დასავლეთ ევროპასა და ამერიკაში უკანასკნელი 30 წლის განმავლობაში აქტიურად მიმდინარეობს მოწევის საწინააღმდეგო პროპაგანდა. ამიტომ, ჯანდაცვის მსოფლიო ორგანიზაციის პროგნოზით, 2020 წლისთვის თამბაქოს მოწევის ეპიდემია განვითარებად ქვეყნებში გადაინაცვლებს, რადგან განვითარებადი ქვეყნების ჯანდაცვის სისტემა, სახსრების უქონლობის გამო, მზად არ არის ამ ტიპის პროგრამების დასაფინანსებლად.
განსაკუთრებულ აღშფოთებას იწვევენ მწეველი ექიმები და უმაღლესი სამედიცინო სასწავლებლის სტუდენტები, რადგან ისინი ,,სამაგალითო ჯგუფს” უნდა წარმოადგენდნენ დანარჩენი მოსახლეობისთვის.
მსოფლიო ჯანდაცვის ორგანიზაციამ გამოაქვეყნა მწეველი ადამიანის ორგანიზმის სურათი, სადაც თვალნათლივ არის ნაჩვენები, თუ რომელი ორგანოებისა და რა სახის დაზიანებები აღენიშნება მწეველ ადამიანებს.
1. გამელოტება - მოწევა ასუსტებს იმუნიტეტს, ორგანიზმის გამოფიტვის გამო იწყება თმის ზრდის შეჩერება და შედეგად გამელოტება. აგრეთვე აღსანიშნავია პირის ღრუს დაწყლულება, გამონაყარი პირის ღრუში, სახეზე, ტანსა და ხელებზე.
2. სიბრმავე - მწეველებში 40 %- ით არის გაზრდილი კატარაქტის განვითარების რისკი. მოწევა ხელს უწყობს, აგრეთვე, მაკულოდისტროფიის (მხედველობის ველში ლაქის გაჩენა) განვითარებას.
3. ნაოჭები - მოწევა იწვევს კანის ნაადრევ დაბერებასა და დანაოჭებას.
4. სმენის დაქვეითება - მოწევისგან გამოწვეული სისხლძარღვთა ათეროსკლეროზის გამო შეფერხებულია შიდა ყურის სისხლმომარაგება, რის გამოც მწეველები ხშირად კარგავენ სმენას.
5. კანის კიბო - მწეველებს ხშირად უვითარდება კანის ბრტყელუჯრედოვანი კიბო.
6. კბილების დაზიანება - თამბაქოს კვამლის ქიმიური ნივთიერებები იწვევენ კბილების გაყვითლებას, ქვების წარმოქმნას, კარისესსა და ღრძილების დაავადებას.
ემფიზემა და ქრონიკული ბრონქიტი- ამ დროს ყოველგვარი ფიზიკური დატვირთვა იწვევს ქოშინს, სუნთქვის გაძნელებას, ხველას ჩირქოვანი ნახველით, სუნთქვის დარღვევას.
7. ხშირი მოტეხილობები - თამბაქოს კვამლის ტოქსიურ აირებს უნარი აქვს, ჟანგბადთან შედარებით 200 ჯერ უფრო აქტიურად შეუერთდეს ჰემოგლობინს.
შედეგად ფერხდება ძვლოვანი ქსოვილის ჟანგბადით მომარაგება, ძვალი მყიფდება და ხშირად ვითარდება მოტეხილობა.
8. გულ-სისხლძარღვთა დაავადებები - მოწევა იწვევს გულის ცემის გახშირებას, არტერიული წნევის მომატებას, სისხლში ქოლესტერინის შემცველობის გაზრდას. მოწევა განსაკუთრებით საშიშია ჰიპერტონული დაავადების მქონე პაციენტებისთვის.
9. კუჭის წყლული - მოწევა აქვეითებს ორგანიზმის წინააღმდეგობის უნასრ წყლულოვანი დაავადების გამომწვევი ბაქტერიისადმი, აგრეთვე წყლულის მკურნალობის ეფექტურობას.
10. ფრჩხილების გაყვითლება - თამბაქოს კუპრო გროვდება ხელის კანსა და ფრჩხილებზე, აძლევს რა მათ მოყვითალო- მოყავისფრო შეფერილობას.
11. ორსულობის შეწყვეტა - მოწევა ორსულობის დროს ზრდის მცირე წონის ბავშვის დაბადების რისკს. მწეველ ქალბატონებში 2- 3- ჯერ უფრო ხშირია თვითნებური აბორტი, ორსულობის შეწყვეტა, მკდრად შობადობა. გარდა ამისა, მოწევა ამცირებს ქალური ჰორმონების დონეს, რაც იწვევს ნაადრევ კლიმაქსსა და მენოპაუზას.
12. სპერმის ხარისხის გაუარესება - მოწევა იწვევს სპერმის მორფოლოგიის შეცვლასა და სპერმატოზოიდების მოძრაობის უნარის დაქვეითებას, რასაც უშვილობამდე მივყავართ.
13. ფსორიაზი - მწეველებს 2-3ჯერ უფრო ხშირად ემართებათ ეს დაავადება.
14. ბიურგერის დაავადება - მაობლიტირებელი თრომბანგიტი - ეს არის პერიფერიული სისხლძარღვების იშვიათი დაავადება, რომელიც თითქმის ყოველთვის დაკავშირებულია მოწევასთან. დაავადებამ შეიძლება გამოიწვეიოს არტერიების სანათურის ნაწილობრივ ან სრული დახშობა, განგრენა და კიდურის ამპუტაციაც კი.
15. კიბო - თამბაქოს კვამლი შეიცავს 50- ზე მეტ კანცეროგენს. მწეველებს 22- ჯერ უფრო ხშირად ემართებათ ფილტვის კიბო არამწეველებთან შედარებით. სხვა ორგანოების სიმსივნეებთან მიმართებაში კი ასეთია სტატისტიკა- მწეველებში ცხვირის ღრუს კიბო 2- ჯერ უფრო ხშირად ვითარდება; ენის, პირის ღრუს ლორწოვანისა და ტუჩის კიბო- 4- 10- ჯერ ხშირად, საყლაპავის- 8- 10- ჯერ, კუჭის- 2-3-ჯერ, მსხვილი და სწორი ნაწლავის- 5- 6-ჯერ, თირკმლის- 5-ჯერ, შარდის ბუშტის- 3- ჯერ, პენისის- 2- 3-ჯერ, პანკრეასის (კუჭუკანა ჯირკვლის)- 2- 5-ჯერ, ღვიძლისა და ნაღვლის ბუშტის კიბო კი- 5- 6- ჯერ უფრო ხშირად. უახლესი გამოკვლევების თანახმად, მოწევა ზრდის ძუძუს კიბოს წარმოქმნის რისკსაც.
ამ მრავლისმთქმელი ფაქტების ფონზე, კიდევ ერთხელ დაფიქრდით- ღირს თუ არა მოწევა თქვენი ჯანმრთელობის ფასად?!
წყარო: active.ge