კარიერა და ძილი - ეს თანამედროვე საქმიანი ადამიანის ცხოვრებისეული საზღვრებია. სახლი-სამსახური-სახლი - ეს კი მისი ძირითადი სამოძრაო ტერიტორია. ახალი ნაცნობობისთვის დრო, ფაქტობრივად, აღარ აქვთ. მიზეზი, რის გამოც ადამიანები სამსახურეობრივ რომანებში „იხლართებიან“, სწორედ ასეთი „სტანდარტული“ გრაფიკი გახლავთ. თითქოს ამაში განსაკუთრებულიც არაფერია, მაგრამ...
სინამდვილეში ამ ტიპის რომანები გაცილებით მეტ სირთულეებს ქმნის, ვიდრე ეს ერთი შეხედვით შეიძლება აღვიქვათ. განსაკუთრებით პრობლემატური ხდება სიტუაცია, როდესაც რომანი ხელმძღვანელსა და მის დაქვემდებარებულ პირს შორის იბმება. ბუნებრივია, საკითხი, მამაკაცია ხელმძღვანელი თუ ქალი, არსებითია, მაგრამ მთლიანობაში ეს საქმის არსს არ ცვლის.
ურთიერთობები, რომელზეც თავდაპირველად ორივე მხარე დიდ იმედებს ამყარებს, შესაძლოა, ისე არ განვითარდეს, როგორც ეს მხარეებს სასიყვარულო ისტორიის დაწყების პროცესში სურთ. ასეთი ურთიერთობების დამალვა შეუძლებელია კოლეგებისგანაც. იმედი, რომ სამსახურეობრივი რომანის შესახებ ვერავინ გაიგებს, - ილუზიაა და სხვა არაფერი.
ასეთ დროს ძნელია იმის გარკვევაც, რაზეა დაფუძნებული ამ ტიპის ურთიერთობები - ურთიერთშეჩვევასა თუ იძულებაზე, რომელიც ხშირად ხელმძღვანელი პირიდან მომდინარეობს.
თუ ურთიერთობები იძულებაზეა დაფუძნებული, ის, სავარაუდოდ, იმ კომპანიაში მიღებულ თანამშრომელთა ქცევის კოდექსს არღვევს. გარდა ამისა, შესაძლებელია, იძულებით შექმნილ სასიყვარულო სიტუაციას სექსუალური ძალადობის კვალიფიკაცია მიეცეს და ამას სასამართლო პროცესების გრძელი ჯაჭვიც მოჰყვეს. ნეგატიური შედეგების თვალსაზრისით არც ნებაყოფლობითი ურთიერთობები ჩამორჩება იძულებითს. მან, ვინც უფრო მაღალ პოზიციას იკავებს კომპანიის იერარქიაში, შესაძლოა, ხელისუფლების სადავეები თავის სასარგებლოდ გამოიყენოს.
- ასეთი ურთიერთობები შეიძლება გამანადგურებელ ქარიშხალად იქცეს არა მარტო ორი ადამიანის ცხოვრებაში, რომლებმაც სამსახურში ახლო ურთიერთობაში შესვლა გარისკეს, არამედ ეს, სავარაუდოდ, კოლეგებზეც იმოქმედებს. მთელი ძალებით უნდა ეცადოთ, არ შეხვიდეთ რომანტიკულ ურთიერთობებში მასთან, ვის დაქვემდებარებაშიც იმყოფებით“, - აცხადებს ამერიკული კომპანია Pearl Associates-ის ხელმძღვანელ, ჰილარი პერლი.
ჰილარი პერლის კლიენტის ისტორიიდან
ჩვენმა კლიენტმა ერთ-ერთი რომანის შესახებ გვიამბო, რომელიც თანამშრომლობის საფუძველზე დაიწყო და დროთა განმავლობაში უფრო მეტში გადაიზარდა. წყვილი ამ ურთიერთობებს მალავდა, თუმცა მათ შესახებ ერთ-ერთი განყოფილების ხელმძღვანელმა, რომანის ერთ-ერთი გმირის უფროსმა, რომელიც ჩვენი კლიენტი გახლდათ, მაინც გაიგო. ძალიან ნერვიულობდა იმ დამოკიდებულებაზე, რომელიც მისი დაქვემდებარებული პირის და ახლა უკვე „ბოსის“ საყვარელის მიმართ შინაგანად გააჩნდა. აღარ იცოდა, როგორ მოქცეულიყო. არ უნდოდა, რამე შეშლოდა, მაგრამ... აქ ფავორიტიზმს შეეჯახა. კომპანიის ხელმძღვანელი ცდილობდა, ქვემდგომი თანამშრომლის საქმიანი თვისებების ხარისხის შეფასებაზე მოეხდინა გავლენა. ამ განცდებს სამუშაოდან მისი ყურადღება სხვა, ბევრად ნაკლებმნიშვნელოვან საქმეებზე გადაჰქონდა. საქმე, ფაქტობრივად, აღარ კეთდებოდა. აღარ ვლაპარაკობ იმაზე, რომ კომპანია სასამართლოს წინაშე წარდგომის რისკის ქვეშ იმყოფებოდა. შემდეგ კი წყვილი ერთმანეთს დაშორდა, - ამ ისტორიას ჰილარი პერლი სამსახურეობრივი რომანის რაობის და თანმდევი შედეგების უკეთ ასახსნელად იხსენებს და საზოგადოებას, განსაკუთრებით ქალებს, ასეთი ტიპის რომანებისგან თავის შეკავებისკენ მოუწოდებს. მისი განმარტებით, ურთიერთობები, რომელიც შეჩვევიდან და ურთიერთპატივისცემიდან იწყება, შესაძლოა, კატასტროფულად დასრულდეს.
- მიუხედად იმისა, რომ ასეთი რომანების მორალური ასპექტი ერთი და იგივეა როგორც მამაკაცისთვის, ისე ქალისთვის, ქალი ყოველთვის კარგავს მეტს, - აცხადებს პერლი.
ვინც არ უნდა იყოს ქალი, ხელმძღვანელი თუ დაქვემდებარებული პირი, ის თვითონ იქმნის კიდევ ერთ ბარიერს ცხოვრებაში, როდესაც დარტყმის ქვეშ აყენებს არა მარტო საკუთარ რეპუტაციას, არამედ სამსახურში წინსვლის შესაძლებლობასაც. უფრო მეტიც, მან, შესაძლოა, ის სამსახურიც დაკარგოს, რომელიც მოცემულ კომპანიაში გააჩნია. სამსახურეობრივი რომანები იშვიათად აისახება მხოლოდ ორი ადამიანის ცხოვრებაზე, ის უარყოფითად მოქმედებს კოლეგებზე, განყოფილებასა და ორგანიზაციაზეც მთლიანობაში. განსაკუთრებით მაშინ, თუ წყვილი ხელმძღვანელი და მისადმი დაქვემდებარებული პირია.
პერლის რჩევები
როგორ შეიძლება გავუმკლავდეთ ასეთ პრობლემებს? უმჯობესია, უბრალოდ, მოერიდოთ მას. ეცადეთ არასდროს შეხვიდეთ რომანტიკულ ურთიერთობებში მასთან, ვის დაქვემდებარებაშიც იმყოფებით. თუ ეს მაინც მოხდება, სერიოზულად დაფიქრდით სხვა განყოფილებაში, ან საერთოდ, სხვა კომპანიაში გადასვლაზე. თქვენ არა მარტო საკუთარ კარიერას აყენებთ რისკის ქვეშ, არამედ სერიოზულ ზიანს აყენებთ იმ ადამიანებს, რომლებიც თქვენთან მუშაობენ.
და თუ რომანი უკვე დაწყებულია და ურთიერთობის გაწყვეტას ვერ ახერხებთ, კარგი დროა, საქმეში კადრების განყოფილება ჩაერთოს. თუ თქვენ სერიოზულ კომპანიაში მუშაობთ, მის საკადრო პოლიტიკაში მსგავსი სიტუაციები გათვალისწინებული იქნება, თქვენ კი ბოსის მხრიდან რეპრესიებისგან იქნებით დაცული, რომლის თამაშის ობიექტიც გახდით სამსახურეობრივი რომანის დაწყებისთანავე.
წყარო: www.sazogadoeba.ge
„ქალი ყოველთვის კარგავს მეტს“ - რატომ არ უნდა გავაბათ სამსახურეობრივი რომანი ხელმძღვანელ პირთან
⏱️ 1 წთ.
👁️ 1 890
100%