XX საუკუნის 70-იანი წლებიდან კი გრაფოლოგია ადამიანის ცხოვრების სხვადასხვა სფეროებში შეიჭრა: გრაფოლოგიურ ექსპერტიზას იყენებდნენ კრიმინალისტიკაში, ადამიანის სამსახურში მიღებისას და სხვ. დღეისთვის ოფიციალურ ფსიქოლოგიას პიროვნების დიაგნოსტიკის უფრო ზუსტი მეთოდებიც აქვს.
თუმცა დასავლეთის ბევრ ქვეყანაში გრაფოლოგიური ექსპერტიზა ტრადიციად არის ქცეული: მაგალითად, აშშ-სა და graphology-5ჰოლანდიის რამდენიმე ორგანიზაციაში სამსახურში მიღების კანდიდატები რეზიუმეს ხელით ავსებენ, რათა დამქირავებელმა გრაფოლოგიური ექსპერტიზა ჩაატაროს.
საკუთარი ან ახლობელთა ხასიათის თავისებურებების დადგენა გრაფოლოგიის მეშვეობით საკმაოდ იოლია: აიღეთ თეთრი, უხაზო ფურცელი, ჩვეულებრივი კალამი, რამდენიმე ხაზი დაწერეთ თქვენი ჩვეულებრივი ხელწერით და შემდეგი პარამეტრების მიხედვით გააანალიზეთ:
ხელწერის დახრილობა
სწორი, დაუხრელი ხელწერა ადამიანის კეთილგონიერებას, თავშეკავებულობასა და შინაგან ჰარმონიას მოწმობს. ასე ძალიან მშვიდი და გაწონასწორებული ადამიანები წერენ.
მსუბუქი დახრა მარჯვენა მხარეს დახრილობის ყველაზე გავრცელებული ფორმაა. ასე წერენ გულღია, ზომიერად თამამი და კეთილგანწყობილი ადამიანები, რომელთაც დროდადრო იმპულსებისადმი დამორჩილება სჩვევიათ. დახრილი ხელწერა ემოციურობაზე მეტყველებს – მის მფლობელს თავის ხელში აყვანა ყოველთვის არ შეუძლია.
ძლიერი მარჯვენა დახრილობის მქონე ხელწერა, როგორც წესი, ახასიათებთ ადამიანებს, ვისთანაც ენთუზიაზმი მომენტალურად ჩნდება და ასევე სწრაფად ნელდება. ასე წერენ ენერგიული, არაორდინალური ადამიანები, ვისაც ძალიან მალე უყვარდებათ.
მსუბუქი დახრილობა მარცხნივ მამაცურ ხასიათზე მეტყველებს. ასეთი ხელწერის მქონე ადამიანები ცხოვრებაში გონებით ხელმძღვანელობენ, ისინი ჭკვიანები და წინდახედულები არიან.
მარცხნივ ძლიერი დახრილობის მქონე ხელწერის პატრონებში, როგორც წესი, შინაგან ემოციურობასა და გარეგნულ თავშეკავებას შორის მუდმივი ბრძოლა მიმდინარეობს. მკვეთრად „უკან“ დახრილი ხელწერა გვეუბნება, რომ ადამიანი ჰიპერმგრძნობიარეა, მაგრამ ამას სხვებს ძალიან იშვიათად აჩვენებს.
ხაზების მიმართულება
ზემოთ მიმართული ხაზების ავტორი ოპტიმისტია. მას შეიძლება მცირედი ინფანტილურობა, გულუბრყვილობა და ბავშვური უშუალობა ახასიათებდეს. ან წერის დღეს განსაკუთრებულად კარგ ხასიათზე იყოს.
სწორი და თანაბარი ხაზები შინაგან დისციპლინაზე მეტყველებს. თუ უხაზო ფურცელზეც კი ხაზები სწორია, ე.ი. მისი მფლობელი აკურატული და წინდახედული ადამიანია.
თუ ხაზები დაბლა მიდის, ავტორი ცუდი ხასიათზეა. ხაზები მაშინ იწევენ დაბლა, როდესაც რაიმე მოსაწყენს ან ნაღვლიანს ვწერთ. თუ ამას მუდმივი ხასიათი აქვს, ხელწერის პატრონი შეიძლება მსუბუქ დეპრესიაშიც იყოს.
ხელნაწერის სიდიდე
მსხვილი ასოებით გულღია, გულიანი და საკუთარ თავში დარწმუნებული ადამიანები წერენ. ასეთი ხელწერა ხშირად გადამეტებულ თვითშეფასებაზეც მეტყველებს.
ზედმეტად მსხვილი ხელწერა საკუთარი თავით შეპყრობილ ადამიანებს, მარტივად კი – სრულ ეგოისტებს აქვთ.
საშუალო ასოებით მშვიდი, ადეკვატური თვითშეფასების მქონე და საკუთარ თავში შესაბამისადვე დარწმუნებული ადამიანები წერენ. თუ ხელწერის ზომა ყოველი ხაზის ან წინადადების ბოლოსკენ ცოტათი იზრდება – საქმე გულღია, დამოუკიდებელ და თავისუფალ ადამიანთან გვაქვს. ხოლო თუ პირიქით, ასოები მცირდება – მისი მფლობელი რაღაცის დამალვას ცდილობს.
მინიატურული ხელწერა შეიძლება მხედველობის დარღვევებთან იყოს დაკავშირებული. პატარა ასოებით წერა ასევე მეტყველებს გონების ანალიტიკურ წყობაზე, ნაწილობრივ პედანტურობასა და დეტალებისადმი გადაჭარბებულ ყურადღებაზე. წვრილი ხელწერის პატრონთა უმეტესობა მორცხვია.
ხელწერის ფორმა
მომრგვალებული ასოებით უმეტესად მხიარული, უბრალო და გულკეთილი ადამიანები წერენ. ისინი ცბიერები არ არიან და მაინცდამაინც არც ინტრიგები იტაცებთ. გარშემომყოფებს ლამის დედური ზრუნვით, გაგებითა და სიკეთით ეპყრობიან.
მახვილკუთხიანმა ასოებმა ორი მიმართულებით შეიძლება წაგვიყვანოს, რომლებიც ხშირად ერთმანეთთანაა შეხამებული: აგრესიულობა და ძალიან მაღალი ინტელექტი. მახვილკუთხოვანი ხელწერის მქონენი ხშირად გამჭრიახი, ცბიერი, ჭკვიანი ადამიანები არიან. ამასთან ერთად, მსგავსი ხელწერა არც მაინცდამაინც გულკეთილ ადამიანებს ახასიათებთ.
„კუთხოვანი“ ხელწერა – თუ ასოები მაინცდამაინც მახვილი არ არის, მაგრამ ერთგვარი სიმკვეთრე, სწორი კუთხეები, ასოების პარალელური „გვერდები“ შეინიშნება – საქმე დაკვირვებულ, ირგვლივ მიმდინარე მოვლენების ღრმად აღმქმელ ადამიანთან გვაქვს. ასეთ პიროვნებებს ხშირად სხვების მართვა მაღალ დონეზე გამოსდით.
თუ კუთხოვან ხელწერაში ასოებიც საკმაოდ დიდია, ეს მფლობელის მანიპულაციებისადმი მიდრეკილებაზე მეტყველებს.
ასოების დაბოლოებები
თუ ზოგიერთი ასოს (მაგალითად, „ლ“) „კუდი“ ძალიან დაბლა ჩადის, ეს მფლობელის სექსუალურ აქტიურობაზე, ვნებიანობასა და ძლიერ სქესობრივ გატაცებაზე მეტყველებს.
თუ წაგრძელებული „კუდები“ ნაწერის ზედა მხარეს გვხვდება (მაგალითად, „ნ“-ს წერისას), ხელწერის მფლობელზე შეგვიძლია ვიმსჯელოთ, როგორც სულიერ, „ამაღლებულ“, ხშირად კი ღრმადმორწმუნე ადამიანზე.
აკურატულობა
სწრაფი, ბატისფეხური ნაწერი ამბობს, რომ მისი მფლობელი გაუწონასწორებელი ადამიანია. უმეტეს შემთხვევებში, ბატისფეხური ხელწერის მქონეებს დღის განსაზღვრული გრაფიკი არ აქვთ, დასაძინებლად გვიან წვებიან და გვიანვე იღვიძებენ, სამსახურიც სტრესული აქვთ.
ამას გარდა, ბატისფეხურით წერა გენიოსების დამახასიათებელია. მსოფლიოს გენიოსების უმრავლესობას აბსოლუტურად გაურკვეველი ნაწერი ჰქონდა.
რაც უფრო გარკვეულად წერს ადამიანი, მით გაწონასწორებული და ძლიერი პიროვნებაა. ხელწერის გარკვეულობა მშვიდი და მდგრადი ფსიქიკისა და არაჩვეულებრივ ფიზიკურ ფორმაში მყოფ ადამიანებს ახასიათებთ.
დაწოლა
მოსინჯეთ ხელით ფურცლის უკანა მხარე – გრძნობთ ასოების მოხაზულობას?
თუ დაწოლა საშუალოა, ნაწერის ავტორი მიზანდასახული, ნებისყოფიანი ადამიანია. იგი საკუთარ თავს საკმაოდ მაღალ შეფასებას აძლევს და შეუძლია, თითქმის ყველა სიტუაცია გააკონტროლოს.
მსუბუქი დაწოლა მორცხვ და კომპრომისებისკენ მიდრეკილ ადამიანებს სჩვევიათ, ვისით მანიპულირებაც იოლი საქმეა. თუ ფურცელს დაწოლა საერთოდ არ ეტყობა, მის ავტორს, სავარაუდოდ კომპლექსები და დაბალი თვითშეფასება აწუხებს.
ფურცელზე კალამს ძალიან ძლიერად ნამდვილი ჰედონისტები აჭერენ. ისინი ფიზიკური ტკბობის სამყაროში ცხოვრობენ, სექსუალურ ექსპერიმენტებს ატარებენ და უმეტესად, თავიანთი ცხოველური მოთხოვნილებების დაკმაყოფილებაზე არიან გადართულნი. ძლიერი დაწოლა ემოციურ და ხანდახან ისტერიულ ადამიანებს სჩვევიათ.
გრაფოლოგია ღრმა მეცნიერებაა. ბევრი საკუთარ თავში სავსებით დარწმუნებული ადამიანი წერს წვრილი ასოებით და პირიქით, ამიტომაც ასპროცენტიანი ანალიზის ჩატარება მხოლოდ გრაფოლოგიის პროფესიონალ სპეციალისტს შეუძლია.
წყარო: friday.ge