ჩასახვამდელი მეთვალყურეობა მოიცავს:
1. ჯანსაღი ცხოვრების წესი
სასურველია, რომ ორსულობისთვის მზადება წყვილმა დაიწყოს ერთი წლით ადრე მაინც. რა თქმა უნდა, პირველ რიგში, აუცილებელია ჯანსაღი წესის დაცვა – შეწყვიტეთ თამბაქოს მოწევა, ალკოჰოლის მიღება და აკრძალული მედიკამენტების გამოყენება- წყვილს, რომელსაც სურს ბავშვის ყოლა უნდა დაივიწყოს მავნე ჩვევები ჩასახვამდე მინიმუმ სამი თვით ადრე, რადგან აღნიშნულმა ჩვევებმა შესაძლებელია გაზარდოს თვითნებითი აბორტისა და განვითარების მანკების რისკი. მნიშვნელოვანია ქალის დაბალანსებული კვება, სასურველია დაორსულებამდე გქონდეთ ჯანსაღი კვებითი/ წონითი სტატუსი. ჭარბი ან მცირე წონა საფრთხეს შეუქმნის თქვენს ორსულობას და ბავშვის განვითარებას. სწორი კვება და ვარჯიში დაგეხმარებათ ოპტიმალური წონის შენარჩუნებაში. დაუშვებელია მომავალმა დედამ თვითნებურად აკრძალოს რაიმე საკვების მიღება ან დაიცვას წონის დასაკლები დიეტა ( ორგანიზმი კი არ უნდა გამოფიტოთ, არამედ გააჯანსაღოთ). მიიღეთ დიდი რაოდენობით ხილი და ბოსტნეული, მოერიდეთ მავნე ცხიმების, შაქრისა და მარილის ჭარბად გამოყენებას. დღეში სულ მცირე 30 წთ დაუთმეთ ვარჯიშს.
ფოლიუმის მჟავის მიღება ყველა ქალმა უნდა დაიწყოს ორსულობამდე სულ ცოტა 6 კვირით ადრე 400მკგ ოდენობით დღეში, დაბალი რისკის მქონე დედების შემთხვევაში; ოჯახურ ანამნეზში ნერვული მილის დეფექტების, ან სხვა ტიპის განვითარების მანკების არსებობის შემთხვევაში დოზა უნდა შეადგენდეს 5მგ/დღეში (5000მკგ) ორსულობის 12 კვირამდე, რადგანაც ეს ამცირებს ნაყოფის ნერვული მილის დეფექტის (ანენცეფალია, ზურგის ტვინის თიაქარი) განვითარების რისკს.
საჭიროა გაითვალისწინოთ, რომ A ვიტამინის გამოყენება ორსულებისთვის დაუშვებელია, რადგან, ვიტამინის ჰიპერდოზირება იწვევს ნაყოფის პათოლოგიურ განვითარებას, იგივე ზემოქმედება აქვს თამბაქოს კვამლსა და ალკოჰოლს.
2. რისკის შეფასება
უნდა მოხდეს ექიმის მიერ ანამნეზის შეკრება, საექიმო გასინჯვა, საჭირო ლაბორატორიული კვლევის ჩატარება, პოტენციური რისკის გამოვლენა და შეძლებისამებრ მკურნალობა ამ რისკის შესამცირებლად. ასეთ რისკს მიეკუთვნება: პირველ რიგში, უნდა დარწმუნდეთ, რომ არც თქვენ და არც თქვენს პარტნიორს სქესობრივი გზით გადამდები ინფექციები არ გაქვთ. ლაბორატორიული გამოკვლევა უნდა ჩაიტაროთ აივ-ინფექციაზე, ჰეპატიტზე, ქლამიდიაზე, ტრიქომონაზე ურეაპლაზმაზე და მიკოპლაზმაზე, ჰერპესის ვირუსზე. მნიშვნელოვანია გამოკვლევა პაპილომას ვირუსზე, ციტომეგალოვირუსზე, B ჯგუფის სტრეპტოკოკზე.
ორსულობისათვის მზადების ეტაპზე ქალმა აუცილებლად უნდა დაადგინოს სისხლის ჯგუფი და რეზუს-ფაქტორი. თუ ქალს უარყოფითი რეზუს-ფაქტორი აქვს, გართულებების თავიდან ასაცილებლად ექიმი აუცილებელ პროფილაქტიკურ მკურნალობას დაუნიშნავს.
3. თუ ქალს აქვს ქრონიკული დაავადება: შაქრიანი დიაბეტი, ენდოკრინული, გულ-სისხლძარღვთა სისტემის ან ღვიძლის დაავადებები, ასთმა, ეპილეფსია, ონკოლოგიური პათოლოგიები და ა.შ. ასეთ შემთხვევაში მნიშვნელოვანია სპეციალისტის კონსულტაცია და დადგენა, რამდენად უსაფრთხო იქნება ესა თუ ის პათოლოგია ორსული ქალისთვის და ნაყოფისთვის. სპეციალისტი დანიშნავს შესაბამის მკურნალობასა და დაადგენს ორსულობისთვის მომზადების განსაკუთრებულ წესებს. უცილებელია აღნიშნული დაავადებების კონტროლი, რადგან ორსულობამ შესაძლოა გაართულოს ისინი და პირიქით, აღნიშნულმა დაავადებებმა იქონიოს ცუდი გავლენა ორსულობის მიმდინარეობაზე.
4. ვაქცინაცია
ორსულობისთვის მომზადებისას მნიშვნელოვანია ყურადღება მიექცეს ინფორმაციას გქონდათ თუ არა გადატანილი ბავშვთა ინფექციური დაავადებები: წითელა, წითურა, ყბაყურა და ჩუტყვავილა. თუ ქალი არ ყოფილა მსგავსი დაავადებებით ინფიცირებული, აუცილებელია ჩატარდეს ვაქცინაცია. აღნიშნული ინფექციები ძალიან საშიშია ორსული ქალისთვის. ვირუსი მოქმედებს ნაყოფზე და იწვევს განვითარების სხვადასხვა სახის მანკს ან მუცლის მოშლას.
ორსულობისთვის მზადება უნდა მოიცავდეს გენეტიკურ კონსულტაციებს და იმუნოლოგიურ გამოკვლევებს.
წყარო: active.ge