თავდაპირველად ის ყურადღებით უსმენს თქვენ მიერ წარმოთქმულ სიტყვებს, მოგვიანებით კი გპასუხობთ კიდეც ღიმილითა და ბგერებით. ამგვარად ბავშვი სწავლობს ურთიერთობას ჯერ მშობლებთან, მერე კი თანატოლებთან.
კომუნიკაბელურობა რამდენიმე ფაქტორზეა დამოკიდებული. უწინარესად - მოზრდილთა ურთიერთობაზე, რომლის საფუძველზეც ბავშვი გარკვეულწილად აყალიბებს საკუთარ ქცევას. შემდეგ - ფსიქოლოგიურ ტიპზე. ფსიქოლოგები განასხვავებენ ორ ურთიერთსაპირისპირო ტიპს:
● ექსტრავერტებს - ისინი შედარებით აქტიურები, კომუნიკაბელურები არიან, ადვილად შედიან კონტაქტში, უყვართ ხალხმრავლობა;
● ინტროვერტებს - საკუთარ თავში ჩაკეტილები, გაურბიან სხვებთან, მათ შორის - თანატოლებთან, ურთიერთობას. მიუხედავად ამისა, აუცილებელია, გამოვიჩინოთ ძალისხმევა და ინტროვერტი ბავშვებიც ჩავრთოთ საზოგადოებაში.
კომუნიკაციური უნარ-ჩვევების განვითარების მეთოდები: უპირველეს ყოვლისა, ბავშვი არ უნდა იყოს იზოლირებული თანატოლებისგან. განსაკუთრებული ყურადღება უნდა მივაქციოთ მის ადრეულ განვითარებას, უკვე ერთი წლის ასაკისთვის ვატაროთ პატარა საბავშვო კლუბებსა და ბავშვთა თავშეყრის ადგილებში, მივაჩვიოთ როგორც ბავშვების, ისე მოზრდილი ადამიანების გარემოცვას. მიიპატიჟეთ შინ ნაცნობი პატარები - მასპინძლობა მას ლიდერის თვისებებს გაუღვივებს და ურთიერთობის ტაქტიკას ასწავლის.
აუცილებელია თავდაჯერებაც. გახსოვდეთ, ურთიერთობის სირთულეები და შიში დაბალი თვითშეფასებით არის განპირობებული. ბავშვმა უნდა იცოდეს, რა ჭკვიანი, ლამაზი და საყვარელია.
რამდენიმე პრაქტიკული რჩევა:
1. ბავშვს პატივისცემით მოეპყარით, თანატოლივით ესაუბრეთ, მეტი აუხსენით, ყოველთვის ჰკითხეთ აზრი.
2. განსაკუთრებით დიდი ყურადღება მიაქციეთ მისი მეტყველების ჩამოყალიბებას, უკითხეთ ზღაპრები, ლექსები.
3. ასწავლეთ აზრის გულახდილად გამოთქმა, საკუთარი მოთხოვნილებებისა და სურვილების გამოხატვა. ხშირად ჰკითხეთ, რამე ხომ არ აწუხებს, ყურადღებით მოეკიდეთ მის გრძნობებს.
4. თავს ნუ აარიდებთ ქებას, აუცილებლად აღნიშნეთ ბავშვის მიღწევები. ეს მას, ერთი მხრივ, თავდაჯერებას შემატებს, მეორე მხრივ კი კარგისა და ცუდის გარჩევას ასწავლის.
5. პირადი მაგალითით გაუღვიძეთ ბავშვს ოპტიმიზმი. მისი წყალობით პატარა ყოველგვარ სიტუაციაში დაინახავს დადებით მხარეს, ირწმუნებს საკუთარ შესაძლებლობებს და ისწავლის სირთულეებთან გამკლავებას. ზღაპრების მაგალითზე აუხსენით, რომ შეუპოვარი ადამიანი ყოველთვის აღწევს მიზანს.
6. მცირე ასაკიდანვე მიაჩვიეთ თავაზიანობას, უფროსების პატივისცემას, თანამოსაუბრის მოსმენა.
7. აუხსენით, რაა კარგი და რა - ცუდი. დაე, გააცნობიეროს, რომ ყოველგვარ საქციელზე პასუხად ასეთივე ქცევას მიიღებს.
დაბოლოს, მთავარი: თავად მიეცით ურთიერთობის მაგალითი.
მოამზადა თამარ კაციტაძემ
წყარო: eva.ge