„ადამიანი ცოცხალი ორგანიზმია და ბუნების კანონებს ემორჩილება. კერძოდ: ზამთარი, როგორც მოგეხსენებათ, დასვენების პერიოდია, ბიოლოგიური პროცესები ნელდება, ბუნება თითქოს იძინებს.
გაზაფხულზე კი იწყება გამოცოცხლება, ბიოლოგიური პროცესების გააქტიურება. აი, ამ დროს, არის საჭირო კვებისას განსაკუთრებული სიფრთხილის გამოჩენა. არ არის სასურველი მძიმე და კალორიული საკვების მიღება. ორგანიზმი უნდა დატვირთოთ თანდათანობით. უკეთესია მიიღოთ მცენარეული საკვები: ბოსტნეული, წიწიბურა, ლობიო, მწვანილი, დიდი რაოდენობით სითხე, ბურღულეული, მცენარეული ცხიმი. კერძები უნდა იყოს მოხარშული, პური სასურველია წინა დღის… არასწორი კვების შედეგები შეიძლება გამოვლინდეს სხვადასხვა სახით. ყველაზე ხშირი, რასაც ადამიანები უჩივიან, არის საერთო სისუსტე, ძილიანობა, უხასიათობა. რატომ ხდება ეს?
საკვების მონელება აქტიური პროცესია და მოითხოვს დიდ ენერგეტიკულ ხარჯვას. ამიტომ ორგანიზმს უნდა მივაწოდოთ იმდენი საკვები, რამდენის გადამუშავებასაც შეძლებს. წინააღმდეგ შემთხვევაში იგი იწყებს დამატებითი ძალების გამოყენებას, რაც იწვევს მის დასუსტებას. აქედან გამომდინარე, ორგანიზმის საკვებით არასწორი მომარაგება ზემოაღნიშნული მდგომარეობის განვითარების ერთ–ერთ ძირითად მიზეზს წარმოადგენს.“
რა მნიშვნელობა აქვს წყლის საჭირო რაოდენობით მიღებას გაზაფხულზე?
ვინაიდან ბიოლოგიური პროცესების წარმართვისთვის აუცილებელია წყლიანი გარემო და წყალი, რომელიც ორგანიზმის 80%–ს შეადგენს და ესაჭიროება ამ რაოდენობის მუდმივი შევსება ნორმალური ფუნქციონირების შენარჩუნებისთვის. განსაკუთრებით წყალზე მოთხოვნილება იზრდება დათბობის დროს, ვინაიდან წყალი იკარგება კანიდან აორთქლების გამოც. აუცილებელია წყლის მიღება სუფთა სახით და არა ყავის, ან ჩაის სახით. კარგია ყველა კვების წინ 15–20 წუთით ადრე ერთი ჭიქა წყლის დალევა; უმეტესად თხიერი საკვების მიღება. სითხის ნაკლებობა, პირველ რიგში, აისახება კანზე, იგი ხდება მშრალი, აქერცლილი და უხეში, დანაოჭებული.
კანის სიმშრალე შესაძლოა იყოს ვიტამინების ნაკლებობით გამოწვეული. საერთოდ, გაზაფხული ღარიბია საკვებით, ამიტომ აქტიურად უნდა მივიღოთ ის საკვები, რასაც ბუნება ამ სეზონზე გვთავაზობს: ბოსტნეული, მწვანილი. თუ გამოხატულია მკვეთრი უკმარისობა, შესაძლებელია მედიკამენტების მიშველებაც, რომლებიც უნდა შეირჩეს ინდივიდუალურად.
რატომ არის გაზაფხულის პერიოდი საშიში გულ–სისხლძარღვთა პათოლოგიებით დაავადებული პირებისთვის?
ხშირად გესმით სიტყვები: „გარდამავალი პერიოდი“, მაგრამ ბევრმა არ იცის, რას ნიშნავს ეს. ალბათ იცით, რომ სიცივეში სისხლძარღვები ვიწროვდება, ხოლო სითბოში ფართოვდება. ჯანმრთელი სისხლძარვებისთვის ეს იოლი პროცესია, ისინი კლიმატურ ცვლილებებს ადვილად უმკლავდებიან, მაგრამ დაავადებული სისხლძღვებისთვის კი სეზონის შეცვლისთანავე იწყება პრობლემები. სისხლძარღვების სხვადასხვა დაავადება არსებობს. შევეხები ათეროსკლეროზს. იგი წარმოადგენს უპირატესად ელასტიკური ტიპის არტერიების ქრონიკულ დაავადებას. მისი საფუძველია ლიპოდური (ცხიმოვანი) ცვლის მოშლა. არტერიის კედელში ლაგდება ცხიმოვანი ნივთიერებები, რაც იწვევს მის გასქელებას, ელასტიკურობის დაქვეითებას, შიგნითა გარსის უსწორმასწორობას, სანათურების შევიწროებას, სისხლის მიმოქცევის მოშლას. ამ დაავადების განვითარების ერთ–ერთი ძირითადი მიზეზია ალიმენტური ფაქტორი – ცხოველური ცხიმებით, გაჯერებული ცხიმოვანი მჟავებითა და ქოლესტერინით მდიდარი საკვების უხვად მიღება. ეს დაავადება ქრონიკულია და იგი იწყება უპირატესად 30–35 წლის ასაკიდან, თუმცა შესაძლებელია – უფრო ახალგაზრდა ასაკიდანაც. მისი პროფილაქტიკისთვის აუცილებელია ჭარბი წონის დაკლება, საკვებში ცხოველური ცხიმების, ტკბილულის უმაღლესი ხარისხის თეთრი ფქვილის ნაწარმის მოხმარების შეზღუდვა. ეს ყოველივე აქტუალურია მთელი წლის განმავლობაში, მაგრამ, განსაკუთრებით – გაზაფხულზე.
ქალბატონ ინგა ქოთუაშვილის თქმით, თუ საკვებსა და წყალს მიიღებთ თქვენი ორგანიზმისთვის საჭიროებისა და შესაძლებლობების მიხედვით, იოლად გადაიტანთ გარდამავლ პერიოდებს, თავს იგრძნობთ მხნედ და ახალგაზრდად.
თეონა ნოზაძე
სატაძრო მედიცინის სახლი “ბეთლემი” მდებარეობს გლდანში, წმ. მთავარანგელოზთა სახელობის ეკლესიასთან. მის.: ხიზანიშვილის 70ა, V და VI მ/რ შორის.
ტელ.: 558 63 12 03
წყარო: ambioni.ge