინის ძმარი ჩაუშვით.
* იმავე რაოდენობის წყალს 2 სუფრის კოვზი მინდვრის შვიტას ნაყენი დაუმატეთ.
* იმავე რაოდენობის წყალში ნახევარი ჭიქა მუხის ქერქის ნაყენი ჩაასხით. პროცედურის შემდეგ ფეხებზე ცივი წყალი გადაივლეთ.
წყარო: sana.ge